நவராத்திரி விழாவின் முக்கிய நிகழ்வுகளில் ஒன்றான ஆயுதபூஜையின்போது, தொழில் நிறுவனங்கள், அலுவலகங்கள், கடைகள் உள்ளிட்ட இடங்களில் பயன்படுத்தப்படும் இயந்திரங்கள் மற்றும் உபகரணங்களை சுத்தம் செய்து, அவற்றுக்கு பூஜை செய்து வழிபடுவது வழக்கம். அதேபோல், வீடுகளில் குழந்தைகளின் நோட்டுப் புத்தகங்களை வைத்து சரஸ்வதி தேவியை வழிபடுகின்றனர். இந்நிலையில், இந்த வழிபாட்டின்போது பொரி, அவல், நிலக்கடலை மற்றும் பழ வகைகள் படையலாக வைக்கப்படுகின்றன. இதில் பொரி முக்கிய இடம் பிடிப்பதால், ஆயுதபூஜையை முன்னிட்டு கரூரில் பொரி தயாரிக்கும் பணிகள் மும்முரமாக நடைபெற்று வருகின்றன. அனைத்து வகை அரிசிகளிலும் பொரி தயாரிக்க முடியாது.
இதற்காக ஆந்திரா, கர்நாடகா உள்ளிட்ட மாநிலங்களில் இருந்து ஐ.ஆர்.50, ஐ.ஆர்.64 ரக அரிசிகள் கொள்முதல் செய்யப்படுகின்றன. இந்த அரிசியை தண்ணீரில் ஊறவைத்து, உப்பு, நாட்டுச் சர்க்கரை உள்ளிட்ட பொருட்களைச் சேர்த்து உலர்த்துகின்றனர். பின்னர், உரிய பக்குவத்துக்கு ஏற்ப பதப்படுத்தப்பட்ட அரிசியை, விறகுகளைக் கொண்டு சூடாக்கப்படும் பிரத்யேக உலையில் இட்டு பொரியாகத் தயாரிக்கின்றனர்.
