தமிழ்நாட்டின் பல்வேறு பகுதிகளையும் சுற்றிப் பார்க்கும் ஆர்வத்தைத் தூண்டும் வகையில் அறிமுகப்படுத்தப்பட்டுள்ள இந்தப் பாஸ்போர்ட்டைப் பெறுவதற்காக ஏராளமானோர் ஆர்வம் காட்டி வருகின்றனர். அஞ்சல் தலை சேகரிப்பையும் சுற்றுலாவையும் இணைக்கும் இந்தத் திட்டம், தமிழ்நாட்டின் வரலாறு, கலாசாரம், பாரம்பரியத்தைப் புதிய கோணத்தில் அறிந்துகொள்ள உதவுகிறது.
இது விமானத்தில் பறக்கிற பாஸ்போர்ட் இல்லை… தமிழ்நாட்டைச் சுற்ற வைக்கும் பாஸ்போர்ட்!
வெளிநாடுகளுக்குச் செல்ல பாஸ்போர்ட் தேவை. ஆனால், இந்த ஃபிலாட்டலி பாஸ்போர்ட் உங்களைத் தமிழ்நாட்டின் வரலாற்றுச் சிறப்புமிக்க இடங்கள், கலாசார அடையாளங்கள், பாரம்பரியச் சின்னங்கள் எனப் பல இடங்களைத் தேடிச் செல்லத் தூண்டும்.
அஞ்சல் தலைகளைச் சேகரிக்கும் ஆர்வத்துக்கு ‘ஃபிலாட்டலி’ என்று பெயர். அந்த ஆர்வத்தையும் சுற்றுலாவையும் இணைக்கும் வகையில் இந்திய அஞ்சல் துறை இந்தப் பாஸ்போர்ட்டை அறிமுகப்படுத்தியுள்ளது. கர்நாடகாவில் முதலில் அறிமுகமான இந்த முயற்சி, தற்போது தமிழ்நாட்டிலும் விரிவுபடுத்தப்பட்டுள்ளது.
தமிழ்நாட்டில் சென்னை, கோயம்புத்தூர், மதுரை, திருச்சி, புதுச்சேரி ஆகிய ஐந்து அஞ்சல் தலை சேகரிப்பு மையங்களில் ஒரே நேரத்தில் இந்தப் பாஸ்போர்ட் அறிமுகப்படுத்தப்பட்டது.
இதன் சிறப்பம்சம் என்ன தெரியுமா? தமிழ்நாட்டின் பல்வேறு பகுதிகளைச் சேர்ந்த 58 நிரந்தரப் பட அஞ்சல் முத்திரைகள் (Permanent Pictorial Cancellations) இதில் இடம்பெற்றுள்ளன. குறிப்பிட்ட இடங்களுக்குச் சென்று அங்குள்ள தனித்துவமான அஞ்சல் முத்திரைகளைப் பெற்று, உங்கள் பயணத்தின் நினைவாகச் சேகரித்துக்கொள்ளலாம்.
அதாவது, சுற்றுலா சென்றதற்குச் சான்றாகப் புகைப்படங்களை மட்டும் வைத்துக்கொள்ளாமல், அந்தப் பயணத்துடன் தொடர்புடைய அஞ்சல் முத்திரைகளையும் சேகரிக்கலாம்.
மாவட்டம் மாவட்டமாகச் சுற்றலாம்… ஒவ்வொரு இடத்துக்கும் ஒரு நினைவுச் சின்னம்..!
தமிழ்நாடு என்றாலே ஒவ்வொரு பகுதிக்கும் தனித்துவமான வரலாறும், கலாசாரமும், பாரம்பரியமும் உண்டு. கடற்கரைகள், மலைப்பகுதிகள், கோயில்கள், வரலாற்றுச் சின்னங்கள், பழமையான நகரங்கள் எனச் சுற்றுலாப் பயணிகளை ஈர்க்கும் இடங்கள் ஏராளம்.
இந்தப் பின்னணியில், ஃபிலாட்டலி பாஸ்போர்ட் சுற்றுலாவை ஒரு புதிய அனுபவமாக மாற்றும் வாய்ப்பைக் கொண்டுள்ளது. ஒரு குறிப்பிட்ட இடத்துக்குச் சென்று அங்குள்ள அஞ்சல் முத்திரையைச் சேகரிப்பது, அந்த இடத்தின் வரலாற்றையும் அடையாளத்தையும் அறிந்துகொள்ளும் ஆர்வத்தைத் தூண்டலாம்.
விடுமுறை நாள்களில் குடும்பத்துடன் பயணம் செல்வது, குழந்தைகளுக்கு வரலாற்று இடங்களை அறிமுகப்படுத்துவது, நண்பர்களுடன் புதிய இடங்களைத் தேடிச் செல்வது எனப் பல வகைகளில் இந்தப் பாஸ்போர்ட்டைப் பயன்படுத்தலாம்.
ஒரு மாவட்டத்தில் தொடங்கிய பயணத்தை மற்ற மாவட்டங்களுக்கும் விரிவுபடுத்தி, தமிழ்நாடு முழுவதும் உள்ள இடங்களை ஆராயும் முயற்சியாகவும் இதை மாற்றிக்கொள்ளலாம்.
அப்போதைய கடிதங்கள் முதல் இன்றைய டிஜிட்டல் உலகம் வரை!
ஒரு காலத்தில் வெளிநாடுகளில் பணிபுரியும் குடும்ப உறுப்பினர்களுக்குக் கடிதம் எழுதுவதும், பதிலுக்காகக் காத்திருப்பதும் அன்றாட வாழ்க்கையின் ஓர் அங்கமாக இருந்தது. அந்தக் கடிதங்களுடன் வந்த வண்ணமயமான அஞ்சல் தலைகள் பலருக்கும் சேகரிப்புப் பழக்கத்தை ஏற்படுத்தின.
இன்றைக்கு பெரும்பாலான தகவல் பரிமாற்றங்கள் செல்போன், மின்னஞ்சல், சமூக வலைதளங்கள் என டிஜிட்டல் உலகத்துக்கு மாறிவிட்டன. இதனால், அஞ்சல் தலைகளின் பின்னணியில் இருக்கும் வரலாறும் அவற்றைச் சேகரிக்கும் பழக்கமும் இளைய தலைமுறையினரிடம் குறைவாக அறியப்படுகின்றன.
இந்தச் சூழலில், ஃபிலாட்டலி பாஸ்போர்ட் ஒரு பொழுதுபோக்கை மீண்டும் உயிர்ப்பிப்பதுடன், குழந்தைகளுக்கு அஞ்சல் தலைகளின் முக்கியத்துவத்தை அறிமுகப்படுத்தவும் உதவலாம்.
கூகுள் மேப்பைத் தாண்டி ஒரு பயணம்!
இன்றைய தலைமுறையினர் புதிய இடங்களுக்குச் செல்வதிலும், புதுமையான அனுபவங்களைப் பெறுவதிலும் அதிக ஆர்வம் காட்டுகின்றனர். அவர்களுக்கு இந்தப் பாஸ்போர்ட் ஒரு புதிய பயண வழிகாட்டியாக அமையலாம்.
கூகுள் மேப்பில் கண்ணில் படும் இடங்களைத் தேடிச் செல்வதைவிட, இந்தப் பாஸ்போர்ட்டில் குறிப்பிடப்பட்டுள்ள இடங்களுக்குச் சென்று அங்குள்ள அஞ்சல் முத்திரைகளைச் சேகரிப்பது ஒரு நோக்கத்துடன் கூடிய பயணமாக இருக்கும்.
ஒரு முத்திரையைச் சேகரிக்க வேண்டும் என்ற ஆர்வம், இதுவரை செல்லாத ஓர் ஊருக்குச் செல்ல வைக்கலாம். அந்த ஊரின் வரலாற்றைத் தெரிந்துகொள்ளவும், அங்குள்ள மக்களின் வாழ்க்கை, கலாசாரம், பாரம்பரியம் ஆகியவற்றை அறிந்துகொள்ளவும் வழிவகுக்கலாம்.
முதல் நாளிலேயே அமோக வரவேற்பு!
கோயம்புத்தூர் அஞ்சல் கோட்டத்தில் இந்தப் பாஸ்போர்ட் அறிமுகமாவதற்கு முந்தைய 24 மணி நேரத்தில் மட்டும் 150-க்கும் மேற்பட்ட தொலைபேசி விசாரணைகள் வந்துள்ளன.
முதல் நாளிலேயே சுமார் 150 பாஸ்போர்ட்டுகள் விற்பனையாகியுள்ளன. அடுத்த தொகுப்புக்காக 50-க்கும் மேற்பட்ட முன்பதிவுகளும் பெறப்பட்டுள்ளன.
பொதுமக்களின் ஆர்வத்தைக் கணித்து சுமார் 350 பிரதிகள் கோரப்பட்டிருந்த நிலையில், 200-க்கும் குறைவான பிரதிகளே கிடைத்துள்ளன. இதனால், அடுத்தடுத்த கட்டங்களில் கூடுதல் பிரதிகளை விநியோகிக்க வேண்டிய தேவை ஏற்பட்டுள்ளது.
சென்னையிலும் இந்தப் பாஸ்போர்ட்டைப் பெறுவதற்கு முந்தைய நாள் இரவு முதலே சிலர் காத்திருக்கத் தொடங்கியுள்ளனர். அதிகாலை 6 மணிக்கே கணிசமான கூட்டம் திரண்டுள்ளது.
