Doctor Vikatan: சலூன்களில் இப்போதெல்லாம் ஒரே டிரிம்மரை எல்லோருக்கும் பயன்படுத்துகிறார்கள். இதனால் தொற்று ஏற்பட வாய்ப்பு இருக்கிறதா… இந்த விஷயத்தைச் சம்பந்தப்பட்டவர்களுக்கு எப்படி வலியுறுத்துவது?
-எஸ்.கீர்த்திவர்மன், புதுச்சேரி
பதில் சொல்கிறார், சென்னையைச் சேர்ந்த சருமநல மருத்துவர் பூர்ணிமா.
சலூன்களில் பயன்படுத்தும் டிரிம்மர்களில் உள்ள பிளேடுகள் மாற்றக்கூடியவை அல்ல. இவை சருமத்தின் அடியில் ஊடுருவிச் செல்பவையும் (Non-invasive) அல்ல. முடியின் நீளத்தை மட்டுமே குறைக்கக்கூடியவை. ஷேவிங் செய்யப் பயன்படும் பிளேடுகள் ஒருமுறை மட்டுமே பயன்படுத்தப்பட்டு மாற்றப்படுபவை. ஆனால், டிரிம்மர்கள் அப்படிப்பட்டவை அல்ல.
சலூன்களில் உங்களுக்குப் பயன்படுத்தும் டிரிம்மர்களை முறையாகச் சுத்தம் செய்கிறார்களா (Sanitization) என்று கவனியுங்கள். டிரிம்மர்களை ஆல்கஹால் ஸ்பிரே (Alcohol sprays) கொண்டு நன்கு சுத்தப்படுத்தி, துடைத்த பின்னரே பயன்படுத்த வேண்டும். இதை உறுதி செய்யுங்கள்.
ஒருவேளை கழற்றி மாட்டக்கூடிய மாடல் என்றால், கத்தரிக்கோல்களைச் சுத்தப்படுத்துவது போலவே, டிரிம்மர்களையும் புற ஊதாக்கதிர் சிகிச்சை (UV treatment) மூலம் கிருமி நீக்கம் செய்யலாம்.
அப்படிச் செய்கிறார்களா என்றும் பாருங்கள். கிருமி நீக்கம் செய்வதற்கு முன்பாக, சிறிய பிரஷ் கொண்டு பிளேடுகளுக்கு இடையில் சிக்கியுள்ள முடிகளை அகற்ற வேண்டும்.
டிரிம்மர்கள் மீண்டும் மீண்டும் பயன்படுத்தக்கூடியவை என்பதால், அவை முறையாக கிருமி நீக்கம் செய்யப்படுகின்றனவா என்பதை நாம் நிச்சயம் சரிபார்க்க வேண்டும்.
பிளேடுகளில் ஏதேனும் உடைந்திருந்தாலோ அல்லது துருப்பிடித்து இருந்தாலோ அதைப் பயன்படுத்த வேண்டாம் என உறுதியாகச் சொல்லுங்கள். இப்படிப்பட்ட கருவிகள், உங்கள் சருமத்தில் கீறல்களை ஏற்படுத்தி பாதிப்பை உண்டாக்கலாம்.
சலூன்களில் மட்டுமல்ல, பியூட்டி பார்லர்களில் பயன்படுத்தும் சீப்பு, பிரஷ், பெடிக்யூர், மெனிக்யூர் செய்யும் உபகரணங்கள் என அனைத்தையும் முறையாக ஸ்டெரிலைஸ் செய்துதான் பயன்படுத்துகிறார்களா என்பதை எல்லோரும் கவனிக்க வேண்டும்.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
