இந்தியப் பங்குச் சந்தை தற்போது தொடர் சரிவைச் சந்தித்துவருகிறது. சில நாள்களில் 1000 புள்ளிகள் வரை சரிந்து பல லட்சம் கோடிகளைச் சந்தை இழக்கிறது. ‘சந்தையின் போக்கு எப்படி இருக்கும் என்று கணிக்க முடியாத நிலை உள்ளது’ என்கிறார்கள் நிபுணர்கள். இதனால், முதலீட்டாளர்கள் மத்தியில் பதற்றமும் குழப்பமும் நிலவுகிறது.
இந்தியப் பொருளாதாரம் தொடர்ந்து வலுவாக இருந்தாலும், வெளிப்புறச் சூழல் மோசமாக இருப்பதால்தான் இந்தச் சரிவு என்கிறார்கள். மத்திய கிழக்கு நாடுகளில் நிலவும் போர்ச்சூழல், கச்சா எண்ணெய் விலை உயர்வு, அமெரிக்கப் பத்திரங்கள் வருமானம் உயர்வு, டாலருக்கு நிகரான ரூபாய் மதிப்பு சரிவு, வெளிநாட்டு முதலீட்டாளர்களின் தொடர் வெளியேற்றம் எனப் பல அழுத்தங்கள் ஒரே நேரத்தில் சந்தையைத் தாக்குகின்றன.
இந்தச் சந்தைச் சரிவை இந்தியப் பொருளாதாரத்தின் சரிவாகப் பார்க்கும் நிலையும் முதலீட்டார்கள் மத்தியில் இருக்கிறது. அது உண்மையல்ல. நல்ல நிறுவனங்களின் லாப வளர்ச்சி, உள்நாட்டு நுகர்வு, வங்கிகளின் கடன் வளர்ச்சி போன்றவை தொடர்ந்து ஆதரவாகவே இருக்கின்றன. ஆனால், பங்குகளின் விலையை நிர்ணயிப்பது இன்றைய நிலை மட்டும் அல்ல; எதிர்காலம் குறித்த எதிர்பார்ப்புகளும் சேர்த்துதான். அந்த எதிர்பார்ப்புகளில்தான் பெரிய மாற்றம் நடந்துகொண்டிருக்கிறது.
முதலீட்டாளர்கள் இப்போது பொறுமை காப்பது அவசியம். அவரசப்பட்டு முதலீடுகளை மேற்கொள்ளாமல் ‘கேஷ்’ வைத்திருப்பது நல்லது. போர், வர்த்தகத் தடை, அரசியல் குளறுபடிகளால் ஒருவேளை சந்தை மேலும் சரிந்தால், நல்ல நிறுவனங்களின் பங்குகள் கவர்ச்சிகரமான விலைக்கு வரும்போது, பணம் தயாராக வைத்திருப்பவர்களால்தான் படிப்படியாக முதலீடு செய்ய முடியும். அவசரப்பட்டு முழுப் பணத்தையும் சந்தையில் முதலீடு செய்துவிட்டால் வரப்போகும் காலங்களில் முதலீடு செய்யும் வாய்ப்புக் கிடைக்காது.
அதேபோல், ஏற்கெனவே முதலீடு செய்தவர்கள் சந்தையின் சரிவைப் பார்த்து பதற்றப்பட்டு முதலீட்டை விற்றுவிட வேண்டாம். நிறுவனத்தின் கடன், லாப வளர்ச்சி, கேஷ் ஃப்ளோ, மதிப்பீடு போன்ற அடிப்படைகளைப் பார்த்துதான் முடிவெடுக்க வேண்டும்.
சந்தை எப்போது ஏற்றத்துக்குத் திரும்பும் என்பது யாருக்கும் தெரியாது. ஆனால், அது திரும்பும்போது நாம் தயாராக இருக்க வேண்டும். இந்தச் சரிவை, நம் போர்ட்ஃபோலியோவை மறுபரிசீலனை செய்யவேண்டிய நேரமாகப் பயன்படுத்திக்கொள்ளலாம். தேவையில்லாத ரிஸ்க்கைத் தவிர்த்து, நல்ல வாய்ப்புக்காகக் காத்திருங்கள்.
சந்தை நிச்சயம் மீண்டும் ஏறும். முதலீட்டுக்கு நல்ல வாய்ப்புகள் வரும். அதை பயன்படுத்த, கையில் பணத்துடன் தயாராக இருப்போம். ஏற்றச் சந்தையில் ட்ரெண்ட் நம்முடைய ‘ஃப்ரெண்ட்’ என்றால், இறக்கச் சந்தையில் ‘கேஷ்’தான் ராஜா!
– ஆசிரியர்
