தமிழ் மொழியின் உரிமைக்காகவும், இந்தித் திணிப்புக்கு எதிராகவும் தொடர்ந்து குரல் கொடுத்து வருபவர் மதிமுக பொதுச்செயலாளர் வைகோ. நாடாளுமன்றத்திலும் அவர் பெரும்பாலும் தமிழ் மற்றும் ஆங்கிலத்திலேயே தனது கருத்துகளை முன்வைத்து வந்துள்ளார். இந்நிலையில், அவரது மகன் துரை வைகோ இந்தியில் பேசியிருப்பது அரசியல் வட்டாரத்தில் விவாதத்தை ஏற்படுத்தியுள்ளது.
வாக்குரிமை பறிப்பு குறித்து ஆவேசப் பேச்சு!
தலைமைத் தேர்தல் ஆணையர் ஞானேஷ் குமாருக்கு எதிராக இந்தியா கூட்டணி பல்வேறு போராட்டங்களை முன்னெடுத்து வருகிறது. இதன் ஒரு பகுதியாக நடைபெற்ற மாதிரி நாடாளுமன்றக் கூட்டத்தொடரில் துரை வைகோவும் பங்கேற்றுப் பேசினார்.
அப்போது, வாக்குரிமையை இழந்ததாகக் கூறப்படும் 13 கோடி குடிமக்களின் சார்பாகத் தான் பேசுவதாகக் குறிப்பிட்டார். சிறுபான்மையினர், பழங்குடியினர் உள்ளிட்டோரின் வாக்குரிமை பாதிக்கப்படுவது ஜனநாயகத்திற்கும் அரசியலமைப்பிற்கும் அச்சுறுத்தல் எனத் தனது உரையில் தெரிவித்தார்.
மேலும், வாக்குரிமை என்பது ஜனநாயகத்தின் அடிப்படை உரிமை என்றும், அதை எந்தவொரு இந்தியக் குடிமகனுக்கும் மறுக்கக் கூடாது என்றும் வலியுறுத்தினார். தேர்தல் நடைமுறைகளில் முறைகேடுகள் நடைபெறுவதாகக் குற்றம்சாட்டிய அவர், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும் பேசினார்.
‘எனக்கு இந்தி தெரியாது’… ஆனாலும் இந்தியில் பேசிய துரை வைகோ!
ஆங்கிலத்தில் தனது உரையைத் தொடங்கிய துரை வைகோ, இறுதிப் பகுதியில் இந்தியில் பேசினார். அப்போது, தனக்கு இந்தி தெரியாது என்றும், இருப்பினும் தமிழ்நாடு என்ன சொல்ல விரும்புகிறது என்பதை நாடு அறிய வேண்டும் என்பதற்காக இந்தியில் சில கருத்துகளை முன்வைப்பதாகவும் தெரிவித்தார்.
மேலும், பெரும்பாலான தமிழர்களுக்கு இந்தி பேசத் தெரியாது என்று குறிப்பிட்ட அவர், வாக்குத் திருட்டு நிறுத்தப்பட வேண்டும், தலைமைத் தேர்தல் ஆணையர் உடனடியாகப் பதவி விலக வேண்டும், அரசியலமைப்புச் சட்டமும் ஜனநாயகமும் பாதுகாக்கப்பட வேண்டும் என முழக்கமிட்டார்.
தொடர்ந்து மதச்சார்பின்மை வாழ்க, சமூக நீதி வெல்க, ஜனநாயகம் தழைக்கட்டும் என்றும் இந்தியில் தனது உரையை நிறைவு செய்தார்.
வைகோவின் பழைய பேச்சை சுட்டிக்காட்டும் நெட்டிசன்கள்!
துரை வைகோவின் இந்திப் பேச்சு தற்போது சமூக வலைதளங்களில் விவாதமாகியுள்ளது. குறிப்பாக, இந்தி மொழித் திணிப்புக்கு எதிராகத் தொடர்ந்து குரல் கொடுக்கும் மதிமுகவின் முக்கிய நிர்வாகி ஒருவர் இந்தியில் பேசியிருப்பது முரண்பாடாக இருப்பதாகச் சிலர் விமர்சித்து வருகின்றனர்.
மேலும், அவர் இந்தி உரையை ஆங்கிலத்தில் எழுதி வைத்துப் படிப்பது போன்றே இருப்பதாகவும் சிலர் கருத்து தெரிவித்து வருகின்றனர்.
இதற்கிடையே, நாடாளுமன்றத்தில் இந்தியில் பேசப்படும் உரைகள் அவையின் தரத்தைக் குறைத்துவிட்டதாக வைகோ முன்பு தெரிவித்திருந்த கருத்துகளையும் நெட்டிசன்கள் மீண்டும் பகிர்ந்து வருகின்றனர்.
இந்தி மொழித் திணிப்புக்கு எதிரான மதிமுகவின் அரசியல் நிலைப்பாட்டுக்கு மத்தியில், துரை வைகோவின் இந்திப் பேச்சு தற்போது புதிய விவாதத்தை ஏற்படுத்தியுள்ளது. அவர் இந்தியில் பேசியதன் பின்னணியில் உள்ள காரணம் என்ன என்பது குறித்தும் சமூக வலைதளங்களில் கேள்விகள் எழுப்பப்பட்டு வருகின்றன.
