இந்திய ஆண்கள் கிரிக்கெட் அணி, ஜப்பான் அணிக்கு எதிராக வரலாற்றில் முதல் முறையாக டி20 போட்டியில் இன்று மோதுகிறது. ஜப்பான் சுற்றுப்பயணம் மேற்கொண்டுள்ள இந்திய அணி, அந்நாட்டு அணியுடன் ஒரே ஒரு டி20 போட்டியில் விளையாட உள்ளது.
இதுவரை இந்தியா மற்றும் ஜப்பான் கிரிக்கெட் அணிகள் சர்வதேச அளவில் நேருக்கு நேர் மோதியதில்லை என்பதால், இந்தப் போட்டி இரு நாடுகளின் கிரிக்கெட் ரசிகர்களிடையே மிகுந்த எதிர்பார்ப்பை ஏற்படுத்தியுள்ளது.
ஜப்பான் மண்ணில் இந்தியா – ஜப்பான் மோதல் :
இந்த வரலாற்றுச் சிறப்புமிக்க டி20 போட்டி, ஜப்பானின் டொஷிகி மாகாணத்தில் உள்ள சானோ சர்வதேச கிரிக்கெட் மைதானத்தில் நடைபெறுகிறது.
இந்திய நேரப்படி இன்று காலை 9.30 மணிக்கு போட்டி தொடங்க உள்ளது. இதற்காக இந்திய அணி ஜப்பான் சென்றடைந்து, போட்டிக்கான ஆயத்தப் பணிகளில் ஈடுபட்டு வருகிறது.
75 ஆண்டு நட்புறவை கொண்டாடும் போட்டி :
இந்தியா மற்றும் ஜப்பான் நாடுகளுக்கு இடையேயான தூதரக உறவு தொடங்கி 75 ஆண்டுகள் நிறைவடைந்துள்ள நிலையில், இரு நாடுகளின் நட்புறவை கொண்டாடும் வகையில் இந்த டி20 போட்டி நடத்தப்படுகிறது.
இந்த சிறப்பு போட்டியை காண ரசிகர்கள் அதிக ஆர்வம் காட்டிய நிலையில், போட்டிக்கான அனைத்து டிக்கெட்டுகளும் விற்றுத் தீர்ந்துள்ளதாக தெரிவிக்கப்பட்டுள்ளது.
மழை குறுக்கிடுமா? ரசிகர்கள் கவலை :
இதற்கிடையே, ஜப்பானில் நிலவும் வானிலை போட்டிக்கு சவாலாக மாறியுள்ளது. சானோ பகுதியில் பெய்த கனமழை காரணமாக இந்திய அணியின் பயிற்சி அமர்வு ரத்து செய்யப்பட்டதாக தகவல் வெளியாகியுள்ளது.
மேலும், இந்தியா – ஜப்பான் போட்டிக்கு முன்பாக நடைபெற்ற ஜப்பான் – ஹாங்காங் அணிகளுக்கு இடையேயான ஆட்டமும் மழையால் ஒரு பந்து கூட வீசப்படாமல் கைவிடப்பட்டது.
இதனால், இன்று நடைபெறும் வரலாற்றுச் சிறப்புமிக்க டி20 போட்டியில் மழையின் தாக்கம் இருக்குமா என்ற எதிர்பார்ப்பு எழுந்துள்ளது.
ஜப்பான் கிரிக்கெட்டுக்கு மிகப்பெரிய வாய்ப்பு :
உலகின் முன்னணி கிரிக்கெட் அணியான இந்தியாவை எதிர்கொள்வது ஜப்பான் அணிக்கு மிகப்பெரிய வாய்ப்பாக அமைந்துள்ளது. சொந்த மண்ணில் இந்திய அணியுடன் விளையாடும் இந்தப் போட்டி, ஜப்பான் கிரிக்கெட் வளர்ச்சியில் முக்கியமான நிகழ்வாக பார்க்கப்படுகிறது.
மழை தடையின்றி போட்டி முழுமையாக நடைபெறுமா என்பதை ரசிகர்கள் ஆவலுடன் எதிர்பார்த்து காத்திருக்கின்றனர்.
