ஈரோடு: ஈரோடு கிழக்கு தொகுதி இடைத்தேர்தலில் 8 சுயேச்சை வேட்பாளர்கள் வேட்பு மனுக்களை திரும்பப்பெற்ற நிலையில், திமுக மற்றும் நாம் தமிழர் கட்சி வேட்பாளர்கள் உள்பட 47 பேர் போட்டியிடுகின்றனர்.
ஈரோடு கிழக்கு தொகுதி இடைத்தேர்தலின் வாக்குப்பதிவு பிப்.5-ம் தேதி நடைபெற உள்ளது. திமுக வேட்பாளர் சந்திரகுமார், நாம் தமிழர் கட்சி வேட்பாளர் சீதாலட்சுமி உள்பட 58 வேட்பாளர்கள் வேட்புமனுக்களைத் தாக்கல் செய்னர். இதில், 3 வேட்பாளர்களின் வேட்புமனுக்கள் நிராகரிக்கப்பட்டு, 55 வேட்பாளர்கள் போட்டியிடும் நிலை இருந்தது.
8 பேர் திரும்பப் பெற்றனர்: இந்நிலையில் வேட்புமனு திரும்பப்பெறும் காலம் நேற்று மாலை 3 மணியுடன் நிறைவு பெற்றது. இதில் 7 சுயேச்சை வேட்பாளர்கள் மற்றும் ஒரு பதிவு செய்யப்பட்ட கட்சியின் மாற்று வேட்பாளர் என மொத்தம் 8 வேட்பாளர்கள் வேட்புமனுக்களை திரும்பப் பெற்றுள்ளனர். அதன்படி திமுக மற்றும் நாம் தமிழர் கட்சி வேட்பாளர்கள் உள்பட 47 வேட்பாளர்கள் இறுதி செய்யப்பட்டுள்ளனர்.
இதைத்தொடர்ந்து, ஈரோடு மாநகராட்சி அலுவலகத்தில் ஈரோடு கிழக்கு தொகுதி தேர்தல் நடத்தும் அலுவலர் மணீஷ் தலைமையில் சின்னம் ஒதுக்கும் பணி தொடங்கியது. அதில், அங்கீகரிக்கப்பட்ட கட்சியான திமுக வேட்பாளர் வி.சி.சந்திரகுமாருக்கு உதயசூரியன் சின்னம் ஒதுக்கப்பட்டது.
தொடர்ந்து அண்மையில் அங்கீகரிக்கப்பட்ட அரசியல் கட்சியான நாம் தமிழர் கட்சி வேட்பாளர் சீதாலட்சுமி, கரும்பு விவசாயி சின்னம் அல்லது மைக் சின்னம் ஒதுக்கீடு செய்ய கோரிக்கை வைத்தார்.
நாதகவுக்கு ‘மைக்’ சின்னம்: இதில், கரும்பு விவசாயி சின்னம் வேறொரு அரசியல் கட்சிக்கு ஒதுக்கீடு செய்யப்பட்டிருப்பதால், மைக் சின்னம் ஒதுக்குவதாக தேர்தல் நடத்தும் அலுவலர் தெரிவித்தார். அதனை வேட்பாளரும் ஏற்றுக் கொண்டார்.
இதனைத் தொடர்ந்து பதிவு செய்யப்பட்ட கட்சிகளின் வேட்பாளர்கள் மற்றும் சுயேச்சை வேட்பாளர்களுக்கு சின்னம் ஒதுக்கீடு செய்யப்பட்டது. இதற்கிடையே, ‘இந்து தமிழ் திசை’யிடம் நாம் தமிழர் கட்சியின் தலைமை ஒருங்கிணைப்பாளர் சீமான் கூறியதாவது தேர்தல் ஆணைய அங்கீகாரம் பெற்ற கட்சி என்ற அடிப்படையில் எங்கள் கொள்கையை பிரதிநிதித்துவப்படுத்தும் வகையில் விவசாயி சின்னத்தை ஒதுக்க கேட்டோம். அந்த சின்னம் வேறு கட்சிக்கு ஒதுக்கப்பட்டதாக தெரிவிக்கப்பட்டது. இந்நிலையில், தேர்தல் ஆணைய விதிமுறைகளின்படி, நாங்களே சுயமாக சின்னத்தை வரைந்து கொடுக்கும் வாய்ப்பு இருந்ததால், மூன்று விதமான விவசாயி சின்னங்களை வரைந்து தேர்தல் ஆணையத்திடம் சமர்ப்பித்தோம். ஆனால், இதுகுறித்து பரிசீலனை செய்து அறிவிக்க காலதாமதம் ஆகும் என ஆணையம் தரப்பில் தெரிவிக்கப்பட்டது.
இந்த நிலையில் ஏற்கெனவே நாங்கள் போட்டியிட்ட ஒலிவாங்கி (மைக்) சின்னத்தை, ஈரோடு கிழக்கு தொகுதி இடைத்தேர்தலுக்கு மட்டும் பயன்படுத்திக் கொள்ள முடிவு செய்துள்ளோம். 2026 சட்டசபை பொதுத்தேர்தலின்போது விவசாயி சின்னத்தை பெற்று, அதனையே எங்கள் கட்சியின் நிரந்தர சின்னமாக பயன்படுத்த முடிவு செய்துள்ளோம். இவ்வாறு அவர் தெரிவித்தார்.
