Doctor Vikatan: என்னுடைய உறவினர் ஒருவர், தினமும் கோதுமைப் புல் ஜூஸ் குடிப்பதைப் பல வருடங்களாகப் பின்பற்றுகிறார். கோதுமைப்புல் ஜூஸ் குடித்தால் புற்றுநோய் ரிஸ்க் குறையும், உடல் எடை குறையும் என்கிறார்… அது உண்மையா… எல்லோரும், தினமும் குடிக்கலாமா?
பதில் சொல்கிறார் திருப்பத்தூரைச் சேர்ந்த அரசு சித்த மருத்துவர் விக்ரம்குமார்
கோதுமைப்புல் சாறு குடிப்பதால் புற்றுநோய் அபாயம் குறையும் என்று நாம் நேரடியாகச் சொல்லிவிட முடியாது. இதில் அதிகப்படியான நார்ச்சத்து இருப்பதால், உடலில் உள்ள கழிவுகளை வெளியேற்ற பெரிதும் உதவுகிறது. இதனைத் தொடர்ந்து குடிப்பதன் மூலம் மலச்சிக்கல் (Constipation) பிரச்னையைத் தவிர்க்கலாம்.
உடலில் உள்ள கழிவுகளை வெளியேற்றும் என்ற அடிப்படையில் பார்த்தால், இது உடலுக்கு மிகவும் நல்லது. கோதுமைப்புல் சாற்றை உங்கள் உறவினர் போல தினமும் எடுத்துக்கொள்ள வேண்டியதில்லை. மூலிகை மருந்து போல பெரிய அளவில் எடுத்துக்கொள்ள வேண்டிய அவசியமும் இல்லை என்றாலும், அவ்வப்போது குடிக்கலாம். பக்க விளைவுகளை ஏற்படுத்தாது.
இதில் நார்ச்சத்து மற்றும் உடலுக்குத் தேவையான சில நுண்ணூட்டச்சத்துகள் (Micronutrients) இருப்பதால், இது ஆரோக்கியத்திற்கு நல்லது. கோதுமைப்புல் சாறு புற்றுநோய்க்கான தாக்கத்தை குறைக்கும் என்பது குறித்து இதுவரை பெரிய அளவில் ஆய்வுபூர்வமான ஆதாரங்கள் ஏதுமில்லை.
கோதுமைப்புல் சாறு குடிப்பதால் உடல் எடை குறையும் (Weight loss) என்பது முற்றிலும் தவறான ஒரு கருத்து. எந்தவொரு குறிப்பிட்ட மூலிகைச் சாறோ அல்லது உணவுப்பொருளோ மட்டும் உடல் எடையைக் குறைத்துவிடாது. கோதுமைப்புல் சாற்றைத் தொடர்ந்து குடித்தால் மட்டும் நிச்சயமாக உடல் எடை குறைய வாய்ப்பில்லை. உடல் எடையைக் குறைக்க வேண்டுமென்றால், அதனுடன் சேர்த்து சரியான உணவுக் கட்டுப்பாடு (Diet control), ஆரோக்கியமான வாழ்க்கை முறை, யோகா, நடைப்பயிற்சி மற்றும் உடற்பயிற்சிகள் போன்றவையும் பின்பற்றப்பட வேண்டும். எடைக்குறைப்பிற்கான ‘மேஜிகல் ரெமிடி’ (Magical remedy) போல எந்த ஒரு பொருளும் செயல்படாது என்பதைப் புரிந்துகொள்ள வேண்டும்.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
