இன்றைய செயற்கை நுண்ணறிவின்(AI) வளர்ச்சி வரும் காலங்களில் மக்களின் வாழ்க்கை முறையினை மாற்றக்கூடும் என்று அமேசான் நிறுவனர் ஜெஃப் பெசோஸ் தெரிவித்துள்ளது கவனத்தை பெற்றுள்ளது . AI வைத்து உற்பத்தி திறனை அதிகரிக்கும் செயல் மூலம், வரும் காலங்களில் சிலர் வாரத்தில் மூன்று நாள் மட்டும் வேலைக்கு சென்று குடும்பத்தை பராமரிக்கும் நிலை ஏற்படும் என்று அவர் கணித்துள்ளார்
தனியார் செய்தி நிகழ்ச்சியில் பேசிய அவர், AI தொழில்நுட்பமானது வேலைகளை வேகமாகவும் திறமையாகவும் செய்து முடிக்க உதவும் என்றதோடு மட்டும் அல்லாமல் இதன் மூலம் சில குடும்பங்களில் இருவர் சேர்ந்து வேலைக்கு செல்ல வேண்டிய தேவை குறையலாம் என்றும், ஒருவரின் வருமானத்திலேயே குடும்பத்தை நன்கு நடத்தும் சூழல் உருவாகலாம் என்றும் அவர் குறிப்பிட்டார்.
AI -யின் இந்த தீவிர வளர்ச்சியால் வேலைவாய்ப்புகள் குறையும் என்ற அச்சம் நிலவும் நிலையில், அதே தொழில்நுட்பத்தின் மூலம் உற்பத்தித்திறன் உயர்வதோடு , மக்கள் குறைவான நேரத்தில் வேலையை செய்து முடிக்கும் வாய்ப்பும் உருவாகலாம் என்பது பெசோஸின் பார்வை. மக்கள் ஒன்றுக்கும் மேற்பட்ட வேலைகளைச் செய்ய வேண்டிய கட்டாயம் குறையக்கூடும் என்றும் அவர் தெரிவித்துள்ளார்.
AI வளர்ச்சியால் எதிர்காலத்தில் வாரத்தில் மூன்று நாள் வேலை செய்யும் சூழல் உருவாகக்கூடும் என்பது ஜெஃப் பெசோஸின் கணிப்புதான் . இந்த மாற்றம் எப்போது நடைமுறைக்கு வரும் என்பது குறித்த காலக்கெடுவை அவர் குறிப்பிட்டுக் கூறவில்லை .
இந்த AI தொழில்நுட்பம் உண்மையில் வேலை நேரத்தைக் குறைக்குமா அல்லது வேலைவாய்ப்புகளில் புதிய சவால்களை மேலும் உருவாக்கக்கூடுமா என்பது, அதன் பயன்பாடு மற்றும் பொருளாதார மாற்றச் சூழலை பொறுத்தே அமையும்.
