ஐபிஎல் 2026 தொடர் கோலாகலமாக முடிவடைந்த நிலையில், ராஜஸ்தான் ராயல்ஸ் அணியின் இளம் நட்சத்திர வீரரான வைபவ் சூர்யவன்ஷியைச் சுற்றி ஒரு சர்ச்சை வெடித்துள்ளது. ஒரு வீடியோ, சமூக வலைதளங்களில் காட்டுத்தீயாகப் பரவி, கிரிக்கெட் வட்டாரத்தில் பெரும் அதிர்வலைகளை ஏற்படுத்தியுள்ளது.
சர்ச்சையைக் கிளப்பிய போலி வீடியோ!
அந்த வைரல் வீடியோவில், பிரபல கிரிக்கெட் வர்ணனையாளர் ஹர்ஷா போக்ளே, வைபவ் சூர்யவன்ஷியிடம், “விராட் கோலியைப் போல ஒரு “கிங்’ ஆக விரும்புகிறீர்களா?” என்று கேட்பது போலவும், அதற்கு வைபவ், விராட் கோலியை “மெதுவாக ஆடுபவர்” மற்றும் “சுயநலவாதி” என்று திமிராகப் பதிலளிப்பது போலவும் சித்தரிக்கப்பட்டிருந்தது.
இந்த வீடியோ வெளியான சில மணி நேரங்களிலேயே, இளம் வீரர் வைபவின் குணம் குறித்து கடுமையான விவாதங்கள் எழுந்தன. ஆனால், இந்த வீடியோ முழுக்க முழுக்க போலியானது என்பது பின்னர் தெரியவந்தது.
“குரூரமான மற்றும் விஷமத்தனமான செயல்” – ஹர்ஷா!
இந்த போலி வீடியோவால் தனது பெயருக்கும், இளம் வீரர் வைபவின் பெயருக்கும் களங்கம் விளைவிக்கப்பட்டதைக் கண்டு கொந்தளித்த ஹர்ஷா போக்ளே, உடனடியாகத் தனது X (ட்விட்டர்) பக்கத்தில் விளக்கமளித்தார்.
அவர் தனது பதிவில், “நானும், வைபவ் சூர்யவன்ஷியும் இருப்பது போன்ற ஒரு போலி வீடியோ சமூக வலைதளங்களில் வலம் வருகிறது. அதில் வைபவ் திமிராகவும், மரியாதையற்றவராகவும் சித்தரிக்கப்பட்டுள்ளார். அப்படியொரு கேள்வியை நான் கேட்கவும் இல்லை, அதற்கு வைபவ் அப்படி ஒரு பதிலைக் கூறவும் இல்லை. இது மிகவும் குரூரமான மற்றும் விஷமத்தனமான செயல். குறிப்பாக, என்னிடம் மிகவும் மரியாதையுடன் பழகிய ஒரு இளம் வீரரை நோக்கி இப்படிச் செய்வது வன்மமானது,” என்று கடுமையாகச் சாடியிருந்தார்.
நிஜத்தில் நடந்தது என்ன?
போலி வீடியோவில் காட்டப்பட்டதற்கு முற்றிலும் மாறாக, வைபவ் சூர்யவன்ஷிக்கும் விராட் கோலிக்கும் இடையே பெரும் பரஸ்பர மரியாதை நிலவுகிறது. ஐபிஎல் 2026 இறுதிப் போட்டிக்குப் பிறகு, இருவரும் சந்தித்தபோது எடுக்கப்பட்ட ஒரு வீடியோவை ஐபிஎல் நிர்வாகமே வெளியிட்டிருந்தது. அதில், 15 வயதான வைபவ், கோலியை இரு கரம் கூப்பி வணங்கி மரியாதை செலுத்த, கோலியோ, “சிறப்பாக விளையாடினாய்,” (Well played, young man) என்று மனதாரப் பாராட்டினார்.
இந்தத் தொடர் முழுவதும் சிறப்பான ஆட்டத்தை வெளிப்படுத்திய வைபவ் சூர்யவன்ஷி, 776 ரன்கள் குவித்து ஆரஞ்சு தொப்பியை வென்றார். அவர் விருது வாங்க மேடைக்குச் சென்றபோது, தனது முன்னாள் ஆர்சிபி சக வீரர் ஏபி டி வில்லியர்ஸிடம் பேசிய கோலி, “இந்தச் சிறுவன் ஒரு ஸ்பெஷல், அவனால் சிறப்பாக பேட் செய்ய முடியும்” (‘This kid is special, he can bat’) என்று புகழ்ந்ததும் குறிப்பிடத்தக்கது. இவ்வளவு உண்மைகள் வெளிப்படையாக இருந்தும், சமூக வலைதளங்களில் பரப்பப்படும் இதுபோன்ற போலி செய்திகள், இளம் வீரர்களின் மனநிலையையும், நற்பெயரையும் சிதைக்கும் விதமாக அமைவது கவலையளிக்கிறது.
