பிக் பாஸ் சீசன் 8 நிகழ்ச்சி இன்று (செப். 6) கோலாகலமாகத் தொடங்கியது.
இதுவரை 7 சீசன்களை நடிகர் கமல் ஹாசன் தொகுத்து வழங்கிய நிலையில், பிக் பாஸ் சீசன் 8-ஐ நடிகர் விஜய் சேதுபதி தொகுத்து வழங்குகிறார்.
மாறுபட்டத் தோற்றத்தில் மிகவும் இயல்பான தனது பாணியில் நிகழ்ச்சியைத் தொகுத்து வழங்கினார்.
100 நாள்கள் நடைபெறும் பிக் பாஸ் போட்டியில், முதல் நாளான இன்று போட்டியாளர்களை அறிமுகம் செய்யப்பட்டனர்.
நிகழ்ச்சியில் கலந்துகொள்ளவுள்ள போட்டியாளர்கள் ஒவ்வொருவராக விஜய் சேதுபதி அறிமுகம் செய்து வைத்து பிக் பாஸ் வீட்டிற்குள் அனுப்பிவைத்தார்.
பிக் பாஸ் போட்டியாளர்கள்
தயாரிப்பாளர் ரவீந்தர்
இவர் தமிழ்த் திரைப்பட தயாரிப்பாளர். நளனும் நந்தினியும், சுட்டக் கதை உள்ளிட்ட படங்களைத் தயாரித்துள்ளார். தயாரிப்பாளராக பலருக்கும் பரீட்சையமாகி இருந்தாலும் பிக் பாஸ் நிகழ்ச்சியை ஒவ்வொரு சீசனிலும் விமர்சித்து வந்ததன் மூலம் பிரபலமானவர்.
சஞ்சனா
நடிகர் விஜய் சேதுபதி நடிப்பில் வெளியான மகாராஜா திரைப்படத்தில் அவருக்கு மகளாக நடித்தவர் சஞ்சனா. தற்போது பிக் பாஸ் நிகழ்ச்சியில் கலந்துகொண்டுள்ளார். நடிப்பின் மீது ஆர்வம் கொண்டவர்.
தர்ஷா குப்தா
முள்ளும் மலரும், செந்தூரப்பூவே உள்ளிட்ட தொடர்களில் நடித்து புகழ் பெற்றவர். பின்னர் ருத்ர தாண்டவம் படத்தில் நாயகியாகவும் நடித்தார். விஜய் தொலைக்காட்சியில் ஒளிபரப்பான குக் வித் கோமாளி நிகழ்ச்சியில் கலந்துகொண்டவர். கடந்த சீசனிலேயே இவர் போட்டியாளராக வரவுள்ளதாகக் கூறப்பட்டது.
சத்யா
சின்னத்திரை நடிகர் சத்யா, விஜய் தொலைக்காட்சியின் பனிவிழும் மலர் வனம் தொடரில் நடித்தவர். ஜீ தமிழின் அண்ணா தொடரில் நடித்து வந்தார். பிக் பாஸ் நிகழ்ச்சிக்காக அதிலிருந்து விலகியுள்ளார். பிக் பாஸ் நிகழ்ச்சியின் முன்னாள் போட்டியாளர் ரம்யாவின் கணவர். சின்னத்திரையில் பல சிறிய பாத்திரங்களில் நடித்து கவனம் பெற்றவர்.
தீபக்
தமிழும் சரஸ்வதியும் தொடரில் பலரும் அறிந்த முகம்தான் தீபக். சன் தொலைக்காட்சியில் தென்றல் தொடரில் நாயகனாகவும் நடித்தவர். ஆரம்பக்கட்டத்தில் விஜய் தொலைக்காட்சியில் தொகுப்பாளராக இருந்தவர்.
இதையும் படிக்க | சொல்லப் போனால்… மகளிரால் மட்டுமே முடியும்!
விஜே ஆனந்தி
ரேடியோ நிகழ்ச்சித் தொகுப்பாளர் ஆனந்தி. சில திரைப்படங்களில் நடித்துள்ளார். தி புக் ஷோ என்ற பெயரில் யூடியூபில் புத்தக விமர்சனங்களை செய்து பிரபலமானவர்.
சுனிதா
விஜய் டிவியில் குக் வித் கோமாளி நிகழ்ச்சியில் கோமாளியாக கலக்கிக் கொண்டிருந்தவர் சுனிதா. தற்போது பிக் பாஸ் நிகழ்ச்சிக்குச் சென்றுள்ளார். இதற்கு முன்பு விஜய் தொலைக்காட்சியின் நடன நிகழ்ச்சிகளில் போட்டியாளராகப் பங்கேற்றவர். தொழில்முறை நடனக் கலைஞர். இவர் அஸ்ஸாமைச் சேர்ந்தவர் என்பது குறிப்பிடத்தக்கது. இவரின் கொஞ்சும் தமிழுக்கு ரசிகர்கள் ஏராளம்.
கானா ஜெப்ரி: பிக் பாஸ் நிகழ்ச்சியில் ஒவ்வொரு சீசனிலும் ஒரு கானா பாடகர் கலந்து கொள்வார். அந்த வரிசையில் கானா ஜெப்ரி இந்த நிகழ்ச்சியில் கலந்து கொண்டுள்ளார். கானா பாடல்களை எழுதுவதும் பாடுவதும் இவரின் பொழுதுபோக்கு. அதனையே தற்போது வாழ்க்கையாகக் கொண்டுள்ளார். இசைத்துறையில் அங்கீகாரம் பெறும் வகையிலான வாய்ப்புக்காக, பிக் பாஸ் நிகழ்ச்சிக்கு வந்துள்ளார்.
ரஞ்சித்
திரைப்பட நடிகர் ரஞ்சித். இவர் இயக்குநரும் கூட. சமீபத்தில் கவுண்டம்பாளையம் என்ற திரைப்படத்தை எழுதி இயக்கி நடித்திருந்தார். விஜய் தொலைக்காட்சியில் பாக்கியலட்சுமி தொடரில் நடித்துவந்தார். தற்போது பிக் பாஸ் நிகழ்ச்சியில் கலந்துகொண்டுள்ளார்.
செளந்தர்யா நஞ்சுண்டன்
பெங்களூருவில் பிறந்தவர். சென்னையில் வளர்ந்தவர். குறும்படங்களில் நடித்தவர்.
அதன்மூலம் சினிமாவில் சின்ன சின்ன பாத்திரங்கள் செய்தார். பேஷன் டிசைனிங், மாடலிங் துறையில் சிறு வயதிலிருந்தே ஆர்வம் இருந்ததால், சினிமாவில் சாதிக்க வேண்டும் என்பதே இவரின் கனவு.
அருண் பிரசாத்
பாரதி கண்ணம்மா தொடரின் நாயகன். கல்லூரி நாள்கள் முதலே குறும்படங்களில் நடித்தவர். 50க்கும் அதிகமான குறும்படங்களில் நடித்தவர். அதன் விளைவாக ஒரு திரைப்படத்தில் மேயாத மான், ஜடா ஆகிய படங்களில் நடித்துள்ளார். அதன் பிறகு வாய்ப்புகளின்றி இருந்தவர், பாரதி கண்ணம்மா தொடரின் மூலம் தனக்கான ரசிகர் பட்டாளத்தைப் பெற்றுள்ளார்.
தர்ஷிகா
பொறியியல் படித்துள்ளார். மீடியா மீது மிகுந்த ஆர்வம் இருந்ததால், தொகுப்பாளரானார். பின்னர் சின்னத்திரையில் சிறிய வேடங்களில் நடித்துள்ளார். தற்போது தொடர்களின் 2வது கதாநாயகியாக நடித்து வருகிறார். நடனத்தின் மீது மிகுந்த ஆர்வம் கொண்டனர். முறைப்படி நடனம் பயின்றவர்.
விஜே விஷால்
பாகியலட்சுமி தொடரில் நடித்து மக்களின் கவனம் பெற்றவர் நடிகர் வி.ஜே. விஷால்.
குடும்ப சூழல் காரணமாக பொறியியல் படிக்க முடியாமல் நிகழ்ச்சிகளைத் தொகுத்து வழங்கினார்.
முத்துக்குமரன்
விஜய் தொலைக்காட்சியின் தமிழ் பேச்சு எங்கள் மூச்சு என்ற நிகழ்ச்சியில் கலந்துகொண்டு பேசியதன் மூலம் பலரின் கவனத்தை ஈர்த்தவர் முத்துக்குமரன். நிகழ்ச்சித் தொகுப்பாளர். பல்வேறு அரசியல், சினிமா, பொழுதுபோக்கு நிகழ்ச்சிகளைத் தொகுத்து வழங்கியுள்ளார். சமூக பிரச்னைகள் குறித்து விழிப்புணர்வு ஏற்படுத்தும் வகையில் பேசி விடியோக்களை வெளியிடுவதை வாடிக்கையாகக் கொண்டவர்.
ஜாக்குலின்
சின்னத்திரை நிகழ்ச்சித் தொகுப்பாளர் ஜாக்குலின். விஜய் தொலைக்காட்சியில் கலக்கப்போவது யாரு என்ற நிகழ்ச்சியைத் தொகுத்து வழங்கியதன் மூலம் பிரபலமானவர். தேன்மொழி தொடரில் நாயகியாக நடித்தவர். கோலமாவு கோகிலா திரைப்படத்தில் நயன்தாராவுக்கு தங்கையாக நடித்திருந்தார்.
