கரூர் மாவட்டம், கிருஷ்ணராயபுரம் ஊராட்சி ஒன்றியத்தில் இருக்கும் சிவாயம் ஊராட்சியில் உள்ள பெருமாள் குளத்தில் சீமை கருவேல மரங்களை அகற்றும் பணிகளை, ஓய்வு பெற்ற உயர்நீதிமன்ற நீதிபதி செல்வம் நேற்று ஆய்வு மேற்கொண்டார். அப்போது, செய்தியாளர்களிடம் பேசிய அவர்,
“சென்னை உயர்நீதிமன்ற மதுரை கிளை உத்தரவின் அடிப்படையில், தமிழ்நாட்டில் சீமை கருவேல மரங்களை முற்றிலுமாக அகற்றுவதை கண்காணிக்கவும், ஆய்வு செய்யவும் சிறப்பு மேற்பார்வைக் குழு மற்றும் மாவட்ட அளவிலான கண்காணிப்பு குழுக்கள் அமைக்கப்பட்டுள்ளன. அதன்படி, கரூர் மாவட்டத்தில் மாவட்ட கனிமவள நிதியை பயன்படுத்தி, சுற்றுச்சூழல் மற்றும் நீர்நிலைகளை பாதுகாக்கும் வகையில், சீமை கருவேல மரங்களை இயந்திரங்கள் மூலம் அகற்றும் பணி நடக்கிறது. கரூர் மாவட்டத்தில், 3,103.41 ஏக்கர் பரப்பளவில் சீமை கருவேல மரங்கள் உள்ளன.
இதுவரை, 547.21 ஏக்கரில் மரங்கள் அகற்றப்பட்டுள்ளன. 2,556.20 ஏக்கரில் உள்ள மரங்களை அகற்றும் பணி நடக்கிறது. நீர்வளத்துறை மூலம் அமராவதி, காவிரி, அரியாறு, நொய்யல் கீழ் பவானி, நங்காஞ்சியாறு, குடகனாறு உள்ளிட்ட ஆறுகளின் வடிநில பகுதிகளில் உள்ள ஏரி, கால்வாய், ஆறு மற்றும் மாநகராட்சி, நகராட்சி, ஊராட்சி ஒன்றிய நீர்நிலைகளில் உள்ள மரங்களை அகற்றும் பணி நடக்கிறது. அந்த வகையில், தற்போது மருதுார் காவிரி ஆற்று பகுதி, சிவாயம் – பெருமாள்கோவில்பட்டி குளம், நல்லுார்- ஆட்டம்பட்டி குளம், கூடலுார் ஞானமுத்து உடையான் குளம், பண்ணப்பட்டி குளம், ரெங்கநாதபுரம் குளம், வீரராக்கியம் குளம், ஆண்டாங்கோவில் கிழக்கில் உள்ள அமராவதி ஆற்றுப் பகுதி மற்றும் அரவக்குறிச்சியில் உள்ள நங்காஞ்சியாறு உள்ளிட்ட பகுதிகளில் சீமை கருவேல மரங்களை அகற்றும் பணிகளை பார்வையிட்டு ஆய்வு மேற்கொள்ளப்பட்டுள்ளது” என்றார்.
