தனியார் யூடியூப் சேனலுக்கு அளித்த பேட்டியில் வெங்கட் பிரபுவின் திரைப்பயணம் குறித்து பேசிய கங்கை அமரன், மகனின் வளர்ச்சி மகிழ்ச்சியளிப்பதாகத் தெரிவித்தார்.
அப்போது, வெங்கட் பிரபு இயக்கவிருந்த ஒரு படம் தாமதமானது குறித்து பேசிய அவர், குறிப்பிட்ட நடிகர் ஏற்கெனவே படத்தில் நடிப்பதற்கு கால்ஷீட் கொடுத்திருந்ததாகக் கூறினார். அந்த நடிகரை வைத்து கதையைத் தயாரித்ததுடன், படத்துக்கான பணிகளுக்காக அமெரிக்கா சென்று தேவையான வேலைகளையும் முடித்துவிட்டு வந்ததாகவும் அவர் தெரிவித்தார்.
ஆனால், அந்த நடிகர் நடித்த மற்றொரு திரைப்படம் மிகப்பெரிய வெற்றி பெற்றதாகவும், அதன்பிறகு அவர் தனது அடுத்தடுத்த படங்களில் வேறு இயக்குநர்களுடன் தொடர்ந்து பணியாற்ற முடிவு செய்ததாகவும் கங்கை அமரன் கூறினார்.
இதனால் அதிருப்தியடைந்த கங்கை அமரன், வெங்கட் பிரபுவிடம் அந்த நடிகருக்காக தொடர்ந்து காத்திருக்க வேண்டிய அவசியம் இல்லை என அறிவுறுத்தியதாகத் தெரிவித்தார்.
“அவன் உன்னை தவிர்க்கும்போது நீயும் அவனை தவிர்த்துவிடு. அவன் படம் பண்ணக்கூடாது” என்ற வகையில் வெங்கட் பிரபுவிடம் தான் கூறியதாகவும் அவர் தெரிவித்தார். எனினும், அந்த நடிகர் யார் என்பதை கங்கை அமரன் நேரடியாகக் குறிப்பிடவில்லை. “அந்த நடிகர் யார் என்பதை நீங்களே யூகித்துக் கொள்ளுங்கள்” என்று அவர் கூறியிருந்தார்.
சிவகார்த்திகேயனா?
கங்கை அமரனின் இந்தப் பேச்சு சமூக வலைதளங்களில் பரவிய நிலையில், அவர் குறிப்பிட்ட நடிகர் சிவகார்த்திகேயனாக இருக்கலாம் என ரசிகர்கள் சிலர் யூகிக்கத் தொடங்கினர்.
இதற்குக் காரணமாக, வெங்கட் பிரபு இயக்கத்தில் விஜய் நடித்த ‘தி கோட்’ திரைப்படத்தில் சிவகார்த்திகேயன் இடம்பெற்றிருந்ததையும், அதற்கு முன்னதாக வெங்கட் பிரபு இயக்கத்தில் சிவகார்த்திகேயன் நடிக்கவிருந்ததாக வெளியான தகவல்களையும் ரசிகர்கள் சுட்டிக்காட்டி வருகின்றனர்.
மேலும், சிவகார்த்திகேயன் நடித்த ‘அமரன்’ திரைப்படம் மிகப்பெரிய வரவேற்பைப் பெற்ற பிறகு, அவரது அடுத்தடுத்த படங்கள் தொடர்பான எதிர்பார்ப்பும் அதிகரித்தது. இதனால் கங்கை அமரன் பேசிய சம்பவத்துடன் இந்த விஷயங்களை ரசிகர்கள் இணைத்து சமூக வலைதளங்களில் விவாதித்து வருகின்றனர். ஆனால், கங்கை அமரன் தனது பேட்டியில் நடிகரின் பெயரை குறிப்பிடவில்லை என்பதும் கவனிக்க வேண்டிய விஷயம்.
வெங்கட் பிரபு சொன்னது என்ன?
இதற்கிடையே, இந்த விவகாரம் தொடர்பாக வெங்கட் பிரபு தனது சமூக வலைதளப் பதிவில் விளக்கம் அளித்துள்ளார். சிவகார்த்திகேயன் தனக்கு எப்போதும் அன்பான நண்பர் மற்றும் சகோதரர் போன்றவர் என்று குறிப்பிட்டுள்ள அவர், இந்த விவகாரம் தொடர்பாக தேவையற்ற சர்ச்சைகள் உருவாகி வருவதாக தெரிவித்துள்ளார்.
தனது மகன் தொடர்பான ஒரு திரைப்படம் தாமதமாகும்போது, ஒரு தந்தையாக கங்கை அமரனுக்கு ஏற்பட்ட வருத்தத்தின் காரணமாகவே அவர் அவ்வாறு பேசியிருக்கலாம் என்றும் வெங்கட் பிரபு குறிப்பிட்டுள்ளார்.
மேலும், தனது தொழில்முறை விஷயங்களைப் பற்றி தான் யாரிடமும் விரிவாகப் பேசுவதில்லை என்றும், தனது தந்தையிடம்கூட படங்கள் தொடர்பான முழு விவரங்களை பகிர்ந்து கொள்வதில்லை என்றும் அவர் தெரிவித்துள்ளார்.
பல்வேறு காரணங்களால் அந்த திரைப்படத்தை தொடங்க முடியாமல் போனதாகக் கூறிய வெங்கட் பிரபு, இதில் யார் மீதும் தனக்கு எந்தவித மனவருத்தமும் இல்லை எனத் தெரிவித்துள்ளார். எதிர்காலத்தில் நல்ல கதை அமைந்தால் சிவகார்த்திகேயனுடன் மீண்டும் இணைந்து பணியாற்ற விரும்புவதாகவும் அவர் கூறியுள்ளார்.
இதன் மூலம், கங்கை அமரனின் பேச்சால் உருவான விவாதத்திற்கு வெங்கட் பிரபு முற்றுப்புள்ளி வைக்க முயன்றுள்ளார். அதேநேரத்தில், கங்கை அமரன் குறிப்பிட்ட அந்த நடிகர் உண்மையில் யார் என்பது குறித்து அதிகாரப்பூர்வமாக எந்த தகவலும் வெளியாகவில்லை.
