`வாரத்திற்கு ஒருமுறை போதும்!' – நீரிழிவு நோயாளிகளுக்கான புதிய இன்சுலின்!

உலகின் முதல் வாரத்திற்கு ஒருமுறை செலுத்தப்படும் நீண்டகால இன்சுலின் மருந்தான அவிக்லி (Awiqli), சர்க்கரை நோய் சிகிச்சையில் புதிய மாற்றத்தை ஏற்படுத்தியுள்ளது.

இது குறித்து நீரிழிவு மருத்துவர்சத்யன் ராகவன், என்டோகிரைனாலஜிஸ்ட், பிரினித் கிளினிக், சேலம் – நம்முடன் விரிவாகப் பகிர்ந்து கொண்டார்.

“இதன் முக்கியக் கூறு இன்சுலின் ஐகோடெக் ஆகும். தினமும் இன்சுலின் செலுத்த வேண்டிய சிரமத்திற்கு மாற்றாக, மருத்துவர் பரிந்துரையின் அடிப்படையில் வாரத்திற்கு ஒருமுறை மட்டுமே ஊசி செலுத்தும் முறையை இது வழங்குகிறது. அவிக்லி பெரியவர்களுக்கான டைப்-1 மற்றும் டைப்-2 நீரிழிவு சிகிச்சையில் பயன்படுத்தப்படுகிறது.

டைப்-1 நீரிழிவு நோயாளிகளுக்கு உணவு நேரத்தில் தேவையான குறுகியகால இன்சுலினுடன் இது இணைக்கப்பட வேண்டும். டைப்-2 நீரிழிவு நோயாளிகளுக்கு தனியாகவோ அல்லது பிற நீரிழிவு மருந்துகளுடன் சேர்த்தோ பயன்படுத்த முடியும்.

நீரிழிவு நோய் இன்று இந்தியாவில் அதிகரித்து வரும் முக்கியமான உடல்நலப் பிரச்னைகளில் ஒன்றாகும். பல நோயாளிகளுக்கு, குறிப்பாக வகை 2 நீரிழிவு நோயில், காலப்போக்கில் ரத்தச் சர்க்கரையைக் கட்டுப்படுத்த இன்சுலின் தேவைப்படலாம். தினமும் இன்சுலின் ஊசி போட வேண்டியிருப்பது சிலருக்கு சிரமமாகவும், சில நேரங்களில் மருந்தை தவறவிடுவதற்கும் காரணமாக இருக்கலாம்.

இன்சுலின் ஐகோடெக் (Insulin Icodec) என்பது மிக நீண்டகாலம் செயல்படும் அடிப்படை இன்சுலின் (basal insulin) வகையைச் சேர்ந்தது.

இதன் முக்கியமான சிறப்பு, மருத்துவர் பரிந்துரைக்கும் சூழலில் வாரத்திற்கு ஒருமுறை செலுத்தக்கூடியதாக இருப்பதாகும். இதனால் தினசரி ஊசி செலுத்த வேண்டிய சுமை குறையலாம்.

இந்திய நோயாளிகளை உள்ளடக்கிய ONWARDS ஆய்வுகளில், ஐகோடெக் பயன்படுத்தியவர்களின் HbA1c குறைப்பு (3 மாத சர்க்கரை அளவு)மற்றும் ரத்தச் சர்க்கரை கட்டுப்பாடு தினசரி அடிப்படை இன்சுலின்களுடன் ஒப்பிடும்போது பொதுவாக ஒத்திருந்தது.

ஆனால், `வாரத்திற்கு ஒருமுறை’ என்பதால் இது அனைவருக்கும் ஏற்றது அல்லது ஆபத்தில்லாதது என்று பொருள் கொள்ளக் கூடாது.

ரத்தச் சர்க்கரை குறைதல் (ஹைப்போகிளைசீமியா) இன்சுலின் சிகிச்சையின் முக்கியமான பக்கவிளைவாகும். குறிப்பாக வகை 1 நீரிழிவு நோயாளிகளில் ஐகோடெக் பயன்படுத்தும்போது ரத்தச் சர்க்கரை குறைதல் குறித்து கூடுதல் கவனம் தேவைப்படலாம்.

எனவே, இன்சுலின் ஐகோடெக்கை மருத்துவரின் ஆலோசனை இல்லாமல் தொடங்கவோ, அளவை மாற்றவோ, நிறுத்தவோ கூடாது. சரியான ஊசி முறை, ரத்தச் சர்க்கரை கண்காணிப்பு, உணவு, உடற்பயிற்சி மற்றும் மருத்துவர் கூறும் பரிசோதனைகளை முறையாகப் பின்பற்ற வேண்டும்.

கண்ணோட்டம் மற்றும் அது செயல்படும் விதம்:

செயல்திறன் மிக்க மூலப்பொருள்:

இன்சுலின் ஐகோடெக், இது மிக நீண்ட நேரம் செயல்படும் ஒரு மனித இன்சுலின் அனலாக் ஆகும்.

செயல்முறை:

இது ரத்தத்தில் உள்ள சீரம் அல்புமினுடன் வலுவாகப் பிணைந்து, மெதுவாக வெளியாகும் ஒரு சேமிப்பிடத்தை உருவாக்குகிறது. இது முழு ஏழு நாள்களுக்கும் ரத்தச் சர்க்கரையின் அளவை சீராகக் குறைக்கும் விளைவை அளிக்கிறது.

சுமை குறைப்பு:

ஆண்டுதோறும் செலுத்தப்படும் அடிப்படை ஊசிகளின் எண்ணிக்கை, தினமும் செலுத்தப்படும் 365 டோஸ்களிலிருந்து, வருடத்திற்கு வெறும் 52 டோஸ்களாகக் குறைக்கப்படுகிறது.

பயன்படுத்தும் முறை:

ஒவ்வொரு வாரமும் ஒரே நாளில், வாரத்திற்கு ஒரு முறை அவிக்லி ஃப்ளக்ஸ் டச் ( Awiqli FlexTouch) பேனாவைப் பயன்படுத்தி தோலடி ஊசியாக (சப்-கியூடேனியஸ்) செலுத்தப்பட வேண்டும்.

நினைவில் கொள்ளுங்கள்:

புதிய சிகிச்சை என்பது அனைவருக்கும் ஒரே மாதிரியான சிகிச்சை அல்ல. உங்கள் நீரிழிவு நிலை, வயது, பிற நோய்கள் மற்றும் தற்போதைய மருந்துகளைப் பொறுத்து மருத்துவரே சிறந்த இன்சுலின் முறையைத் தேர்வு செய்ய வேண்டும்.

பக்க விளைவுகள் மற்றும் கவனிக்க வேண்டியவை

பொதுவான பக்க விளைவுகள்:

ஹைப்போகிளைசீமியா (குறைந்த ரத்த சர்க்கரை அளவு, குறிப்பாக சரியான நேரத்தில் அல்லது சரியான அளவில் கொடுக்கப்படாவிட்டால்), ஊசி போடும் இடத்தில் ஏற்படும் எதிர்வினைகள் மற்றும் உடல் எடை அதிகரிப்பு.

பாதுகாப்புக் கண்காணிப்பு:

சுகாதாரப் பராமரிப்பாளர்கள், குறிப்பாக மருந்தின் அளவைச் சரிசெய்யும் ஆரம்பக் கட்டத்தில், ரத்தச் சர்க்கரை அளவைக் கவனமாகக் கண்காணிக்குமாறு பரிந்துரைக்கப்படுகின்றனர்.”

நன்றி