நண்பனா… எதிரியா? விஜய்க்கு மோடி சொன்ன மெசேஜ்! – Kumudam

நேரம் பார்த்து காத்திருந்த பா.ஜ.க!

இப்படி அடுத்தடுத்து அதிகாரப் பதவிகளை கைப்பற்றி, தமிழகத்தில் வலுவான இடத்தை நோக்கி காங்கிரஸ் நகர்வதை பா.ஜ.க. ரசிக்கவில்லை. கடந்த ஐந்து மாதங்களில் மட்டும் தமிழகத்திலிருந்து இரண்டு ராஜ்யசபா எம்.பிக்களை பெற்று மாநிலங்களவையில் காங்கிரஸ் தன் பலத்தை கூட்டியிருப்பதையும் பாஜகவால் ஜீரணித்துக்கொள்ள முடியவில்லை.

இதனால் நேரம் பார்த்து த.வெ.க.வுக்கு பாடமெடுக்க காத்திருந்தது டெல்லி பா.ஜ.கூ அதற்கேற்ப, தென் மண்டல குழுக் கூட்டம் மத்திய உள்துறை அமைச்சர் அமித் ஷா தலைமையில் சென்னையை அடுத்த கோவளத்தில் கடந்த ஆகஸ்ட் 20ம் தேதி நடந்தது. இதற்காக, ஆகஸ்ட் 19ம் தேதி இரவு சென்னை வந்த அமித் ஷாவை அரை மணி நேரம் காத்திருந்து, மலர்க்கொத்து கொடுத்து வரவேற்றார் முதல்வர் விஜய். பிறகு அமித் ஷாவுக்கு ஸ்பெஷல் டின்னர் பாக்ஸ் ஒன்றையும் கொடுத்தார் விஜய். அதில் அமித் ஷாவுக்காக பிரத்யேகமாக வீட்டில் தயாரிக்கப்பட்ட உணவுகள் இடம்பெற்றிருந்தன.

முன்னதாக, தென் மண்டலக் குழுவின் தலைவராக அமித் ஷா இருக்கையில், துணைத் தலைவராக விஜய் நியமனம் செய்யப்பட்டுள்ளார். அதற்கு நன்றி தெரிவிப்பதற்காகவே அவர் நேரில் சென்று அமித் ஷாவுக்கு வரவேற்பு கொடுத்திருக்கிறார் என்று சொல்லப்பட்டாலும், இதன்பின்னால் ஆயிரம் அரசியல் காரணங்கள் ஒளிந்திருப்பதாகக் கூறப்படுகிறது.

விஜய்க்கு மோடி சொன்ன மெசேஜ்!

அன்று அமித் ஷாவை சந்தித்த போது, தயக்கத்துடனேயே விஜய் அவர் அருகில் அமர்ந்திருக்கிறார். அரசு நிர்வாகம் குறித்து அமித் ஷா கேட்ட சில கேள்விகளுக்கு ஒற்றை வரியில் பதில் அளித்திருக்கிறார் விஜய் பிறகுதான் அமித் ஷா மெல்ல தனது அரசியல் பேச்சை ஆரம்பித்தார் என்கிறார்கள். ‘காங்கிரஸ் இல்லாத இந்தியாவை உருவாக்க வேண்டும் என்பதுதான் எங்கள் லட்சியம். ஆனால், தமிழகத்தில் மாறி மாறி காங்கிரஸை தோளில் தூக்கி வைத்துக்கொள்கிறார்கள். இது ஏன் என தெரியவில்லை. முன்னாள் முதல்வர் ஜெயலலிதா பிரதமர் மோடியுடன் நெருங்கிய நட்பு வைத்திருந்தார். ஆனால், பா.ஜ.க.வுடன் அரசியல் கூட்டணி வைக்கவில்லை. அதை அவர் பல சூழல்களில் தெளிவுபடுத்தியும் இருக்கிறார்.

எனவே, நீங்களும் எங்களுடன் தேர்தல் கூட்டணி ஏற்படுத்திக்கொள்ள வேண்டிய அவசியம் இல்லை. அதே சமயத்தில் காங்கிரஸை மட்டும் கண்டுகொள்ள வேண்டாம். கூட்டணியில் இருந்து தள்ளி வையுங்கள். உங்களுக்குத் தேவையானதை நாங்கள் செய்கிறோம். காங்கிரஸுடன் தொடர வேண்டிய கட்டாயத்தில் இருந்தால், அது உங்கள் எதிர்காலத்தை பாதிக்கும். நீங்கள் எங்கள் நண்பனா, எதிரியா என்பதை நீங்களே முடிவு செய்துகொள்ளுங்கள்’ என பிரதமர் மோடி தரப்பிலிருந்து சொல்லப்பட்டதை அமித் ஷா ஷேர் செய்திருப்பதாக சொல்லப்படுகிறது.