“ஆரம்பத்திலேயே நாங்கள் ஒரு தெளிவான முடிவை எடுத்தோம்: “பெரிய கனவுகளைப் பேசுவதற்கு முன், இந்த மாடல் உண்மையில் வேலை செய்கிறதா என்பதை நாங்களே நிரூபிக்க வேண்டும்.” அதனால் Sprint6 முழுக்க முழுக்க சுயமுதலீட்டில் தொடங்கப்பட்டது.
அது வெறும் சொல்லல்ல. என் கடைசி மாத சம்பளம், முந்தைய நிறுவனத்தில் இருந்து வெளியேறும் போது கிடைத்த ஊழியர் வருங்கால வைப்பு நிதி மற்றும் பணிக்கொடை, மேலும் அம்மாவும், என் தங்கையும் தங்கள் நகைகளை அடகு வைத்து கிடைத்த பணம் — இந்த அனைத்தையும் சேர்த்துதான் Sprint6-ன் முதல் முதலீடு உருவானது. அதன் மூலம், ஒரு முன்னோடி திட்டத்தைத் தொடங்கினோம்.
முதலில் பெரிய முதலீட்டைத் தேடாமல், நாங்கள் எங்களுக்கே சில கடினமான கேள்விகளை வைத்தோம்:
• பராமரிப்பு உண்மையில் சாத்தியமா?
• செலவுகளைக் கட்டுப்படுத்த முடியுமா?
• வருவாய் தொடர்ச்சியாக வருமா?
இந்த கேள்விகளுக்கு விளக்கக்காட்சியில் அல்ல, நிஜ தரவுகளுடன் பதில் கிடைக்க வேண்டும் என்பதே எங்கள் அணுகுமுறை.
முதல் நிலை முடிந்தபிறகு, இந்த மாடல் ஒரு “யோசனை” அல்ல, நிலத்தில் வேலை செய்யும் நிரூபிக்கப்பட்ட முறை என்பதை நாங்கள் காட்டியிருந்தோம். அதற்குப் பிறகுதான் StartupTN-ஐ அணுகினோம்.
அங்கு StartupTN எழுப்பிய கேள்வி மிக முக்கியமானது
• இது பெருநிறுவன சமூகப் பொறுப்பு முயற்சியா(CSR), அல்லது உண்மையான வருவாய் மாடலா?
• இணையவழி இணைப்பு சாதனங்கள், செயற்கை நுண்ணறிவு போன்ற தொழில்நுட்பங்கள் அவசியமா? அவை லாப விகிதத்தைப் பாதிக்குமா?
