தமிழ் திரையுலகின் பிரபல இசையமைப்பாளரும், ரசிகர்களால் ‘தேனிசைத் தென்றல்’ என அன்புடன் அழைக்கப்பட்டவருமான தேவா, 76 வயதில் காலமானார். சென்னை வடபழனியில் உள்ள தனியார் மருத்துவமனையில் மாரடைப்பு காரணமாக அவர் உயிரிழந்தார். அவரது மறைவு தமிழ் திரையுலகினர் மற்றும் இசை ரசிகர்கள் மத்தியில் பெரும் சோகத்தை ஏற்படுத்தியுள்ளது.
தமிழ், தெலுங்கு, கன்னடம், மலையாளம் உள்ளிட்ட பல்வேறு மொழிகளில் 400-க்கும் மேற்பட்ட திரைப்படங்களுக்கு இசையமைத்துள்ள தேவா, கானா பாடல்களை தமிழ் சினிமாவில் பிரபலப்படுத்தியதில் முக்கியப் பங்காற்றியவர். இதனால் ரசிகர்களால் ‘கானா தேவா’, ‘கானா இசை மன்னன்’ என்றும் அழைக்கப்பட்டார்.
‘பாட்ஷா’, ‘அண்ணாமலை’, ‘ஆசை’ உள்ளிட்ட ஏராளமான படங்களுக்கு இசையமைத்த தேவாவின் பாடல்கள் இன்றளவும் ரசிகர்களால் கொண்டாடப்பட்டு வருகின்றன. அவரது இசைப் பயணத்தில் ஏராளமான விருதுகளும் கௌரவங்களும் கிடைத்துள்ளன.
தேவா பெற்ற முக்கிய விருதுகள் மற்றும் கௌரவங்கள்:
· 1990 – ‘வைகாசி பொறந்தாச்சு’ படத்திற்காக தமிழ்நாடு மாநில திரைப்பட விருது – சிறந்த இசையமைப்பாளர்.
· 1992 – தமிழ்நாடு அரசின் கலைமாமணி விருது.
· 1995 – ‘ஆசை’ படத்திற்காக தமிழ்நாடு மாநில திரைப்பட விருது.
· ‘பாட்ஷா’ திரைப்படத்திற்காக தமிழ்நாடு கலை மற்றும் கலாச்சார அகாடமி விருது.
· ‘அம்ருத வர்ஷினி’ கன்னடத் திரைப்படத்திற்காக ஃபிலிம்பேர் சிறந்த இசையமைப்பாளர் விருது.
· தமிழ் திரைப்பட உலகில் 25 ஆண்டுகள் பணியாற்றியதைப் பாராட்டி சேலம் அமெச்சூர் ஆர்ட்ஸ் டிரஸ்ட் சார்பில் ‘இசை வித்தகர்’ என்ற பட்டம் வழங்கப்பட்டது.
· தமிழ் இசைக்கான அவரது சேவையைப் பாராட்டி ‘இசைப் பேரறிஞர்’ என்ற கௌரவப் பட்டமும் வழங்கப்பட்டது.
· ‘சிவப்பு மழை’ திரைப்படத்துக்காக கின்னஸ் சாதனை தொடர்பான பாராட்டையும் பெற்றுள்ளார்.
கானா இசையை ரசிகர்களின் கொண்டாட்டமாக மாற்றிய தேவா, விருதுகள் மட்டுமின்றி தனது தனித்துவமான இசையாலும் தமிழ் சினிமாவில் தனக்கென ஒரு இடத்தை உருவாக்கியவர். அவரது மறைவு இசையுலகிற்கு ஈடு செய்ய முடியாத இழப்பாக பார்க்கப்படுகிறது.
