விபத்தில் சிக்கினால் ஹெல்மெட்டிலிருந்து விரியும் ஏர்பேக் – வைரல் சீனா வீடியோ AI-ஆ? | Helmet Airbag That Opens During Accidents: Viral Video Real or AI-Generated?

Spread the love

பைக்கிலிருந்து கீழே விழும் நொடியில் ரைடரின் உடலை முழுமையாகச் சுற்றிக்கொள்ளும் ஏர்பேக்! சீனாவின் புதிய கண்டுபிடிப்பு எனப் பரவும் வீடியோ!

சாலை விபத்துகளின்போது இருசக்கர வாகன ஓட்டிகளின் உயிரைக் காப்பாற்ற ஹெல்மெட் முக்கியப் பாதுகாப்புக் கவசமாக இருக்கிறது. இந்நிலையில், விபத்து ஏற்படும்போது ஹெல்மெட்டிலிருந்து ஏர்பேக் விரிந்து ரைடரின் உடல் முழுவதையும் சுற்றிப் பாதுகாப்பது போன்ற வீடியோ ஒன்று சமூக வலைதளங்களில் வைரலாகி வருகிறது.

எப்படி இருக்கிறது இந்தத் தொழில்நுட்பம்?

வீடியோவில் மோட்டார் சைக்கிளில் செல்லும் ஒருவர் திடீரென நிலைதடுமாறிக் கீழே விழுகிறார். அவர் தரையில் மோதுவதற்கு முன்பே ஹெல்மெட்டிலிருந்து பலூன் போன்ற ஏர்பேக் விரிந்து, அவரது உடல் முழுவதையும் சுற்றிக்கொள்கிறது. இதனால் விபத்தின் தாக்கத்தைக் குறைக்க முடியும் என்பதுபோலக் காட்சிப்படுத்தப்பட்டுள்ளது.

இந்தத் தொழில்நுட்பத்தைச் சீனாவின் Lanxi Yema Motorcycle Fittings மற்றும் Yanfeng Automotive ஆகிய நிறுவனங்கள் உருவாக்கியதாக இணையத்தில் தகவல்கள் பரவின.

AI வீடியோவா? சந்தேகத்தை ஏற்படுத்தும் அடையாளங்கள்!

இந்த வீடியோவின் உண்மைத்தன்மை குறித்து ஆய்வு செய்தபோது சில முரண்பாடுகள் தெரியவந்துள்ளன. வீடியோவில் காணப்படும் ஹெல்மெட்டில் சீன நிறுவனத்தின் பெயருக்குப் பதிலாக இத்தாலியின் பிரபல ஹெல்மெட் நிறுவனமான AGV-யின் லோகோ இடம்பெற்றுள்ளது. அதேபோல், ரைடர் அணிந்திருக்கும் பாதுகாப்பு உடையிலும் இத்தாலிய நிறுவனமான Dainese-ன் அடையாளம் காணப்படுகிறது.

மேலும், இந்தத் தயாரிப்பை உருவாக்கியதாகக் கூறப்படும் இரு சீன நிறுவனங்களும் இதுவரை அதிகாரபூர்வமாக உறுதிப்படுத்தவில்லை. தயாரிப்புக்கான சான்றிதழ் அல்லது சுயாதீனப் பாதுகாப்புச் சோதனை முடிவுகளும் வெளியாகவில்லை. இதனால், இந்த வீடியோ AI மூலம் உருவாக்கப்பட்டிருக்கலாம் என்ற சந்தேகம் எழுந்துள்ளது.

உண்மையான ஏர்பேக் ஹெல்மெட் இருக்கிறதா?

ஆம்! 2022-ம் ஆண்டிலேயே இத்தாலியின் AIROH நிறுவனமும் ஸ்வீடனின் Autoliv நிறுவனமும் இணைந்து ஏர்பேக் தொழில்நுட்பம் கொண்ட ஹெல்மெட் முன்மாதிரியை (Prototype) அறிமுகப்படுத்தியுள்ளன. ஆனால், அது தற்போது வைரலாகும் முழு உடலையும் சுற்றிக்கொள்ளும் ஹெல்மெட்டிலிருந்து முற்றிலும் வேறுபட்டது.

எனவே, ஏர்பேக் ஹெல்மெட் தொழில்நுட்பம் ஆராயப்பட்டு வந்தாலும், வைரலாகும் வீடியோவில் காட்டப்படும் தயாரிப்பு உண்மையானது என்பதற்கு இதுவரை ஆதாரம் இல்லை.

நன்றி

Leave a Reply

Your email address will not be published. Required fields are marked *