மும்பை வடாலாவில் வசிப்பவர் ஷெரீப் கான். கார்பெண்டரான ஷெரீப் மனைவி கடந்த ஆண்டு புற்று நோய் காரணமாக இறந்து போனார். இதையடுத்து தனது மகள்கள் ரிஃபாத்(20), நுஜாத்(16) மற்றும் 10 வயது மகன் அகமது ஆகியோருடன் வடலா கிழக்கு ஷேக் மிஸ்திரி தர்கா சாலையில் உள்ள மடோனா காலனியில் வசித்து வந்தார். தனது மனைவி இறந்த பிறகு குழந்தைகளை கவனித்துக்கொள்ள இரண்டாவது திருமணம் செய்ய ஷெரீப் முடிவு செய்தார். ஆனால் இதற்கு ரிஃபாத் மற்றும் நுஷாத் எதிர்ப்பு தெரிவித்ததாக கூறப்படுகிறது. இதனால் இது தொடர்பாக அடிக்கடி அவர்களுக்குள் வாக்குவாதம் ஏற்பட்டது.
குறிப்பாக ரிஃபாத், தனது தந்தையின் மறுமணத்தை கடுமையாக எதிர்த்ததாக கூறப்படுகிறது. கடந்த 2ம் தேதி ரிஃபத்தின் தாய்மாமன் அபு கான் லூதியானாவில் இருந்தபோது, ரிஃபத் இறந்துவிட்டதாக அவருக்குத் தகவல் கிடைத்தது. மொட்டை மாடியில் தூங்கச் செல்வதற்கு முன், ஷெரீஃப் வீட்டிற்குக் கொண்டு வந்த பிரியாணியை ரிஃபத்தும் நுஸ்ஹத்தும் சாப்பிட்டதாக ஷெரீப் தெரிவித்தார்.
பின்னர், புழுக்கம் அதிகமாக இருந்ததால் நுஸ்ஹத் தனது அத்தை கௌசியாவின் வீட்டிற்கு தூங்கச்சென்றுவிட்டார்.
மறுநாள் அதிகாலை சுமார் 5 மணியளவில், ஷெரீஃப் கௌசியாவின் வீட்டிற்குச் சென்று, ரிஃபத் எந்த அசைவும் இன்றி இருப்பதாகக் கூறினார். அதன்பின் உறவினர்கள் அவளை மருத்துவமனைக்குக் கொண்டு சென்றனர். அங்கு மருத்துவர்கள் அவளை சோதித்து பார்த்தபோது இறந்திருந்தது தெரிய வந்தது. மருத்துவர்கள் உடற்கூறாய்வு செய்ததில், கழுத்து இறுக்கப்பட்டதால் மூச்சுத்திணறல் ஏற்பட்டதற்கான அறிகுறிகள் இருப்பது கண்டறியப்பட்டது. இதையடுத்து டாக்டர்கள் போலீஸாருக்கு தகவல் கொடுத்தனர்.
போலீஸார் ஷெரீப்பை பிடித்துச்சென்று விசாரித்தபோது தான் வாங்கி வந்த பிரியாணியில் விஷம் கலந்து கொடுத்தது தெரிய வந்தது. விஷம் கலந்த பிரியாணியை சாப்பிட்ட பிறகு ரிஃபாத் மயங்கிவிட்டார். உடனே அவரது கழுத்தை நெரித்து கொலை செய்து இருப்பது விசாரணையில் தெரிய வந்தது. தனது இரண்டாவது திருமணத்திற்கு எதிர்ப்பு தெரிவித்ததால் கொலை செய்ததாக ஷெரீப் தெரிவித்துள்ளார். தனது இளைய மகளையும் கொலை செய்ய ஷெரீப் திட்டமிட்டு இருந்தார். ஆனால் அவர் தனது அத்தை வீட்டிற்கு சென்றுவிட்டதால் அவர் தப்பித்ததாக போலீஸார் தெரிவித்தனர். ஷெரீப்பை கைது செய்து மேற்கொண்டு விசாரித்து வருகின்றனர். கெட்டுப்போன பிரியாணியை சாப்பிட்டதால் இறந்துவிட்டதாக கூறி ஷெரீப் தப்பிக்க பார்த்தார். எனினும் விசாரணையில் அவர் சிக்கிக் கொண்டார்.
