டெல்லியில் உள்ள வசுந்தரா என்ற இடத்தில் வசித்து வந்தவர் சஷாங். இவரது மனைவி பிரியா. இருவரும் தனியார் நிறுவனத்தில் வேலை செய்து வந்தனர். சஷாங் வீட்டில் தனியாக இருந்தபோது உள்ளே நுழைந்த மர்ம நபர் அவரை சரமாரியாக கத்தியால் குத்திவிட்டு தப்பி ஓடிவிட்டார். அந்நேரம் பிரியா உடற்பயிற்சி மையத்திற்கு சென்று இருந்தார். கத்திக்குத்து காயத்தால் உயிருக்கு போராடிய சஷாங்கை பக்கத்து வீட்டுக்காரர்கள் மருத்துவமனையில் சேர்த்தனர். அவரது உயிருக்கு ஆபத்து இல்லை என்று போலீஸார் தெரிவித்துள்ளனர்.
இச்சம்பவம் குறித்து போலீஸார் நடத்திய விசாரணையில், இக்கத்திக்குத்தில் ஈடுபட்டது பிரதாப் சிங் என்று தெரிய வந்தது. பிரதாப் சிங் அங்குள்ள உடற்பயிற்சி மையத்தில் பயிற்சியாளராக இருந்தார்.
அவரிடம் போலீஸார் நடத்திய விசாரணையில், இந்த சம்பவத்துக்கு சஷாங்கின் மனைவி பிரியாதான் காரணம் என்று தெரிய வந்துள்ளது. பிரியா கடந்த சில மாதங்களாக பிரதாப் சிங் பயிற்சியாளராக இருக்கும் உடற்பயிற்சி மையத்திற்கு சென்று வந்தார்.
அவ்வாறு சென்றபோது பிரியாவிற்கும், பிரதாப் சிங்கிற்கும் இடையே தொடர்பு ஏற்பட்டுள்ளது. இது நாளடைவில் திருமணம் தாண்டிய உறவாக மாறியது. இந்த உறவை அறிந்த கணவர் சஷாங் தீபாவளிக்கு பிறகு வேறு இடத்திற்கு வீட்டை மாற்ற திட்டமிட்டு இருந்ததாக போலீசார் தெரிவித்தனர். இதையடுத்து பிரியாவும், பிரதாப் சிங்கும் சேர்ந்து சஷாங்கை கொலை செய்துவிட்டு இருவரும் திருமணம் செய்ய திட்டம் தீட்டியதாகவும் போலீஸார் தெரிவித்தனர்.
கடந்த 25ம் தேதி காலை பிரதாப்பும் பிரியாவும் சந்தித்து சஷாங்கைக் கொலை செய்வது குறித்து விவாதித்தனர். மறுநாள், பிரதாப் கத்தியுடன் பிரியாவின் வீட்டுக்குச் சென்றுள்ளார். முன்னதாக ப்ரியா வீட்டு கதவை பூட்டாமல் சென்றது விசாரணையில் தெரிய வந்துள்ளது. கதவு திறந்து இருந்ததால் பிரதாப் வீட்டிற்குள் நுழைந்து சஷாங்கைத் தாக்கிவிட்டு பின்னர் தப்பி ஓடிவிட்டார்.
போலீஸாரின் விசாரணையில், சம்பவத்திற்கு முந்தைய நாள் இரவு பிரியாவும் பிரதாப்பும் தங்களது திட்டம் குறித்து வாட்ஸ்அப் மூலம் தகவல்களை பகிர்ந்து கொண்டதாக போலீசார் தெரிவித்தனர். விசாரணையில், பிரியா கேட்டுக்கொண்டதால் பிரதாப் கத்தியால் சஷாங்கை தாக்கியதாக பிரதாப் தெரிவித்துள்ளார்.
