புதுடெல்லி,ஜன.28-
டெல்லி சட்டமன்றத் தேர்தல் வாக்குப்பதிவு பிப்ரவரி 5- ந்தேதியும் வாக்கு எண்ணிக்கை பிப்ரவரி 8-&ந்தேதியும் நடைபெற உள்ளது. மொத்தம் உள்ள 70 தொகுதிகளில் 36 இடங்களை வெல்லும் கட்சி, டெல்லி சட்டமன்றத்தைக் கைப்பற்றி, ஆட்சியமைக்கும்.
டெல்லிசட்டசபையை தொடர்ந்து 3&வது முறையும் கைப்பற்றி ஆட்சி அமைக்க ஆம் ஆத்மி துடித்து வருகிறது. மேலும் கடந்த 27 ஆண்டுகளாக ஆட்சியைப் பிடிக்க முடியாமல் போராடும் பா.ஜ.க, கடந்த 2013- ம் ஆண்டுக்கு பிறகு வாஷ்அவுட்டான காங்கிரஸ் என மூன்று முக்கியக் கட்சிகளும் வரிந்து கட்டி களத்தில் இறங்கி உள்ளது. மதுபான ஊழல் ஆம் ஆத்மி கட்சிக்கு பெரிய தலைவலியாக உள்ளது.இந்த நிலையில் பட்பர்கஞ்ச் சட்டமன்றத் தொகுதியில் நடந்த பொதுக் கூட்டத்தில் காங்கிரஸ் எம்.பி. ராகுல்காந்தி பங்கேற்று பேசினார். அப்போது அவர் ஆம்ஆத்மி கட்சியை கடுமையாக சாடி பேசினார்.கூட்டத்தில் ராகுல் பேசியதாவது:-
முன்னர் பட்பர்கஞ்ச் தொகுதியில் ஆம் ஆத்மி வேட்பாளராக இருந்த மணீஷ் சிசோடியா, அரவிந்த் கெஜ்ரிவாலுடன் சேர்ந்து மதுபான ஊழல் செய்தார். அவர் இங்கு அதிகமான ஊழல் செய்து உள்ளார் .அதனால் தான் மனிஷ் சிசோடியாக பயந்து இந்த இடத்தை விட்டு ஓடிவிட்டார். எனவே நீங்கள் அனில் சவுத்ரிக்கு வாக்களிக்க வேண்டும்.
கெஜ்ரிவால் தனது மனதில் தோன்றும் எதையும் சொல்வார்.அவர் வரும்போது, அவரிடம் ஒரு சிறிய கார் இருந்தது, புதிய வகையான அரசியலைச் செய்வேன் என்று கூறியிருந்தார். டெல்லியை மாற்றுவேன் என்றும் அவர் கூறினார், ஆனால் ஏழை மக்களுக்கு தேவைப்படும்போது, அவர் அங்கு இல்லை, கலவரம் நடந்தபோது அவர் அங்கு இல்லை. அவர் சுத்தமான அரசியல் செய்வேன் என்று கூறினார், ஆனால் டெல்லியில், மிகப்பெரிய மதுபான ஊழல் நடந்தது, நீங்கள் அவரது வீட்டின் புகைப்படத்தைப் பார்த்திருப்பீர்கள்.கெஜ்ரிவால் ‘ஷீஷ் மஹால்’ என்ற அரண்மனையில் தங்கி உள்ளார். இதுதான் உண்மை.
இந்தியாவின் செல்வத்தை கோடீஸ்வரர்களிடம் ஒப்படைக்க நரேந்திரமோடி விரும்புகிறார்.அவர்கள் உங்களிடையே மோதலை உருவாக்கி உங்கள் செல்வத்தை கோடீஸ்வரர்களுக்கு கொடுக்கிறார்.அந்த நிறுவனங்கள் அதானிக்கு சொந்தமானவை என்றாலும் அவை மோடியால் கட்டுப்படுத்தப்படுகின்றன.
அம்பேத்கரின் அரசியலமைப்பைப் பாதுகாப்பதற்காக இன்று போராட்டம் நடத்திக்கொண்டு இருக்கிறோம்.மோகன் பகவத், 1947 ஆகஸ்ட் 15 அன்று நமக்கு சுதந்திரம் கிடைக்கவில்லை என்று கூறினார். அவரது அறிக்கை நமது அரசியலமைப்பை அவமதிப்பதாகும்.
ராமர் கோவில் கும்பாபிஷேக நிகழ்ச்சியில் அம்பானி-,அதானி போன்ற கோடீஸ்வரர்கள் காணப்பட்டனர், ஆனால் நமது பழங்குடியின ஜனாதிபதி ராமர் கோவில் நிகழ்ச்சியில் கலந்து கொள்ள அனுமதிக்கப்படவில்லை. புதிய நாடாளுமன்றத்தின் தொடக்க விழாவில் கலந்து கொள்ளக் கூட ஜனாதிபதிக்கு அனுமதி மறுக்கப்பட்டது.
நரேந்திர மோடி கோடீஸ்வரர்கள் நிறைந்த இந்தியாவை விரும்புகிறார், அதே நேரத்தில் அரசியலமைப்புச் சட்டம் ஒவ்வொரு குடிமகனும் சமம் என்று கூறுகிறது. நாட்டின் அனைத்து செல்வங்களும் ஒரு கோடீஸ்வரரின் கைகளில் இருக்க வேண்டும் என்று அரசியலமைப்பில் எங்கும் எழுதப்படவில்லை. அவர்களின் நோக்கம் மக்களிடம் பயத்தைப் பரப்புவது மட்டுமே.
இவ்வாறு ராகுல்காந்தி பேசினார்.
