தமிழ்நாடு அரசியலில் விஜய் தலைமையிலான தமிழக வெற்றிக் கழகத்தின் கூட்டணி தற்போது கவனம் ஈர்த்து வருகிறது. ஏற்கெனவே கூட்டணியில் இடம்பெறும் கட்சிகள் குறித்து எதிர்பார்ப்பு நிலவி வந்த நிலையில், தற்போது கூட்டணியின் பெயரும் அரசியல் வட்டாரத்தில் பேசுபொருளாகியுள்ளது.
சென்னை பனையூரில் உள்ள தவெக தலைமை அலுவலகத்தில் கூட்டணிக் கட்சிகளின் ஆலோசனைக் கூட்டம் நடைபெற்றது. இதில் விசிக தலைவர் திருமாவளவன், மதிமுக பொதுச்செயலாளர் வைகோ, இந்திய யூனியன் முஸ்லிம் லீக் தலைவர் கே. காதர் மொகிதீன், காங்கிரஸ் மாநிலத் தலைவர் மாணிக்கம் தாகூர் உள்ளிட்டோர் பங்கேற்றனர்.
சுமார் ஒன்றரை மணி நேரம் நடைபெற்ற இந்தக் கூட்டத்தில், தேர்தல் பணிகள், தொகுதிப் பங்கீடு, வேட்பாளர் தேர்வு உள்ளிட்ட பல்வேறு விஷயங்கள் குறித்து ஆலோசிக்கப்பட்டதாகத் தகவல் வெளியாகியுள்ளது.
இதற்கிடையே, கூட்டணியின் பெயர் தொடர்பாக வெளியான தகவல்தான் தற்போது அரசியல் வட்டாரத்தில் முக்கிய கேள்வியை எழுப்பியுள்ளது.
‘சமூகநீதி வெற்றிக்கூட்டணி’… திடீரென ‘மதச்சார்பற்ற’ ஏன்?
தவெக தலைமையிலான கூட்டணிக்கு முதலில் ‘சமூகநீதி வெற்றிக்கூட்டணி’ என்ற பெயர் முன்மொழியப்பட்டதாகக் கூறப்படுகிறது. ஆனால், இறுதியாக ‘மதச்சார்பற்ற சமூகநீதி வெற்றிக்கூட்டணி’ என்ற பெயர் முடிவு செய்யப்பட்டதாக தகவல் வெளியானது.
அப்படியானால், இந்தப் பெயர் மாற்றம் ஏன்? இதற்கான பின்னணியை விசிக தரப்பில் வெளியான பதிவு வெளிச்சத்துக்குக் கொண்டுவந்துள்ளது.
பெயரை மாற்றச் சொன்னது திருமாவளவனா?
விசிக துணைப் பொதுச்செயலாளர் வெளியிட்டுள்ள பதிவில், ‘சமூகநீதி வெற்றிக்கூட்டணி’ என்று முன்மொழியப்பட்ட பெயர், திருமாவளவனின் அறிவார்ந்த ஆளுமையால் ‘மதச்சார்பற்ற சமூகநீதி வெற்றிக்கூட்டணி’ என திருத்தியமைக்கப்பட்டதாகத் தெரிவித்துள்ளார்.
அதாவது, கூட்டணியின் பெயரில் ‘மதச்சார்பற்ற’ என்ற வார்த்தை இடம்பெற வேண்டும் என்பதில் திருமாவளவன் தீர்க்கமாக இருந்ததாகவே விசிக தரப்பு பதிவை அரசியல் வட்டாரங்கள் பார்க்கின்றன. இதன் மூலம், ‘கூட்டணிக்கு பெயர் வைத்ததே திருமாவளவனா?’ என்ற கேள்வி எழுந்துள்ளது.
திருமாவளவனின் அரசியல் நிலைப்பாடு என்ன?
பெயர் மாற்றத்திற்கான காரணத்தை விளக்கும் வகையில், திருமாவளவனின் முந்தைய அரசியல் நிலைப்பாடுகளையும் விசிக தரப்பு சுட்டிக்காட்டியுள்ளது.
மதச்சார்பற்ற தமிழ்தேசியம், சமூக நீதிக்கான தமிழ்தேசியம் ஆகிய கருத்துகளை திருமாவளவன் தொடர்ந்து வலியுறுத்தி வவருவதாகக் குறிப்பிட்டுள்ள விசிக துணைப் பொதுச்செயலாளர், தமிழ்ச் சமூகத்தின் முதன்மை எதிரிகள் மதவாத மற்றும் சாதியவாத சக்திகளே என்ற நிலைப்பாட்டையும் பதிவு செய்துள்ளார். இதன் தொடர்ச்சியாகவே கூட்டணியின் பெயரில் ‘மதச்சார்பற்ற’ என்ற வார்த்தை சேர்க்கப்பட்டதாக அந்தப் பதிவு உணர்த்துகிறது.
சிந்தனைச் செல்வனின் பதிவில் இடம்பெற்றுள்ள மற்றொரு வாசகமும் அரசியல் கவனத்தை ஈர்த்துள்ளது. “விடுதலைச்சிறுத்தைகளின் உத்தி மாறலாம். இலக்கு ஒருபோதும் மாறுவதில்லை!” என்ற அந்தக் கருத்து, தற்போதைய கூட்டணி அரசியலில் விசிக தனது அடிப்படை கொள்கைகளை விட்டுக்கொடுக்கவில்லை என்பதைச் சொல்லும் வகையில் அமைந்துள்ளது.
குறிப்பாக விஜய் தலைமையிலான கூட்டணியில் விசிக இணைந்திருக்கும் நிலையில், கூட்டணியின் பெயரிலேயே மதச்சார்பின்மை மற்றும் சமூகநீதி ஆகிய இரு அரசியல் அடையாளங்களையும் முன்னிறுத்தியிருப்பது முக்கியத்துவம் பெற்றுள்ளது.
கூட்டணிக்குள் திருமாவளவனின் செல்வாக்கு?
தவெக தலைமையிலான கூட்டணியில் விஜய்தான் தலைமை வகிக்கிறார் என்றாலும், கூட்டணியில் இடம்பெற்றுள்ள ஒவ்வொரு கட்சிக்கும் தங்களுக்கான அரசியல் கொள்கைகள் மற்றும் எதிர்பார்ப்புகள் உள்ளன.
இந்தச் சூழலில், கூட்டணியின் பெயரில் கூடுதல் வார்த்தையாக ‘மதச்சார்பற்ற’ என்பதைச் சேர்த்தது தொடர்பாக விசிக தரப்பு வெளிப்படையாகப் பதிவிட்டிருப்பது, கூட்டணிக்குள் திருமாவளவனின் அரசியல் வலிமை குறித்த கேள்வியையும் எழுப்பியுள்ளது.
அடுத்தது என்ன?
ஒருபக்கம் கூட்டணியின் பெயர் அரசியல் அடையாளத்தை உருவாக்கியுள்ள நிலையில், மறுபக்கம் மதுராந்தகம், தாராபுரம் உள்ளிட்ட இடைத்தேர்தல் தொகுதிகளில் யார் போட்டியிடப் போகிறார்கள் என்ற எதிர்பார்ப்பும் அதிகரித்துள்ளது.
தொகுதிப் பங்கீடு, வேட்பாளர் தேர்வு, தேர்தல் பிரசாரம் என அடுத்தடுத்த நகர்வுகள் தொடங்கும்போது, கூட்டணியில் இடம்பெற்றுள்ள கட்சிகளின் உண்மையான அரசியல் பங்கு மேலும் வெளிப்பட வாய்ப்புள்ளது.
இப்போதைக்கு எழுந்திருக்கும் முக்கியக் கேள்வி ஒன்றுதான். இது வெறும் பெயர் மாற்றமா? அல்லது கூட்டணியின் அரசியல் திசையை நிர்ணயிப்பதில் திருமாவளவனின் குரலுக்கும் முக்கிய இடம் கிடைத்திருக்கிறதா? தேர்தல் களம் சூடுபிடிக்கும்போது, தொகுதிப் பங்கீடு முதல் வேட்பாளர் தேர்வு வரை அடுத்தடுத்த முடிவுகளில் இதற்கான பதில் தெரியவரலாம்.
இப்போதைக்கு பனையூரில் முடிவு செய்யப்பட்டதாகக் கூறப்படும் கூட்டணிப் பெயர், ஒரு விஷயத்தை மட்டும் தெளிவாகச் சொல்கிறது… விஜய் தலைமையிலான கூட்டணியில் திருமாவளவனின் அரசியல் குரல் கேட்கத் தொடங்கிவிட்டதா?
