கழிப்பறையைப் பயன்படுத்தும்போது ஆண்களின் சிறுநீர்ப் பாதை உறுப்புகள் கழிவறை இருக்கை அல்லது பிற இடங்களில் நேரடியாகப் படுவதில்லை. அதனால் பாக்டீரியாக்கள் அங்கு தங்கி மேலேறும் வாய்ப்பும் ஆண்களுக்கு மிகவும் குறைவு. பெண்களுக்கும்கூட பொதுக் கழிப்பறைகளைப் பயன்படுத்துவதால் தொற்று ஏற்படுவதற்கான வாய்ப்புகள் மிகக் குறைவுதான்.
உங்களைப் போன்ற டெலிவரி ஊழியர்களுக்குத் தொற்று ஏற்பட முதன்மையான காரணங்கள் பல உண்டு. தொடர்ச்சியாக டூ வீலரில் பயணம் செய்து டெலிவரி செய்வதால் உடல் வியர்த்து நீரிழப்பு (Dehydration) ஏற்படுகிறது. இது பாக்டீரியாக்கள் வளர்வதற்கான சூழலை உருவாக்குகிறது. சர்க்கரை நோய் (Diabetes) போன்ற பாதிப்புகள் சரிவரப் பராமரிக்கப்படாத போது, அதுவும் சிறுநீர்த் தொற்றுக்கான அபாயத்தை அதிகரிக்கிறது.
தொடர்ந்து வேலை செய்து கொண்டே இருப்பதால் சரியான நேரத்திற்கு கழிப்பறை செல்ல முடியாமல் சிறுநீரை நீண்ட நேரம் அடக்கி வைக்க நேரிடுகிறது. போதிய தண்ணீர் குடிக்காமல் சிறுநீரையும் அடக்கும் போது பாக்டீரியாக்கள் வேகமாகப் பெருகுகின்றன. நீண்டநேரம் இறுக்கமான ஆடைகளை அணிந்து வேலை செய்வதால், வியர்வை மற்றும் ஈரப்பதம் காரணமாக அந்த இடங்களில் பாக்டீரியாக்கள் தங்கி தொற்று ஏற்படலாம்.
சில விஷயங்களில் கவனமாக இருந்தால், சிறுநீர்ப்பாதை தொற்று ஏற்படுவதைத் தவிர்க்கலாம். டூவீலரில் செல்பவர்கள் எப்போதும் தங்களுடன் தண்ணீர் பாட்டில் வைத்துக்கொண்டு, தவறாமல் தண்ணீர் குடிக்க வேண்டும். இது பாக்டீரியாக்களை வெளியேற்றவும் உடலின் நீர்ச்சத்தைப் பராமரிக்கவும் உதவும். சிறுநீர் கழிக்கும் உணர்வு (Urge) வரும்போதெல்லாம் தகுந்த இடத்தைப் பார்த்து உடனுக்குடன் கழிப்பறையைப் பயன்படுத்துவது நல்லது. பருத்தியால் ஆன (Cotton) தளர்வான ஆடைகள் மற்றும் உள்ளாடைகளைப் பயன்படுத்துவது சிறந்தது.
சிறுநீர் கழிக்கும்போது ஏற்படும் சாதாரண எரிச்சலைக் கூட தொற்று (Infection) என்று தவறாகப் புரிந்து கொண்டு, பலர் தானாகவே ஆன்டிடிபயாடிக் (Antibiotics) மருந்துகளைச் சாப்பிடுகிறார்கள். பெரும்பாலும் போதிய தண்ணீர் குடிக்காததே இந்த எரிச்சலுக்குக் காரணமாக இருக்கும் என்பதால், மருத்துவ ஆலோசனையின்றி தவறாக மருந்து, மாத்திரைகள் எடுத்துக்கொள்வதைத் தவிர்க்க வேண்டும்.
டாக்டர் வில்வபதி எஸ். கார்த்திகேயன்:
சென்னை, அப்போலோ மருத்துவமனையில் நுண் அறுவை சிகிச்சை நிபுணர் மற்றும் ஆண்ட்ராலஜிஸ்ட்டாகப் பணிபுரிகிறார். இத்துறையில் 16 ஆண்டுகளுக்கும் மேலான அனுபவம் உள்ளவர்.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
