இத்தனை வாரங்களா, ’70-கள்ல தமிழ் சினிமா எத்தனையோ பேரழகிகளை, நடிப்பில் உச்சம்தொட்ட திறமையான நடிகைகளைப் பார்த்திருக்கு’ன்னுதான் இந்தத் தொடரை ஆரம்பிப்போம். ஆனா, இந்த வாரம் நாம எழுதப்போற நடிகை ஓர் அழகான விதிவிலக்கு. 70-களோட மத்தியில ஆரம்பிச்சு 80-கள், 90-கள் வரைக்கும் தொடர்ந்து 20 வருஷம், அழகு, நடிப்பு, டான்ஸ், ஸ்டைல், கிளாமர்னு எல்லாத்துலேயும் ஒரு பெஞ்ச் மார்க் செட் பண்ணி, கோலிவுட்ல ஆரம்பிச்சு பாலிவுட் வரைக்கும் ரூல் பண்ண நடிகை ஸ்ரீதேவியோட பர்சனலை தான் இன்னிக்கு தெரிஞ்சுக்கப்போறீங்க..!
ஸ்ரீதேவி, அவங்கப்பா வழியில சிவகாசி, அனுப்பன்குளம் நகராட்சியில இருக்கிற மீனம்பட்டி கிராமத்தைச் சேர்ந்த பொண்ணு. அப்பாஅய்யப்பன் சட்டக் கல்லூரில படிக்கிறதுக்காக சென்னை வந்திருக்கிறார். வந்த இடத்துல, சினிமா ஹீரோயின் கனவோட சின்னச்சின்ன ரோல் மற்றும் டான்ஸ் பண்ணிக்கிட்டிருந்த ராஜேஸ்வரியை லவ் மேரேஜ் பண்ணிக்கிட்டார். ராஜேஸ்வரியோட பூர்வீகம் ஆந்திரா. இந்தத் தம்பதிக்கு, ஸ்ரீ அம்மா, ஸ்ரீலதான்னு ரெண்டு பெண் குழந்தைங்க பிறக்கிறாங்க. ஸ்ரீ அம்மாதான், பின்னாள்ல நடிகை ஸ்ரீதேவியா இந்தியத் திரையுலகை ஆண்டவங்க.
