பா.ஜ.க முன்னாள் தேசிய மகளிரணி தலைவர் வானதி சீனிவாசன் வெளியிட்டுள்ள அறிக்கையில், “கோவை காரமடை தமிழக வெற்றிக் கழக ஒன்றியச் செயலாளர் கருப்பசாமி என்பவர் த.வெ.க பெண் ஊராட்சி செயலருக்கு பாலியல் தொந்தரவு அளித்ததாகவும், மேலும் கொலை மிரட்டல் மற்றும் சாதி வன்கொடுமை செய்வதாகவும் மாவட்ட ஆட்சியர், காவல் கண்காணிப்பாளரிடம் புகார் அளித்துள்ள செய்தியானது அதிர்ச்சி அளிக்கிறது. சொந்தக் கட்சிக்குள்ளேயே பெண்களை இது போன்ற வக்கிர புத்தியுடன் அணுகும் நபர்களைக் கொண்ட த.வெ.க தமிழகப் பெண்களுக்கு எப்படி பாதுகாப்பு அளிக்கப் போகிறது?
பிரச்சார மேடைகளில் ரெண்டே ரெண்டு பேருக்கு நடுவுல தான் போட்டியே என்று முதல்வர் விஜய் அவர்கள் பேசியதன் அர்த்தம் இப்போதுதான் தமிழக மக்களுக்கு தெரிய வந்திருக்கிறது. கடந்த கால தி.மு.க அரசு பெண்கள் பாதுகாப்பிலும் சட்டம் ஒழுங்கிலும் எப்படி திராணியற்ற அரசாக விளங்கியதோ அதையேதான் தற்போதைய த.வெ.க அரசும் ஒரு படி மேலே செய்து வருகிறது. தன்னை அண்ணா என அழைக்கும் உங்களின் சகோதரிகளாகிய தமிழ்நாட்டுப் பெண்களுக்கு உங்கள் சொந்த கட்சிக்குள்ளேயே பாதுகாப்பு இல்லை என்ற மோசமான நிலையில் தான் பெண்களின் பாதுகாப்பு இருக்கிறது. முதலமைச்சர் தனது கட்சிக்குள் பதவியைத் தவறாகப் பயன்படுத்தும் இது போன்ற நபர்கள் மீது கடும் நடவடிக்கை எடுக்க வேண்டும் என கேட்டுக் கொள்கிறேன்” எனத் தெரிவித்துள்ளார்.
