ராணிப்பேட்டை மாவட்டம், வாலாஜாபேட்டை பாரதி நகரைச் சேர்ந்த 28 வயதான இளைஞன் பிரசாந்த். மளிகைக் கடையில் வேலை செய்யும் சாதாரண கூலித்தொழிலாளியான பிரசாந்த்துக்கு இன்ஸ்டாகிராம் மூலம் கள்ளக்குறிச்சி மாவட்டத்திலுள்ள உளுந்தூர்பேட்டையைச் சேர்ந்த சுபலட்சுமி என்ற 21 வயது இளம்பெண் ஓராண்டுக்கு முன்பு அறிமுகமாகியுள்ளார்.
இருவருக்கும் இன்ஸ்டாவிலேயே காதல் மலர்ந்துள்ளது. இதையடுத்து, பிரசாந்த் அழைத்ததன்பேரில் தனது பெற்றோருக்குத் தெரியாமல் வீட்டிலிருந்து வெளியேறி வாலாஜாபேட்டைக்கு வந்துள்ளார் சுபலட்சுமி. இருவரும் திருமணம் செய்து கொள்ளாமல் `லிவிங் டுகெதர்’ உறவுமுறையில் கணவன் – மனைவி போல வீடு வாடகைக்கு எடுத்து சேர்ந்து வாழ்ந்துள்ளனர்.
இந்த நிலையில், இருவருக்குமிடையே கருத்து – வேறுபாடு ஏற்பட்டுள்ளது. அடிக்கடி சண்டைப் போட்டுக்கொண்டதால் மன வேதனைக்குள்ளான சுபலட்சுமி இன்று விஷம் குடித்து தற்கொலை செய்து கொண்டுள்ளார். பிரசாந்த்தும் தூக்குப்போட்டு தனது உயிரை மாய்த்துக்கொண்டுள்ளார். இதைக் கண்ட உறவினர்கள் வாலாஜாபேட்டை போலீஸாருக்குத் தகவல் தெரியப்படுத்தியுள்ளனர்.
போலீஸார் சம்பவ இடத்துக்குச் சென்று உடல்களை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்துள்ளனர். மேலும், இவர்களின் மரணம் குறித்து தீவிரமாக விசாரணையும் மேற்கொண்டு வருகிறார்கள்.
