கோல்டு லோன், பெர்சனல் லோன், கிரெடிட் கார்டு என ஏகப்பட்ட கடன் வகைகள் இன்றைய உலகத்தில் உள்ளன.
ஆனால், எந்தத் தேவைகளுக்கு, எந்தக் கடன் வாங்கலாம் என்பதில் தான் கடன் கட்டுப்பாடு ரகசியமே அடங்கியிருக்கிறது.
அந்த ரகசியத்தைக் கூறுகிறார் நிதி ஆலோசகர் விஷ்ணு வரதன்.
“வங்கிகள், நிதி நிறுவனங்கள் ஏகப்பட்ட கடன் பிராடக்டுகளை வைத்திருக்கின்றன. ஆனால், அதில் எது நமக்கு தேவை என்று பிரித்து பார்த்து தேர்ந்தெடுக்க வேண்டும்.
பெர்சனல் லோன்:
இந்தக் கடனைப் பொறுத்த வரை, எந்த அடமானமும் தேவையில்லை. வருமானத்தைப் பொறுத்து சற்று எளிதாக கிடைக்கும் கடன்.
மேலே சொன்னதில், ‘சற்று எளிதாக’ என்பதை நன்கு கவனியுங்கள். சற்று எளிதாக கிடைப்பதாலே, பலர் அளவுக்கு மீறி இந்தக் கடனை வாங்கி சிக்கலில் சிக்கிக் கொள்கிறார்கள்.
ஆனால், இதில் வட்டி விகிதம் அதிகம் என்பதை மறந்துவிடுகிறார்கள்.
பெர்சனல் லோனை மருத்துவ செலவு, அவசர தேவைகள், குறுகிய கால நிதி தேவைகளுக்கு மட்டும் வாங்குங்கள். அதை முடிந்தளவு சரியாக… விரைவாக கட்டி முடிக்க பாருங்கள். இ.எம்.ஐ கட்டத் தவறினாலோ, கடனைக் கட்டி முடிக்க தாமதமானாலோ, இது ஒரு மிகப்பெரிய டிராப்.
இந்தக் கடனைப் பற்றி இன்னும் தெளிவாக கூற வேண்டுமானால், வேறு வழி இல்லையென்றால் மட்டும், இந்தக் கடனை வாங்குவது நல்லது.
தங்க நகைக் கடன்:
இது பெரும்பாலான தமிழ் குடும்பங்களில் அடிக்கடி வாங்கப்படும் ஒரு கடன். உடனடியான பணத் தேவைகளுக்கும், குறுகிய கால பண தேவைகளுக்கு மட்டும் இந்தக் கடனை வாங்குவது நல்லது.
இந்தக் கடனைப் பொறுத்த வரை, உடனே கிடைத்துவிடுவது, பெர்சனல் லோனை விட குறைவான வட்டி, பெரிய ஆவண வேலைகள் இல்லாமல் இருப்பது ப்ளஸ்.
அடமானக் கடன்:
ஏதேனும் ஒரு அசையா சொத்தை அடமானம் வைத்து வாங்கப்படுவது இந்தக் கடன். பெரிய நிதித் தேவைகள், பிசினஸ் முதலீடுகளுக்கு இந்தக் கடனை வாங்கலாம்.
குறைந்த வட்டி விகிதம்… ஆனால், அதிக கடன் தொகை என்பது இந்தக் கடனில் ப்ளஸ். ஆனால், இந்தக் கடனை கட்டத் தவறினால், நம் சொத்து அப்படியே நம் கையை விட்டு போய்விடும் என்பதை மறந்துவிடாதீர்கள்.
தேவை, திருப்பி செலுத்தக் கூடிய திறன், கடன் தொகையைப் பொறுத்தே எந்தக் கடன் யாருக்கு… எந்தச் செலவுக்கு நல்லது என்பதை முடிவு செய்ய முடியும்.
அப்படி பார்த்தால்…
குறுகிய கால தேவைகளுக்கு தங்க நகைக் கடன்;
பெரிய தேவைகளுக்கு அடமானக் கடன்;
அவசியம் என்றால் மட்டுமே பெர்சனல் லோன்;
கிரெடிட் கார்டு கடைசி ஆப்ஷன்.
இந்த வரிசையில் நாம் நம் கடன்களை முடிவு செய்யலாம்.
