உத்தரகாண்ட் மாநிலத்தின் அல்மோரா மாவட்டத்தைச் சேர்ந்த இளம் கண்டுபிடிப்பாளர் ரவி தம்தா உருவாக்கிய ‘ஹபிடா ஸ்கைநெக்ஸ்’ (HAPIDA SKYNeX) என்ற மின்சாரப் பறக்கும் கார் தற்போது நாடு முழுவதும் கவனம் பெற்றுள்ளது.
பொறியியல் மற்றும் விமானத் தொழில்நுட்பத்தில் ஆர்வம் கொண்ட ரவி தம்தா, தனது குழுவினருடன் இணைந்து இந்தப் பறக்கும் வாகனத்தை வடிவமைத்துள்ளார். பல ஆண்டுகளாக மேற்கொண்ட ஆய்வு மற்றும் முயற்சியின் விளைவாக இத்திட்டம் உருவாகியுள்ளது.
முழுவதும் மின்சாரத்தில் இயங்கும் இவ்வாகனம், செங்குத்தாக மேலே பறந்து தரையிறங்கும் eVTOL (Electric Vertical Take-Off and Landing) தொழில்நுட்பத்தில் உருவாக்கப்பட்டுள்ளது. கடந்த ஆகஸ்ட் 6-ஆம் தேதி அல்மோரா பகுதியில் நடைபெற்ற இதன் முதல் சோதனை இயக்கம் வெற்றிகரமாக நிறைவடைந்தது. சுமார் ஒரு நிமிடம் வானில் பறந்த இவ்வாகனம் பாதுகாப்பாகத் தரையிறங்கியது.
மலைப்பகுதிகளில் நிலவும் போக்குவரத்துச் சவால்களைச் சமாளிக்கும் வகையில் இத்திட்டம் உருவாக்கப்பட்டுள்ளது. தற்போது சுமார் 40 கிலோமீட்டர் தூரத்தைச் சாலை வழியாகக் கடக்க ஒன்றரை மணி நேரம் வரை ஆகும் நிலையில், இந்தப் பறக்கும் வாகனத்தின் மூலம் அதே தூரத்தை 10 முதல் 15 நிமிடங்களில் கடக்க முடியும் எனத் தெரிவிக்கப்பட்டுள்ளது.
