2026 ஆசிய விளையாட்டுப் போட்டியின் இரண்டாவது பதக்க நாளில் இந்தியா அபாரமான ஆட்டத்தை வெளிப்படுத்தி நான்கு பதக்கங்களைக் குவித்துள்ளது. ஆண்களுக்கான 10 மீட்டர் ஏர் ரைபிள் (10m Air Rifle) தனிநபர் பிரிவில் இரண்டு பதக்கங்களுடன், குழுப் பிரிவில் வெள்ளியும் கிடைத்துள்ளது. மேலும், கலப்பு தற்காப்புக் கலையான எம்.எம்.ஏ-வில் (MMA) சூச்சிகா தரியல் வெண்கலம் வென்று வரலாறு படைத்துள்ளார். இதன் மூலம் இந்தியாவின் மொத்த பதக்க எண்ணிக்கை 6 ஆக உயர்ந்துள்ளது.
குறிக்கோளும் துல்லியமும்: ஷூட்டிங்கில் மிரட்டிய இந்தியா!
ஆண்களுக்கான 10 மீட்டர் ஏர் ரைபிள் குழுப் போட்டியில் ருத்ரங்ஷ் பட்டீல் (Rudrankksh Patil), ஹிமான்சு தில்லான் (Himanshu Dhillon), பார்த்த் மானே (Parth Mane) ஆகியோர் அடங்கிய கூட்டணி வெள்ளிப் பதக்கத்தைக் கைப்பற்றியது.
இதனைத் தொடர்ந்து நடைபெற்ற தனிநபர் இறுதிப் போட்டியில் ஹிமான்சு தில்லான் வெள்ளியையும், ருத்ரங்ஷ் பட்டீல் வெண்கலத்தையும் வென்றனர். இதன் மூலம் ஒரே தனிநபர் போட்டியில் இரண்டு இந்திய வீரர்கள் போடியம் (Podium) மேடையில் இடம்பிடித்து அசத்தியுள்ளனர். இதன் மூலம் இந்தியாவின் மொத்தமுள்ள 6 பதக்கங்களில் 5-ஐ ஷூட்டிங் துறை மட்டுமே ஈட்டிக் கொடுத்துள்ளது.
எம்.எம்.ஏ-வில் இந்தியாவுக்கான முதல் பதக்கம்!
ஆசிய விளையாட்டுப் போட்டிகளில் இந்த முறை முதல்முறையாக அறிமுகப்படுத்தப்பட்டுள்ள எம்.எம்.ஏ (Mixed Martial Arts) போட்டியில், இந்தியாவின் சூச்சிகா தரியல் வெண்கலப் பதக்கம் வென்று புதிய வரலாறு படைத்துள்ளார். சிங்கப்பூரின் ஹூய் கூன் தியோவுக்கு (Hui Hoon Teo) எதிரான அரையிறுதிப் போட்டி சமனில் முடிந்தது.
இதனைத் தொடர்ந்து, போட்டி விதிமுறைகளின் அடிப்படையில் எடையைக் கணக்கிட்டு வெற்றியாளர் தீர்மானிக்கப்பட்டார். இதில் எதிரணி வீராங்கனை இறுதிப் போட்டிக்கு முன்னேற, சூச்சிகா தரியல் வெண்கலப் பதக்கத்துடன் தனது பயணத்தை நிறைவு செய்தார்.
ஹாக்கி, கபடி மற்றும் பேட்மிண்டனில் வெற்றி!
பதக்க வேட்டையுடன் மற்ற விளையாட்டுகளிலும் இந்திய அணிகள் தங்களுடைய ஆதிக்கத்தைச் செலுத்தி வருகின்றன. மகளிர் ஹாக்கி பிரிவில் இந்தோனேசியா அணியை 17-1 என்ற கோல் கணக்கில் பந்தாடியது இந்திய மகளிர் அணி. கபடி போட்டிகளில் ஆண்கள் பிரிவில் ஜப்பானை 49-24 என்ற கணக்கிலும், பெண்கள் பிரிவில் வங்கதேசத்தை 42-21 என்ற கணக்கிலும் வீழ்த்தி அசத்தின. டேபிள் டென்னிஸ் போட்டியில் ஆண்கள் மற்றும் பெண்கள் இரு பிரிவுகளிலும் பாகிஸ்தானை 3-0 என வீழ்த்தியது. அதேபோல், ஆண்கள் பேட்மிண்டன் அணியும் வங்கதேசத்தை 3-0 என வீழ்த்தி அடுத்த சுற்றுக்கு முன்னேறியுள்ளது.
நாள் 3: தங்கப் பதக்கத்துக்காக மோதும் இந்தியா – இலங்கை!
செப்டம்பர் 22-ம் தேதி காலை 10:30 மணிக்கு நடைபெறும் மகளிர் கிரிக்கெட் தங்கப் பதக்கப் போட்டியில் இந்திய அணி இலங்கையை எதிர்கொள்கிறது. வங்கதேசத்திற்கு எதிரான அரையிறுதியில் ஷஃபாலி வர்மா 49 பந்துகளில் விளாசிய 100 ரன்கள் அணியின் பலத்தை உயர்த்தியுள்ள நிலையில், இந்தப் போட்டி இந்தியாவின் முதல் தங்கப் பதக்கத்திற்கான பொன்னான வாய்ப்பாகப் பார்க்கப்படுகிறது.
நாளை (செப். 22) கவனிக்க வேண்டிய முக்கியப் போட்டிகள்:
காலை 6:00 மணிக்கு மகளிர் பேட்மிண்டன் காலிறுதிப் போட்டியில் இந்திய அணி ஜப்பானை எதிர்கொள்கிறது. அதைத் தொடர்ந்து காலை 6:15 மணிக்கு 10 மீ ஏர் ரைபிள் கலப்பு அணிக்கான தகுதிச் சுற்றில் இளவேனில் வாலறிவன் மற்றும் பார்த்த் மானே இணை களமிறங்குகிறது. காலை 7:15 மணிக்கு நடைபெறும் ஆண்கள் கபடி போட்டியில் இந்தியாவும் தென் கொரியாவும் மோதுகின்றன. காலை 11:30 மணிக்கு ஆண்கள் பேட்மிண்டன் போட்டியில் இந்தியா ஜப்பானை எதிர்கொள்கிறது. மாலை 3:30 மணிக்கு நடைபெறும் ஆண்கள் ஹாக்கி போட்டியில் இந்தியா இலங்கையை எதிர்கொள்கிறது.
