International
oi-Shyamsundar I
பெய்ஜிங்: நாம் தூங்கிக் கொண்டிருக்கும் நேரத்திலும், வேலைக்கு செல்லாமல் இருக்கும் நேரத்திலும் நமது முகம் நமக்காகப் பணம் சம்பாதித்துக் கொடுத்தால் எப்படி இருக்கும்? கேட்பதற்கு சினிமா கதை போல தோன்றினாலும், சீனாவில் இது இப்போது நிஜமாகி வருகிறது.
சீனாவில் செயற்கை நுண்ணறிவு (AI) தொழில்நுட்பம் அசுர வேகத்தில் வளர்ந்து வருகிறது. இதன் விளைவாக, சாதாரண பொதுமக்களின் முகங்களை வாடகைக்கு எடுத்து, குறும்படங்கள், விளம்பரங்கள் மற்றும் வீடியோ கேம்களில் பயன்படுத்தும் புதிய ஆன்லைன் வர்த்தகம் தொடங்கியுள்ளது. முன்பு சினிமா வட்டார வாட்ஸ்அப் குழுக்களில் ரகசியமாக நடந்த இந்த விஷயம், இப்போது பொதுவான செயலிகள் வழியாகவே பகிரங்கமாக நடக்கத் தொடங்கியுள்ளது.
முகம் வாடகைக்கு கிடைப்பது எப்படி?
இதற்கான நடைமுறை மிகவும் எளிமையானது. இதற்கென உருவான செயலிகளில் மக்கள் தங்களின் ஆதார் அல்லது அடையாள அட்டையை வைத்து பதிவு செய்து கொள்கிறார்கள். பின்னர் தங்களின் தெளிவான புகைப்படங்களை பதிவேற்றி, டிஜிட்டல் நடிகர் என்ற சுயவிவரப் பக்கத்தை உருவாக்குகிறார்கள்.
சீனாவின் ஷென்சென் நகரைச் சேர்ந்த ‘யுவான்ஷியாங் சின்ஷெங்’, மற்றும் ‘ஆக்ட்ஐடி’ போன்ற நிறுவனங்கள் இந்த சேவையை வழங்கி வருகின்றன. AI முறையில் படங்கள் எடுக்கும் இயக்குநர்கள் இந்த செயலிகளில் உள்ள சாதாரண முகங்களை பார்த்து, தங்களுக்குப் பிடித்தமான முகத்தைத் தேர்ந்தெடுத்துக் கொள்கிறார்கள். நீங்கள் நேரில் சென்று நடிக்க வேண்டியதில்லை, உங்கள் முகத்தின் அனுமதி மட்டும் கொடுத்தால் போதும்.
எவ்வளவு சம்பாதிக்க முடியும்?
வருமானம் என்பது உங்கள் முகம் எந்த அளவுக்குப் பயன்படுகிறது என்பதைப் பொறுத்து மாறுகிறது. தென்சீன மார்னிங் போஸ்ட் வெளியிட்டுள்ள தகவலின்படி, ஒரு வங்கி ஊழியரின் முகத்தை ஒரு விளம்பர நிறுவனம் மூன்று நாட்களில் ஏழு முறை பயன்படுத்தியதற்காக அவருக்கு சுமார் 30,000 ரூபாய்க்கும் மேல் (2,500 யுவான்) கிடைத்துள்ளது.
சில நிறுவனங்கள் ஒரு எபிசோடுக்கு ரூ.1,400 முதல் ரூ.6,000 வரை மட்டுமே தருகின்றன. சந்தையில் குறைந்தபட்சம் ரூ.600 முதல் அதிகபட்சமாக ரூ.14 லட்சம் வரை தங்களின் முகத்தின் மதிப்புக்கு கட்டணம் நிர்ணயிப்பவர்கள் உள்ளனர். செல்ஃபி எடுத்த உடனே கோடீஸ்வரர் ஆக முடியாது என்றாலும், வீட்டில் இருந்தபடியே தங்கள் முகத்தை ஒரு சொத்து போல மாற்றி பணம் ஈட்டுவது பலரையும் கவர்ந்துள்ளது.
AI தானே உருவாக்கும் போது, உண்மையான முகம் எதற்கு?
AI தொழில்நுட்பத்தால் முற்றிலும் கற்பனையான முகங்களை சில நொடிகளில் உருவாக்க முடியும். அப்படியிருக்க, இயக்குநர்கள் ஏன் சாதாரண மக்களின் முகத்திற்கு பணம் கொடுக்கிறார்கள்?
முற்றிலும் கணினியால் உருவாக்கப்பட்ட முகங்கள் சில சமயம் செயற்கையாகத் தெரியும். ஆனால் உண்மையான மனிதர்களின் முகங்களில் தான் தனித்துவமான உணர்ச்சிகளும், நிஜமான மனிதத் தோற்றமும் இருக்கும். குறிப்பாக நடுத்தர வயதுடையவர்கள் மற்றும் முதியவர்களின் கதாபாத்திரங்களுக்கு நிஜ மனிதர்களின் முகங்களே பொருத்தமாக இருப்பதாக தயாரிப்பாளர்கள் கூறுகிறார்கள். AI மூலம் ஒரு மாதத்தில் மிகக் குறைந்த செலவில் குறும்படங்களை எடுத்து முடிக்க இந்த முறை தயாரிப்பாளர்களுக்குப் பெருமளவில் உதவுகிறது.
இதில் ஒளிந்திருக்கும் ஆபத்துகள் என்ன?
பணம் எளிதாகக் கிடைப்பது போலத் தெரிந்தாலும், இதில் மிகப்பெரிய சிக்கல்களும் உள்ளன. நாம் ஒருமுறை நமது முகத்தைப் பயன்படுத்த அனுமதி கொடுத்துவிட்டால், அதை அவர்கள் எப்படி மாற்றி அமைப்பார்கள் என்பது நம் கட்டுப்பாட்டில் இருக்காது.
தவறான விளம்பரங்களிலோ அல்லது ஆபாசமான காட்சிகளிலோ நமது உருவத்தை தவறாகப் பயன்படுத்திவிட்டால், அதைத் தடுப்பது கடினம். மேலும் ஒப்பந்தங்களில் கையெழுத்திடும் போது நமது உரிமை பறிபோகும் அபாயமும் உள்ளதாகச் சட்ட வல்லுநர்கள் எச்சரிக்கின்றனர்.
இந்தியாவில் இது சாத்தியமா?
இந்தியாவில் இந்த வடிவம் இன்னும் சாதாரண மக்களிடம் பரவவில்லை என்றாலும், பிரபலங்கள் மத்தியில் AI நுழைந்துவிட்டது. பிரபல நடிகை ரியா சக்ரவர்த்தி, ‘மிஷ்டி’ என்ற தனது AI டிஜிட்டல் அவதாரத்தை அறிமுகம் செய்து ரசிகர்களுடன் உரையாடி வருகிறார். எதிர்காலத்தில் இந்தியாவிலும் சாதாரண மக்களின் முகங்களை வாடகைக்கு எடுக்கும் காலம் வெகுதொலைவில் இல்லை.
AI தொழில்நுட்பம் மனித உழைப்பைக் குறைத்து வசதிகளைத் தந்தாலும், பணத்திற்காக நமது சொந்த முகத்தின் கட்டுப்பாட்டையே பிறருக்கு விட்டுக்கொடுக்க நாம் தயாரா என்ற கேள்வி தான் இப்போது விவாதத்தை ஏற்படுத்தியுள்ளது.
