எத்திராஜ் மகளிர் கல்லூரி அருகில் உள்ள சிக்னலுக்குப் பக்கத்தில் கூவம் ஆறு ஓடுகிறது. இதன் மேல் வாகனப் போக்குவரத்திற்காக பாலம் அமைக்கப்பட்டுள்ளது. சென்னை மாநகராட்சி 2009-10ம் ஆண்டில் ரூ.13.70 லட்சம் செலவில் இந்தப் பாலம் அழகுப்படுத்தப்பட்டதாக கல்வெட்டு பொறிக்கப்பட்டுள்ளது.
ஆற்றுக்கு அருகிலேயே தனியார் கட்டிடங்கள், எத்திராஜ் மகளிர் கல்லூரி மற்றும் ஓர் அரசுக் கல்லூரி அமைந்துள்ளன. நேர்த்தியான தார் சாலைகள், மரங்கள், உயரமான கட்டிடங்கள், சாலைப் பாதுகாப்பு அடையாளங்கள், தெருவிளக்குகள் என நவீன வசதிகளுடன் கூடிய இப்பகுதியில், சுற்றி வீடுகள் குறைவாக இருப்பதால் கூவத்தின் இந்த இடம் பலரின் கவனத்திற்கு வராமல் உள்ளது.
தற்போது அங்கே கூவம் ஆற்றில் மூன்று பக்கங்களிலிருந்து நீர் வந்து கலக்கிறது. இது மழைநீர் வாய்க்காலாக இருக்கலாம் எனினும், பாலத்திற்கு இருபுறமும் அமைக்கப்பட்டுள்ள குழாய்களில் இருந்து வரும் நீர் கழிவுநீராக இருக்கக்கூடும் என்ற சந்தேகம் எழுந்துள்ளது.
இதுவே உண்மையில் கழிவுநீராக இருந்தால், சுற்றுச்சூழலுக்குப் பாதிப்பு ஏற்படும் அபாயம் உள்ளது.
ஆற்றின் கரையில் குப்பை மேடாகக் குவிந்துள்ளது. குப்பையைத் தொடர்ந்து கொட்டி எரிப்பதற்கான அடையாளங்களும் காணப்படுகின்றன. சுற்றியுள்ள பகுதிகளில் இருந்து இந்த நீர் வருவதாகச் சந்தேகிக்கப்படுகிறது; இதன் சரியான மூலம் இதுவரை உறுதிப்படுத்தப்படவில்லை.
நீர் சேமிப்பு, மழைநீர் சேகரிப்பு குறித்து பள்ளி புத்தகங்கள், விளம்பரங்கள், விழிப்புணர்வு நிகழ்ச்சிகள் மூலம் அரசும் தன்னார்வ தொண்டு நிறுவனங்களும் தொடர்ந்து அறிவுரை வழங்கி வரும் நிலையில், இப்படி நீர்நிலைகள் மாசுபடக்கூடிய சூழல்கள் கண்டுகொள்ளப்படாமல் உள்ளன.
ஆற்றில் கலக்கும் நீர் கழிவுநீராக உறுதியானால், மழைக்காலத்தில் வெள்ள நீருடன் இது கலக்கும் சாத்தியம் உள்ளது என்று பொதுமக்கள் வருத்தம் தெரிவிக்கின்றனர்.
