இன்று உலகமே கொண்டாடும் ஃபிஃபா உலகக் கோப்பை கால்பந்து தொடரின் முதல் அத்தியாயம், பல ஆச்சரியங்களும், சுவாரஸ்யங்களும், ஏன்… அச்சமூட்டும் சம்பவங்களும் நிறைந்தது.
நான்கு ஐரோப்பிய அணிகள் கப்பலில் பயணம் செய்து உருகுவேயை வந்தடைந்தது, இறுதிப் போட்டியில் இரு அணிகளும் தங்களது பந்தில்தான் விளையாட வேண்டும் என்று சண்டையிட்டது, துப்பாக்கிகளுடன் மைதானத்திற்குள் நுழைய முயன்ற ரசிகர்களைக் கண்டு நடுவர் அஞ்சியது, ஒற்றைக் கையுடன் விளையாடிய வீரர் கோல் அடித்தது என முதல் உலகக் கோப்பையின் கதை ஒரு சினிமாவுக்கு நிகரானது.
புதிய தொடரின் உதயம்!
சர்வதேச கால்பந்து போட்டிகளை நடத்தும் உரிமையை ஃபிஃபா 1904-ல் பெற்றிருந்தாலும், உலகக் கோப்பை என்ற யோசனை உயிர் பெற 1920-கள் வரை ஆனது. 1924 பாரிஸ் ஒலிம்பிக் போட்டிகளில் கால்பந்துக்குக் கிடைத்த மாபெரும் வரவேற்புதான் இதற்கான முதல் படி. அந்த ஒலிம்பிக்கின் இறுதிப் போட்டியில், உருகுவே அணி சுவிட்சர்லாந்தை வீழ்த்தியதை 40,000-க்கும் மேற்பட்ட ரசிகர்கள் கண்டு ரசித்தனர்.
தொழில்முறை லீக்குகளைக் கொண்ட பிரிட்டன் சங்கங்கள், அமெச்சூர் வீரர்கள் தொடர்பான விதிமுறைகளில் ஏற்பட்ட தகராறு காரணமாக ஒலிம்பிக்கில் பங்கேற்க மறுத்தன. அப்போதுதான், கால்பந்துக்கென ஒரு தனி சர்வதேச போட்டியின் அவசியம் உணரப்பட்டது. இதன் விளைவாக, 1928-ல் நான்காண்டுகளுக்கு ஒருமுறை உலகக் கோப்பை தொடரை நடத்த ஃபிஃபா முடிவு செய்தது.
ஏன் உருகுவே? சவாலான பயணம்!
1930-ம் ஆண்டு, அமெரிக்கப் பங்குச் சந்தை வீழ்ச்சிக்குப் சில மாதங்களுக்குப் பிறகு, முதல் உலகக் கோப்பை தொடர் ஜூலை 13 முதல் 30 வரை நடைபெற்றது. 1924 மற்றும் 1928 ஒலிம்பிக்கில் வென்ற தங்கப் பதக்கங்கள் மற்றும் நாட்டின் 100-வது சுதந்திர தினக் கொண்டாட்டங்கள் ஆகியவற்றை முன்வைத்து உருகுவே இந்தத் தொடரை நடத்தும் வாய்ப்பைப் பெற்றது. இதற்காக 90,000 பார்வையாளர்கள் அமரும் வசதி கொண்ட பிரம்மாண்டமான ‘எஸ்டாடியோ சென்டனாரியோ’ மைதானம் கட்டப்பட்டது. ஆனால், குளிர்கால மழையால் கட்டுமானப் பணிகள் தாமதமானதால், ஆரம்பத்தில் மாற்று மைதானங்கள் பயன்படுத்தப்பட்டன.
அனைத்து ஃபிஃபா உறுப்பு நாடுகளுக்கும் அழைப்புகள் அனுப்பப்பட்டன. ஆனால், அட்லாண்டிக் பெருங்கடலைக் கடந்து நீண்ட தூரம் கப்பலில் பயணிக்க வேண்டுமே என்ற தயக்கத்தில் பல ஐரோப்பிய நாடுகள் பின்வாங்கின. தொடருக்கு இரண்டு மாதங்களே இருந்த நிலையில், ஃபிஃபா தலைவர் ஜூல்ஸ் ரிமெட் தனிப்பட்ட முறையில் பேசி சில ஐரோப்பிய நாடுகளை சம்மதிக்க வைத்தார். இறுதியில், பிரான்ஸ், பெல்ஜியம், ருமேனியா மற்றும் யூகோஸ்லாவியா ஆகிய நான்கு ஐரோப்பிய அணிகள் மட்டுமே பங்கேற்றன.
உலகக் கோப்பையுடன் ஒரு கப்பல் பயணம்!
ஜூல்ஸ் ரிமெட், தனது சூட்கேஸில் உலகக் கோப்பையை வைத்துக்கொண்டு, மகள் மற்றும் மூன்று நடுவர்களுடன் பயணம் செய்தார். பிரான்ஸ், பெல்ஜியம், ருமேனியா அணிகள் புகழ்பெற்ற ‘கான்டே வெர்டே’ கப்பலில் பயணம் செய்தன. ருமேனியாவின் அணி, மன்னர் இரண்டாம் கரோலால் தனிப்பட்ட முறையில் தேர்ந்தெடுக்கப்பட்டது. இந்தக் கப்பல், பிரேசிலின் அணியையும் ஏற்றிக்கொண்டு ஜூலை 4-ம் தேதி மான்டிவீடியோவை அடைந்தது. “இருக்கைகள் மிகவும் அசௌகரியமாக இருந்தன. எங்கள் எலும்புகள் வலித்தன, ஆனால் இந்தப் பயணம் மதிப்புமிக்கது,” என்று ருமேனிய கேப்டன் ருடால்ஃப் வெட்சர் பின்னர் குறிப்பிட்டார்.
வரலாற்றுச் சிறப்புமிக்க இறுதிப்போட்டி!
மொத்தம் 13 அணிகள் நான்கு குழுக்களாகப் பிரிக்கப்பட்டு, லீக் சுற்றின் முடிவில் ஒவ்வொரு குழுவிலும் முதலிடம் பிடித்த அணிகள் அரையிறுதிக்கு முன்னேறின. பிரான்சின் லூசியன் லாரன்ட், மெக்சிகோவுக்கு எதிராக போட்டியின் 19-வது நிமிடத்தில் கோல் அடித்து, உலகக் கோப்பை வரலாற்றின் முதல் கோலை அடித்தவர் என்ற பெருமையைப் பெற்றார்.
அரையிறுதியில் அமெரிக்காவை 6-1 என்ற கோல் கணக்கில் அர்ஜென்டினாவும், அதே கோல் கணக்கில் யூகோஸ்லாவியாவை உருகுவேயும் வீழ்த்தி இறுதிப்போட்டிக்கு முன்னேறின. சுமார் 68,000 ரசிகர்கள் முன்னிலையில் நடந்த இறுதிப்போட்டி பெரும் பதற்றத்துடன் தொடங்கியது.
போட்டிக்கு முன்பாக, அடர்த்தியான பனிமூட்டம் காரணமாக அர்ஜென்டினாவின் பல ரசிகர்கள் படகுகளில் சிக்கிக்கொண்டனர். மேலும், மைதானத்திற்குள் நுழைந்த ரசிகர்களிடம் ஆயுதங்களைக் ஒப்படைக்குமாறு அறிவுறுத்தப்பட்டது.
போட்டி நடந்த மான்டிவீடியோ நகருக்கு அர்ஜென்டினாவிலிருந்து ரசிகர்கள் ரயில்களிலும், படகுகளிலும் படையெடுத்து வந்தனர். ஆனால், அவர்களை வரவேற்க போலீஸ் படை காத்திருந்தது. காரணம், ரசிகர்கள் விளையாட்டுப் பார்க்க மட்டும் வரவில்லை. போட்டிக்கு வந்த அர்ஜென்டினா ரசிகர்களிடம் சோதனை நடத்தியதில், சுமார் 1,500 முதல் 5,000 ரிவால்வர்கள் வரை பறிமுதல் செய்யப்பட்டதாக ஒரு தகவல் வெளியானது. கால்பந்துப் போட்டிக்குத் துப்பாக்கிகளுடன் வந்த ரசிகர்களைப் பார்த்து ஒட்டுமொத்த உலகமும் அதிர்ந்து போனது.
இதைக் கண்டு பீதியடைந்த பெல்ஜிய நடுவர் ஜான் லாங்கெனஸ், தனக்கு ஏதாவது ஆபத்து ஏற்பட்டால் தப்பிப்பதற்காக, துறைமுகத்தில் ஒரு படகைத் தயாராக வைத்திருக்க வேண்டும் என்று கோரிக்கை விடுத்தார்.
இறுதிப்போட்டியின் மற்றொரு சுவாரஸ்யம், பந்து குறித்த சர்ச்சை. அர்ஜென்டினா தாங்கள் கொண்டுவந்த பந்திலும், உருகுவே தங்கள் பந்திலும் விளையாட வேண்டும் எனப் பிடிவாதம் பிடித்தது. இறுதியில், முதல் பாதியில் அர்ஜென்டினாவின் பந்திலும், இரண்டாம் பாதியில் உருகுவேயின் பந்திலும் விளையாட நடுவர் சம்மதித்தார்.
ஒற்றைக் கையால் சரித்திரம் படைத்த வீரர்!
முதல் பாதியில் 2-1 எனப் பின்தங்கியிருந்த உருகுவே, இரண்டாம் பாதியில் எழுச்சி பெற்று 4-2 என்ற கோல் கணக்கில் அர்ஜென்டினாவை வீழ்த்தி முதல் உலகக் கோப்பை சாம்பியன் பட்டத்தை வென்றது.
போட்டியின் 89-வது நிமிடத்தில், உருகுவேயின் நான்காவது கோலை ஹெக்டர் காஸ்ட்ரோ அடித்தார். தனது 13-வது வயதில் மின்சார ரம்பத்தால் ஏற்பட்ட விபத்தில் தனது ஒரு கையின் பகுதியை இழந்தவர் இவர். அதனாலேயே, அவர் ‘எல் டிவினோ மான்கோ’ (தெய்வீக ஒற்றைக் கை மனிதன்) என்று அழைக்கப்பட்டார். உருகுவேயின் வெற்றிக்குப் பிறகு அந்நாட்டில் பொது விடுமுறை அறிவிக்கப்பட்டது. கேப்டன் ஜோஸ் நசாசி, பிரெஞ்சு சிற்பி ஏபெல் லாஃபிளரால் வடிவமைக்கப்பட்ட முதல் உலகக் கோப்பையை உயர்த்திப் பிடித்தார்.
