சென்னை: ஸ்ரீபெரும்புதூர் ஜீயர் குறித்து சமூக வலைதளங்களில் அவதூறு பரப்பியதாக கைது செய்யப்பட்ட ஸ்ரீரங்கம் ரங்கராஜன் வரும் 24-ம் தேதி வரை நீதிமன்ற காவலில் சிறையில் அடைக்கப்பட்டார்.
இதுகுறித்து போலீஸ் தரப்பில் கூறப்படுவதாவது: திருச்சி ஸ்ரீரங்கத்தை சேர்ந்தவர் ரங்கராஜன் நரசிம்மன். இவர் அவரது கருத்துகளை முன்வைத்து வீடியோ வெளியிடுவதை வழக்கமாக கொண்டுள்ளார். அந்த வகையில் கடந்த வாரம் யூடியூப் சேனலில் வீடியோ ஒன்றை வெளியிட்டிருந்தார். அதில், ஸ்ரீபெரும்புதூர் ஜீயர் சுவாமிகள் குறித்து விமர்சித்ததாக கூறப்படுகிறது.
இதையடுத்து, உண்மைக்கு புறம்பாக தன்னைப் பற்றி அவதூறாக திரித்து புனையப்பட்ட உரையாடலை சமூக வலைதளத்தில் பதிவிட்ட ஸ்ரீரங்கம் ரங்கராஜன் மீது நடவடிக்கை எடுக்குமாறு சென்னை காவல் ஆணையர் அலுவலகத்துக்கு ஆன்லைன் வாயிலாக ஸ்ரீபெரும்புதூர் ஜீயர் சுவாமிகள் தரப்பில் புகார் அளிக்கப்பட்டது. காவல் ஆணையர் அருண் உத்தரவின்பேரில், மத்திய குற்றப்பிரிவு சைபர் க்ரைம் போலீஸார் இதுகுறித்து விசாரித்தனர்.
இதையடுத்து, புகாருக்குள்ளான ஸ்ரீரங்கம் ரங்கராஜன் மீது 5 பிரிவுகளின் கீழ் வழக்கு பதிவு செய்யப்பட்டது. தொடர்ந்து, நேற்று முன்தினம் ஸ்ரீரங்கத்தில் உள்ள அவரது வீட்டில் ரங்கராஜனை சென்னை சைபர் க்ரைம் போலீஸார் கைது செய்தனர். பின்னர் அவரை சென்னை அழைத்து வந்து விசாரித்தனர். இதன் தொடர்ச்சியாக ஸ்ரீரங்கம் ரங்கராஜனை எழும்பூர் நீதிமன்றத்தில் நேற்று ஆஜர்படுத்தினர்.
அவரை வரும் 24-ம் தேதி வரை நீதிமன்ற காவலில் சிறையில் அடைக்க நீதிமன்றம் உத்தரவிட்டது. இதையடுத்து, அவர் புழல் சிறையில் அடைக்கப்பட்டார். இதுஒருபுறம் இருக்க ஸ்ரீரங்கம் ரங்கராஜன் வீட்டில் சைபர் க்ரைம் போலீஸார் நேற்று சோதனை மேற்கொண்டனர் என்பது குறிப்பிடத்தக்கது.
