பிரபல திரைப்பட நடிகை ராதா வெப்பேரியில் உள்ள சென்னை பெருநகர காவல் ஆணையர் அலுவலகத்திற்கு நேரில் வந்து தனது சகோதரியும் நடிகையுமான அம்பிகா மற்றும் தன் சகோதரர் மல்லிகார்ஜுன் ஆகியோர் மீது புகார் அளித்திருக்கிறார்.
அதைத் தொடர்ந்து செய்தியாளர்களிடம் பேசிய அவர், “2006-ல் எனக்கும் அக்கா அம்பிகாவுக்கும் சொத்து பிரித்து கொடுக்கப்பட்டது. அதில் அக்காவுக்கு பெரிய பில்டிங் ஒன்றும் எனக்கு ஏ.ஆர்.எஸ் கார்டன்… அதாவது நான் ஆர்.ஆர்.எஸ் கார்டன் எனப் பெயர் மாற்றிய சொத்தும் கொடுக்கப்பட்டது. அக்காவை நம்பாமல் யாரை நம்புவது. எனவே, அதை நிர்வகிக்கும் பொறுப்பை அக்கா அம்பிகாவிடன் விட்டிருந்தேன்.
ஆனால், எனது வங்கிக் கணக்கிற்குரிய சுமார் 5 காசோலைகளை (Cheques) முறைகேடாகப் பயன்படுத்தி, என் சகோதரி அம்பிகா மற்றும் சகோதரர் மல்லிகார்ஜுன்ஆகிய இருவரும் இணைந்து மோசடி செய்ய முயன்றார்கள்.
என் பெயரில் அக்கா அம்பிகா பெரிய தொகை ஒன்றை பேங்க் செக் கொடுக்க, அது எனக்கு மெஸேஜாக வந்தது. அந்தத் தொகையை பார்த்ததும் நான் பயந்துவிட்டேன். நான் அவ்வளவு தொகை சம்பாதிப்பவளில்லை. சுமார் ஒரு வருடத்துக்கும் மேலாக என்னை வீட்டில் அனுமதிக்கவில்லை. போனில் அழைத்தாலும் எடுப்பதில்லை. எனக்கு என் தம்பி மல்லிகார்ஜுனன் மீதுதான் சந்தேகம் இருக்கிறது.
நீங்கள் எல்லோரும் என் குடும்பத்தில் ஒருவர் எனக் கருதுவதால்தான் இதை உங்களிடம் பகிர்ந்துகொள்கிறேன். எல்லா விவரங்களையும் புகாரில் தெரிவித்துவிட்டேன். இனி அவர்கள் பார்த்துகொள்வார்கள் என்ற நம்பிக்கை இருக்கிறது.” என்றார்.
ஏற்கனவே நில மோசடி உள்ளிட்ட புகார்களை நடிகை ராதா அளித்திருந்த நிலையில், தற்போது புதிதாக தனது குடும்பத்தினர் மீது இந்த பண மோசடி புகாரை அளித்திருப்பது திரையுலகில் பரபரப்பை ஏற்படுத்தியிருக்கிறது.
