ராஜஸ்தான் மாநிலம் ஜெய்ப்பூர் தெற்கு ஜோதி நகர் சத்யவிஹார் காலனியைச் சேர்ந்தவர் கணபத் சிங் பண்டாரி (90). ஓய்வுபெற்ற நீதிபதியான இவரைத் தொடர்புகொண்ட மர்ம நபர் ஒருவர், தான் சி.பி.ஐ அதிகாரி என அறிமுகப்படுத்திக் கொண்டு வாட்ஸ்அப் வீடியோ அழைப்பு மூலம் பேசினார். அப்போது, புல்வாமா பயங்கரவாத தாக்குதலுடன் தொடர்புடைய ரூ.50 கோடி ஹவாலா பணப்பரிவர்த்தனையில், கணபத் சிங்கின் வங்கிக் கணக்கிற்கு ரூ.40 லட்சம் வந்துள்ளதாகவும், இதனால் அவரை கைது செய்ய நேரிடும் எனக்கூறி, டிஜிட்டல் அரஸ்ட் செய்து மிரட்டினார். அடுத்த நாளே, ரிசர்வ் வங்கி மேலாளர் என்ற போர்வையில் மற்றொரு நபர் பேசி, வழக்கிலிருந்து தப்பிக்க வங்கிக் கணக்கு விவரங்களைத் தருமாறு கேட்டுள்ளார். அதிகாரிகள் என்ற போர்வையில் வந்த தொடர் மிரட்டல்களால் அச்சமடைந்த முன்னாள் நீதிபதி, தனது வங்கிக் கணக்கு விவரங்களை அவர்களிடம் அளித்ததுடன், அவர்கள் கூறியபடி ஆகஸ்ட் 6 முதல் 10 வரையிலான ஐந்து நாட்களில் 9 தவணைகளாக மொத்தம் ரூ.2.50 கோடியை பல்வேறு வங்கிக் கணக்குகளுக்கு அனுப்பி வைத்தார்.
இறுதியாக, தனது பி.பி.எஃப் கணக்கில் இருந்த பணத்தையும் எடுப்பதற்காக அவர் வங்கிக்குச் சென்றார் ஓய்வுபெற்ற நீதிபதி. அங்கு அவரது பதற்றமான நிலையைக் கண்டு சந்தேகமடைந்த வங்கி மேலாளர், காரணத்தைக் கேட்டறிந்தார். அவர் கூறிய காரணங்களை வைத்து சைபர் மோசடி வலையில் ஓய்வுபெற்ற நீதிபதி சிக்கியது தெரியவந்தது. வங்கி மேலாளரின் வழிகாட்டுதல்படி ஜோதி நகர் காவல் நிலையத்தில் புகார் அளிக்கப்பட்டு வழக்குப் பதிவு செய்யப்பட்டது. வழக்கை விசாரித்த ராஜஸ்தான் காவல்துறையினர், பறிக்கப்பட்ட பணத்தின் பரிவர்த்தனைகளைக் கண்காணித்தபோது, ரூ.2.50 கோடியில் ரூ.5 லட்சம் கேரளாவைச் சேர்ந்த ஒருவரது வங்கிக் கணக்கிற்குச் சென்றது தெரியவந்தது. உடனடியாக களமிறங்கிய ராஜஸ்தான் போலீஸ் குழு, எர்ணாகுளம் மத்திய காவல் உதவி ஆணையர் சிபி டாம் தலைமையிலான தனிப்படையின் உதவியை நாடியது.
