இதுதான் நம்பிக்கை! 5.3 லட்சம் மனிதர்களின் ஒற்றைக் கனவு! ஸ்பெயினின் திமிரை உடைத்த 40 வயது ‘கிழவன்’ | How a 40-Year-Old Goalkeeper From a Tiny Island Nation of 530K Just Shocked Spain in the World Cup

Sports

oi-Shyamsundar I

Published: Wednesday, June 17, 2026, 12:48 [IST]

சென்னை: உலகக் கோப்பை கால்பந்து திருவிழாவின் பச்சைப்புல்வெளிகள் எத்தனையோ ஆச்சரியங்களை, அதிசயங்களை நமக்குக் காட்டியிருக்கின்றன. ஆனால், 2026 உலகக் கோப்பை அரங்கில், அட்லாண்டாவின் மெர்சிடிஸ் பென்ஸ் மைதானத்தில் நடந்த அந்த ஆட்டம் கால்பந்து வரலாற்றில் அழியாத ஒரு காவியம்.

ஒருபுறம், உலகக் கால்பந்தையே தன் காலடியில் வைத்திருக்கும் முன்னாள் சாம்பியன், நட்சத்திர பட்டாளங்கள் நிறைந்த ஸ்பெயின். மறுபுறம், உலகக் கோப்பைக்கு முதன்முறையாகத் தகுதி பெற்று, வெறும் 5 லட்சத்து 30 ஆயிரம் மக்கள் தொகையை மட்டுமே கொண்ட ‘காபோ வெர்டே’ (Cabo Verde) என்ற குட்டி தீவு நாடு.

யாரும் இந்த ஆட்டத்தில் காபோ வெர்டே ஒரு நிமிடம் கூடத் தாக்குப் பிடிக்கும் என்று நினைக்கவில்லை. ஆனால், 90 நிமிடங்களின் முடிவில் ஸ்கோர் போர்டு 0-0 என நின்றபோது, ஒட்டுமொத்த உலகமும் அதிர்ச்சியில் உறைந்தது. அந்த சமநிலை, காபோ வெர்டேவுக்கு உலகக் கோப்பையை வென்றதற்கு இணையான பெருமிதம். இந்த சாதனையை செய்ய காரணமான நபர் ஒரு கிழவன் என்றால் நம்ப முடிகிறதா? ஹீரோ கடைசி வரை பெரிய ஆள் ஆக ஆசைப்பட்டு கடைசியில் முடியெல்லாம் வெள்ளையாகி.. 40 வயதில் சாதிப்பதை ஜெர்சி போன்ற படங்களில் பார்த்திருப்போம்.. ஆனால் அதை நிஜத்தில் செய்து காட்டி உள்ளார் இந்த 40 வயது கிழவர்! மொத்த உலகக்கோப்பையும் திரும்பி பார்க்க வைத்துள்ளார் இந்த வோசின்ஹா!

ஸ்பெயினின் 27 கோல் முயற்சிகளையும் ஒற்றை மனிதனாகத் தடுத்து நிறுத்திய அந்த 40 வயது ‘கிழவன்’ யார்?

அவரது பின்னணி என்ன?யார் இந்த வோசின்ஹா? (Vozinha)

அவரது உண்மையான பெயர் ஜோசிமார் ஜோஸ் எவோரா டயஸ் (Josimar José Évora Dias). ஆனால், அவரது ஜெர்சியில் பொறிக்கப்பட்டிருந்த பெயர் ‘வோசின்ஹா’. போர்ச்சுகீசிய மொழியில் இதற்கு “சின்ன பாட்டி” அல்லது “குட்டி குரல்” என்று அர்த்தம்.

இவரின் வயது காரணமாக.. இவரை கிழவன் என்று பலரும் அழைப்பதுண்டு! காபோ வெர்டேவின் மைண்டெலோ தீவில் பிறந்த இந்த ஜோசிமாரை வளர்த்தது அவரது தாத்தாவும் பாட்டியும்தான். தந்தை ராணுவத்தில் இருக்க, தாய் குடும்பத்தைக் காப்பாற்ற பகல்-இரவாக உழைத்தார்.

அதனால், பாட்டியின் நிழலில் வளர்ந்த இவருக்கு சிறுவயதிலேயே அந்தப் பெயர் ஒட்டிக்கொண்டது. பின்னாட்களில் அங்கோலா நாட்டு கிளப் ஒன்றில் விளையாடச் சென்றபோது, அங்கும் ஜோசிமார் என்ற பெயரில் மற்றொரு கோல்கீப்பர் இருக்கவே, “நான் ஜோசிமார்-II என்று என் சட்டையில் எழுத விரும்பவில்லை. என் நாட்டின் நினைவாக வோசின்ஹாவாகவே இருக்கிறேன்” என்று அந்தப் பெயரையே தன் அடையாளமாக்கிக் கொண்டான்.

25 வயது வரை அங்கீகாரம் இல்லாத போராட்டம்

இன்றைய நவீன கால்பந்து உலகில் 16 வயதிலேயே வீரர்கள் கோடீஸ்வரர்களாக மாறிவிடுகிறார்கள். ஆனால், வோசின்ஹாவின் கதை வேறு. வறுமையும், வாய்ப்பு மறுப்பும் அவனைத் துரத்தின. அவரது உயரத்தைக் காரணம் காட்டி பல உள்ளூர் கிளப்புகள் அவனை நிராகரித்தன. தெருக்களில் பெரிய பையன்களுடன் விளையாடி, உதைபட்டு, மிதிபட்டுத்தான் அவன் கால்பந்தைக் கற்றுக் கொண்டார்.

அவன் ஒரு தொழில்முறை கால்பந்து வீரனாக (Professional Footballer) தனது முதல் ஒப்பந்தத்தைக் கையெழுத்திட்டபோது அவரது வயது 25! பெரும்பாலான வீரர்கள் ஓய்வு பற்றி யோசிக்கும் வயதில் தான் அவரது பயணமே தொடங்கியது. அதன் பிறகு அவன் ஒரு நாடோடியைப் போல சுற்றினார். காபோ வெர்டே, அங்கோலா, மால்டோவா, சைப்ரஸ், ஸ்லோவாக்கியா என ஐரோப்பாவின் அடித்தட்டு, இரண்டாம் தர லீக் போட்டிகளில் மட்டுமே அவனுக்கு இடம் கிடைத்தது. தற்போது போர்ச்சுகலின் இரண்டாம் டிவிஷன் கிளப்பான ‘சாவேஸ்’ (Chaves) அணிக்காக விளையாடி வருகிறார்.

இன்னும் இரண்டு வாரங்களில் அவரது ஒப்பந்தம் முடிகிறது. அடுத்த மாதம் சோற்றுக்கு என்ன வழி என்று தெரியாத ஒரு நடுத்தர வயது மனிதன்தான், இன்று உலகக் கோப்பையின் நாயகன்!

ஸ்பெயினின் பெருமூச்சும், வோசின்ஹாவின் வியூகமும்ஜூன் 15 ஆட்டத்தின் புள்ளிவிவரங்களைப் பார்த்தால் ஸ்பெயின் எவ்வளவு கொடூரமாகத் தாக்கியது என்பது புரியும். ஆட்டத்தின் 74 சதவீத நேரம் பந்து ஸ்பெயின் வீரர்களின் கால்களில்தான் இருந்தது.

லாமின் யமால் (Lamine Yamal), பெத்ரி (Pedri), ஃபெரான் டோரஸ் என உலகத்தரம் வாய்ந்த வீரர்கள் காபோ வெர்டேவின் கோல் போஸ்டை நோக்கிப் பாய்களைப் போல சீறினர். ஆனால், அங்கு நின்றிருந்தது ஒரு மனிதன் அல்ல; 5.3 லட்சம் மக்களின் கனவுகளால் ஆன ஒரு இரும்புச் சுவர்.முதல் பாதியின் அற்புதம்: ஆட்டத்தின் முதல் பாதியில் பெத்ரியும், டோரஸும் அடித்த மிகத் துல்லியமான பந்துகளை பூனையின் வேகத்தில் பாய்ந்து தடுத்தார் வோசின்ஹா.

பிராப்பரான தடுப்பாட்டம் (Dogged Defence): காபோ வெர்டேவின் டிஃபென்டர்கள் ராபர்ட்டோ லோப்ஸ் போன்றவர்கள் தங்கள் உடலையே கேடயமாக மாற்றி ஸ்பெயின் வீரர்களை முடக்கினர். ஒருகட்டத்தில் டிஃபென்ஸ் உடைந்தபோதும், வோசின்ஹா இறுதி அரணாக நின்றார். 7 அசாத்தியத் தடுப்புகள் (Crucial Saves): ஆட்டத்தின் இரண்டாம் பாதியில் இளம் புயல் லாமின் யமால் பந்தை கோலுக்குள் திணிக்க முயன்றபோது, தனது 40 வயது உடலை காற்றில் பறக்கவிட்டு வோசின்ஹா செய்த அந்த சேவ், உலகக் கோப்பை வரலாற்றின் ஆகச்சிறந்த தருணம்.

கண்ணீரும்… 60 லட்சம் ரசிகர்களும்!

ஆட்டத்தின் இறுதி விசிலை நடுவர் ஊதியபோது, ஸ்பெயின் வீரர்கள் ஏமாற்றத்துடன் தலைகுனிந்தனர். ஆனால், வோசின்ஹா மைதானத்திலேயே மண்டியிட்டு, நெஞ்சில் கைவைத்து அழத் தொடங்கினான். அது தோல்வியின் கண்ணீர் அல்ல; தன் வாழ்நாளின் 40 ஆண்டு கால அவமானங்களுக்கும், உழைப்புக்கும் கிடைத்த அங்கீகாரத்தின் கண்ணீர்.”என் வாழ்நாள் முழுவதும் இந்த ஒரு தருணத்திற்காக, இந்த ஒரு கனவிற்காக மட்டுமே உழைத்தேன். பலமுறை கால்பந்தே வேண்டாம் என்று ஒதுங்க நினைத்தேன். ஆனால், என் நாட்டின் மீதான கனவு என்னை ஓட வைத்தது,” என்று ஆட்டத்திற்குப் பின் அவர் உருகினார்.

போட்டி தொடங்குவதற்கு முன்னால், இன்ஸ்டாகிராமில் வெறும் 50,000 பின்தொடர்பவர்களை மட்டுமே கொண்டிருந்த வோசின்ஹாவின் கணக்கு, பிரேசில் யூடியூபர் காஸேடிவி (CazéTV) தொடங்கிய பிரச்சாரத்தால், அடுத்த சில மணி நேரங்களிலேயே 58 லட்சத்தைக் (5.8 Million) கடந்து சாதனை படைத்தது. தற்போது 12 மில்லியனை கடந்துவிட்டது. உலகக் கோப்பை வரலாற்றில், ஒரு நாடு தனது அறிமுகப் போட்டியில் களம் காணும்போது விளையாடிய மிக வயதான வீரர் (40 ஆண்டுகள் 12 நாட்கள்) என்ற வரலாற்றுச் சாதனையை வோசின்ஹா படைத்துள்ளார்.ஸ்பெயினுக்கு இது ஒரு ஏமாற்றமான சமநிலை (Draw). ஆனால், உலகக் கால்பந்து வரைபடத்தில் காபோ வெர்டே என்ற புள்ளியைத் தன் ஒற்றைக் கையால் செதுக்கிய வோசின்ஹாவிற்கு, இது உலகக் கோப்பையை விடப் பெரிய வரலாற்று வெற்றி!