அமெரிக்காவின் இரண்டாவது பெரிய நகரமான லாஸ் ஏஞ்சல்ஸின் மேயர் தேர்தலில் வெற்றி பெற்றிருக்கிறார் இந்திய வம்சாவளியைச் சேர்ந்த நித்யா ராமன் . தற்போதைய மேயர் கரேன் பாஸை தோற்கடித்து இந்த வெற்றியைப் பெற்றிருப்பதன் மூலம், அமெரிக்க அரசியலில் இந்திய வம்சாவளியினரின் பங்களிப்பை மீண்டும் கவனிக்க வைத்திருக்கிறார்.
மேயர் தேர்தலில் வெற்றி!
அமெரிக்காவின் கலிபோர்னியா மாகாணத்தில் உள்ள லாஸ் ஏஞ்சல்ஸ் நகர மேயர் தேர்தலில் போட்டியிட்ட நித்யா ராமன், தற்போதைய மேயர் கரேன் பாஸைத் தோற்கடித்திருக்கிறார். இதன் மூலம் அமெரிக்காவின் முக்கிய நகரங்களில் ஒன்றான லாஸ் ஏஞ்சல்ஸின் தலைமைப் பொறுப்பை ஏற்கவிருக்கிறார். நகரத்தின் வீடற்றோர் பிரச்னை, வீட்டு வசதி மற்றும் பொதுப் பாதுகாப்பு போன்றவற்றை மையமாகக் கொண்டு இவரது தேர்தல் பிரசாரம் அமைந்திருந்தது.
இந்தியப் பின்னணியும் கல்லூரி நாள்களும்…
இந்தியாவின் கேரளாவில் பிறந்தவர் நித்யா ராமன். தனது ஆறு வயதில் குடும்பத்துடன் அமெரிக்காவுக்குக் குடிபெயர்ந்தார். ஹார்வர்டு பல்கலைக்கழகத்தில் இளங்கலைப் பட்டமும், மாசசூசெட்ஸ் தொழில்நுட்பக் கழகத்தில் (MIT) நகர்ப்புறத் திட்டமிடல் தொடர்பான முதுகலைப் பட்டமும் பெற்றார். நகர்ப்புற வளர்ச்சி மற்றும் சமூகப் பிரச்னைகள் மீது ஆர்வம் கொண்ட இவர், பின்னர் சமூகப் பணிகளில் ஈடுபட்டார்.
சமூகப் பணியிலிருந்து அரசியலுக்கு!
லாஸ் ஏஞ்சல்ஸில் வீடற்ற மக்களுக்கு உதவும் பணிகளில் ஈடுபட்டார். அப்பகுதியில் உள்ள வீடற்றோர் பிரச்னைக்குத் தீர்வு காணும் நோக்கில் அண்டை வீட்டாருடன் இணைந்து தன்னார்வக் குழுவை உருவாக்கினார். பின்னர் 2020-ம் ஆண்டு நகர மன்றத் தேர்தலில் போட்டியிட்டு வெற்றி பெற்றார். வீட்டு வசதி, வாடகைதாரர்களின் உரிமைகள் உள்ளிட்ட பிரச்னைகளில் கவனம் செலுத்தினார்.
தொடர்ந்து மூன்று தேர்தல்களில் வெற்றி!
2020-ம் ஆண்டு லாஸ் ஏஞ்சல்ஸ் நகர மன்றத்தின் 4-வது மாவட்ட உறுப்பினராகத் தேர்ந்தெடுக்கப்பட்டார். 2024-ம் ஆண்டு மீண்டும் அதே பதவிக்குத் தேர்வானார். தற்போது 2026-ம் ஆண்டு மேயர் தேர்தலிலும் வெற்றி பெற்றுள்ளார். இதன் மூலம் தொடர்ந்து மூன்று தேர்தல்களில் வெற்றி பெற்று, நகரத்தின் தலைமைப் பொறுப்பை அடைந்திருக்கிறார்.
