2024 ஆம் ஆண்டு உலகின் பல்வேறு பகுதிகளைச் சேர்ந்த தனிநபர்கள் மற்றும் சமூகங்களின் திறன்களை வெளிப்படுத்தும் சிறந்த சாதனைகள் கின்னஸ் உலக சாதனைகளில் இடம்பிடித்துள்ளது. 2024-ஆம் ஆண்டின் கின்னஸ் உலக சாதனைகளுக்கான கருப்பொருள், மனித படைப்பாற்றல் மற்றும் நெகிழ்சித்தன்மையை தூண்டும் மற்ற சாதனைகளை முறியடிக்கும் சாதனைகளுடன், சுற்றுச்சூழல் விழிப்புணர்வை ஏற்படுத்துவதையும் முக்கிய நோக்கமாக கொண்டிருந்தது. அத்தகைய, 2024 சாதனை பட்டியலில் இடம்பிடித்த குறிப்பிடத்தக்க பதிவுகள் இங்கே தொகுக்கப்பட்டுள்ளது.
உக்ரைனைச் சேர்ந்த அலியா நசிரோவா, உயிருடன் இருப்பவர்களில் உலகின் மிக நீளமான முடி கொண்ட நபர் என்ற சாதனையைப் படைத்துள்ளார். இவரது முடியின் நீளம் 257.33 செ.மீ. என்பது குறிப்பிடத்தக்கது. இப்போது ஸ்லோவாக்கியாவில் வசிக்கும் அலியா, இதுவரை சரியான ஹேர்கட் எதுவும் செய்யவில்லை, வாரத்திற்கு ஒருமுறை கூந்தலைப் பராமரிக்கிறார், முடியை கழுவுவதற்காக மட்டும் வாரத்தில் ஒருமுறை பல மணிநேரத்தை செலவிடுகிறார்.
கனடாவைச் சேர்ந்த வயதான பெண்மணியான டோனாஜீன் வைல்ட் தொடர்ந்து 4 மணி நேரம் 30 நிமிடங்களுக்கு தசைகளை வலுப்படுத்தும் முக்கிய பயிற்சியில் ஈடுபட்டு சாதனை படைத்துள்ளார். இந்த சிக்கலான பயிற்சியில் அவரது விடாமுயற்சி அங்குள்ள பலரை ஊக்கப்படுத்தியுள்ளது.
ஆஸ்திரேலியாவில் கோஸ்டா குழுமத்தால் வளர்க்கப்பட்ட 20.4 கிராம் எடையுள்ள புளூபெர்ரி, உலகின் மிகவும் கனமான புளூபெர்ரி என உறுதிப்படுத்தப்பட்டது. இந்த புளுபெர்ரி சராசரி காட்டு புளூபெர்ரியை விட கிட்டத்தட்ட 70 மடங்கு கனமானது மற்றும் இது வளர ஒரு வருடம் எடுத்துக்கொண்டது.
எவரெஸ்ட் சிகரத்தை அடைந்த, முதல் பல உடல் உறுப்புகளை இழந்த நபராக இத்தாலியைச் சேர்ந்த ஆண்ட்ரியா லான்ஃப்ரி இடம்பிடித்துள்ளார். லான்ஃப்ரி ஒரு பயங்கரமான நோயின் காரணமாக, கையில் ஏழு விரல்களையும், முழங்காலுக்கு கீழே இரண்டு கால்களையும் இழந்துள்ளார். இது நம்பமுடியாத உறுதியான செயலாகவும், செங்குத்தான பனி மற்றும் பாறையின் மீது மனிதன் நிகழ்த்திய தனித்துவமான வெற்றியாகவும் கருதப்படுகிறது.
17 செமீ அல்லது 6.69 அங்குலம் என சுற்றளவில் மிகப்பெரிய நாக்கை கொண்ட நபராக பெல்ஜியத்தைச் சேர்ந்த சாச்சா ஃபைனர் உலக சாதனை நிகழ்த்தியுள்ளார். அதே சமயம், 13.25 செமீ அல்லது 5.21 அங்குலத்துடன் மிகப்பெரிய நாக்கை கொண்ட பெண்மணியாக அமெரிக்காவைச் சேர்ந்த ஜென்னி டுவாண்டர் சாதனை படைத்துள்ளார். இருவரும், பொதுமக்களை ஆச்சரியப்படுத்தும் அசாதாரண உடல் திறன்களை வெளிப்படுத்தியுள்ளனர்.
கிரேட் டேனின், அயோவா நாய் இனமான கெவின் மிக உயரமான நாய் என்ற சாதனையை நிகழ்த்தியுள்ளது. இந்த பட்டத்தை பெற்ற சிறிது நேரத்திலேயே அந்த நாய் இறந்தும் போனது. கெவின் 0.97 மீ (3 அடி 2 அங்குலம்) உயரமான ஆண் நாயாக இருந்தது. அது ஒரு “மென்மையான ராட்சதன்” என்று அதன் நினைவை பகிர்ந்த அவரது உரிமையாளர் விவரித்துள்ளார்.
அயோத்தியில் 2024-ஆம் ஆண்டு நடைபெற்ற தீபோத்சவ் விழாவில், 2.5 மில்லியனுக்கும் அதிகமான தீபங்கள் ஏற்றி, அதிக எண்ணிக்கையிலான எண்ணெய் விளக்குகளை ஏற்றி புதிய உலக சாதனை படைக்கப்பட்டது.
உலகளவில் பல இடங்களைச் சேர்ந்த 4,916 பங்கேற்பாளர்களுடன், ஹெர்பாலைஃப் மிகப்பெரிய அதி-தீவிர இடைவெளி பயிற்சி வகுப்பை நடத்தி புதிய சாதனையை படைத்தது.
December 20, 2024 3:42 PM IST
