டெல்லியில் அமைச்சர் நாற்காலி… தமிழ்நாட்டில் கட்சிப் பணி! எல்.முருகனின் அடுத்த மூவ் இதுதானா? மத்திய இணையமைச்சர் பதவியிலிருந்து ராஜினாமா செய்திருப்பதாக வெளியாகியுள்ள தகவல், தமிழ்நாடு பாஜக அரசியலில் புதிய கேள்விகளைத் தட்டியெழுப்பியிருக்கிறது.
2029 மக்களவைத் தேர்தலுக்கு முன்னதாகத் தமிழ்நாட்டில் பாஜகவை வலுப்படுத்தும் பணிக்காக, முழுநேரமும் என்னை அர்ப்பணித்துக்கொண்டு, கட்சியின் அடிமட்டத் தொண்டர்களுடன் இணைந்து பணியாற்ற விரும்புகிறேன்” என்று எல்.முருகன் எக்ஸ் தளத்தில் பதிவிட்டிருப்பதுதான் இப்போது ஹாட் டாபிக்!
மத்திய இணை மந்திரி பதவியை ராஜினாமா செய்த எல்.முருகன்
பாஜகவின் முக்கியத் தலைவர்களில் ஒருவரான எல்.முருகன், மத்திய அரசில் நாடாளுமன்ற விவகாரங்கள் துறை மற்றும் தகவல் ஒலிபரப்புத் துறையின் இணை மந்திரியாகப் பணியாற்றி வந்தார். இந்நிலையில், தனது மத்திய இணை மந்திரி பதவியிலிருந்து அவர் ராஜினாமா செய்துள்ளார்.
மத்திய அரசில் தனக்குப் பொறுப்பு வழங்கி, பணியாற்றுவதற்கான வாய்ப்பை அளித்த பிரதமர் நரேந்திர மோடிக்கு எல்.முருகன் நன்றி தெரிவித்துள்ளார். அவரது இந்த முடிவு தமிழ்நாட்டின் அரசியல் சூழலில் பல்வேறு எதிர்பார்ப்புகளை ஏற்படுத்தியுள்ளது.
நயினாருக்கு குட்பை சொல்லப்படுமா?
தமிழ்நாடு பாஜக மாநிலத் தலைவராக நயினார் நாகேந்திரன் இருக்கும் நிலையில், எல்.முருகனின் இந்த அறிவிப்பு அடுத்த மாநிலத் தலைவர் யார் என்ற விவாதத்தையும் கிளப்பியிருக்கிறது.
ஏற்கெனவே அந்தப் பதவியை வகித்த அனுபவம் எல்.முருகனுக்கு இருக்கிறது. இப்போது அவரே தமிழ்நாட்டில் கட்சிப் பணிகளில் முழுநேரமும் ஈடுபட விரும்புவதாகக் கூறியிருப்பதால், மீண்டும் மாநிலத் தலைவர் பொறுப்புக்கு வருவாரா என்ற எதிர்பார்ப்பு உருவாகியுள்ளது.
ஆனால், இங்கேதான் ஒரு முக்கியமான கேள்வி! எல்.முருகன் தமிழ்நாட்டில் கட்சிப் பணியாற்ற விரும்புகிறார் என்பதற்காக, அவருக்கு மாநிலத் தலைவர் பதவி வழங்கப்படும் என்று அர்த்தமா? அல்லது வேறு ஏதேனும் அமைப்புப் பொறுப்பை பாஜக மேலிடம் வழங்குமா?
இதற்கான பதில் இப்போதைக்கு இல்லை. நயினார் நாகேந்திரன் மாற்றப்படுவார் என்றோ, எல்.முருகன் மீண்டும் மாநிலத் தலைவராக நியமிக்கப்படுவார் என்றோ அதிகாரப்பூர்வ அறிவிப்பு வெளியாகவில்லை.
தமிழ்நாடு பாஜக தலைவராகப் பணியாற்றிய அனுபவம்
எல்.முருகன், 2020 முதல் 2021ஆம் ஆண்டு வரை தமிழ்நாடு பாஜக மாநிலத் தலைவராகப் பொறுப்பு வகித்தார். அவரது தலைமையில் தமிழ்நாட்டில் கட்சியின் அமைப்பை விரிவுபடுத்துவதற்கான பல்வேறு நடவடிக்கைகள் மேற்கொள்ளப்பட்டன.
இதையடுத்து, மத்திய அமைச்சரவையில் அவருக்கு வாய்ப்பு வழங்கப்பட்டது. 2021 முதல் 2024ஆம் ஆண்டு வரை மீன்வளம், கால்நடை பராமரிப்பு மற்றும் பால்வளத்துறை இணை மந்திரியாகப் பணியாற்றிய அவர், பின்னர் நாடாளுமன்ற விவகாரங்கள் மற்றும் தகவல் ஒலிபரப்புத் துறைகளில் இணை மந்திரியாகச் செயல்பட்டு வந்தார்.
2029 நாடாளுமன்றத் தேர்தல்: தமிழ்நாட்டில் கவனம்!
மத்திய இணை மந்திரி பதவியிலிருந்து விலகியுள்ள எல்.முருகன், தனது அடுத்தகட்ட அரசியல் பணிகள் குறித்து முக்கியமான கருத்தைத் தெரிவித்துள்ளார். 2029ஆம் ஆண்டு நடைபெறவுள்ள நாடாளுமன்றத் தேர்தலில் தமிழ்நாட்டில் பாஜகவை வலுப்படுத்த முழுமையான அர்ப்பணிப்புடன் பணியாற்றப் போவதாக அவர் குறிப்பிட்டுள்ளார்.
தமிழ்நாட்டில் பாஜகவின் வாக்கு வங்கியை விரிவுபடுத்துவது, கட்சியின் அமைப்பை வலுப்படுத்துவது, மக்களிடையே கட்சியின் செல்வாக்கை அதிகரிப்பது போன்ற பணிகள் அடுத்தடுத்த ஆண்டுகளில் முக்கியத்துவம் பெறலாம். இந்தச் சூழலில், எல்.முருகனின் அரசியல் அனுபவம் கட்சிக்கு எந்த வகையில் பயன்படும் என்ற எதிர்பார்ப்பும் எழுந்துள்ளது.
மீண்டும் தமிழ்நாடு பாஜக மாநிலத் தலைவர் ஆகிறாரா?
எல்.முருகன் தனது மத்திய இணை மந்திரி பதவியை ராஜினாமா செய்திருப்பதும், தமிழ்நாட்டில் பாஜகவை வலுப்படுத்தப் போவதாக அறிவித்திருப்பதும் அவர் மீண்டும் மாநில அரசியலில் தீவிரமாகக் களமிறங்குகிறாரா என்ற கேள்வியை எழுப்பியுள்ளது.
குறிப்பாக, மீண்டும் தமிழ்நாடு பாஜக மாநிலத் தலைவர் பொறுப்பு அவருக்கு வழங்கப்படுமா என்ற விவாதம் அரசியல் வட்டாரங்களில் கவனம் பெற்றுள்ளது. ஏற்கெனவே மாநிலத் தலைவராகப் பணியாற்றிய அனுபவம் இருப்பதால், தமிழ்நாட்டில் கட்சியின் வளர்ச்சிக்கான பணிகளில் அவருக்கு முக்கியப் பொறுப்பு வழங்கப்பட வாய்ப்புள்ளதா என்ற எதிர்பார்ப்பும் நிலவுகிறது.
எல். முருகனின் ராஜினாமா பாஜகவின் யுக்தியா?
தற்போதைய , பாஜக மாநில தலைவர் நயினார் நாகேந்திரன் NDA கூட்டணியில் இருக்கும் அதிமுகவுடன் போதிய இணக்கத்தில் இல்லாததும் எல். முருகனின் வருகைக்கு காரணமாக இருக்கலாம் என அரசியல் வட்டாரங்கள் தெரிவிக்கின்றன.
அதுமட்டுமின்றி , அண்ணாமலை பாஜக வை விட்டு விலகியதிலிருந்து தமிழ்நாடு பாஜகவில் இருந்தவர்களில் பல பேர் அண்ணாமலையை தொடர்பவர்களாக இருந்ததால் அவர் வி தி லீடர்ஸ் என்ற அமைப்பை தொடங்கியதும் அங்கு சென்று சேர்ந்துவிட்டனர் . அதில் பாஜகவின் விசுவாசிகளும் இருக்க வாய்ப்பிருந்ததாகவும் , அவர்களை மீண்டும் காட்சிக்கு திரும்பிவரச்செய்யா எல் முருகனின் ராஜினாமா மற்றும் தமிழ்நாடு பாஜகவை மீட்டெடுக்கும் உக்திகளில் ஒன்றாக பார்க்கப்படுகிறது .
கூர்ந்து கவனித்தால் இன்று அண்ணாமலை வி தி லீடர்ஸ் உள்ளாட்சித் தேர்தலில் பங்குபெறும் என்ற செய்தி வந்த அதே மாலையில் எல்.முருகன் ராஜினாமா செய்துவிட்டு தமிழ்நாட்டில் களப்பணியில் ஈடுபட்டு கட்சியை வலுப்படுத்த முயற்சியில் ஈடுபடப்போகிறேன் என்று அறிவிக்கிறார் என்றால் இதன் பின்னணியில் பாஜகவின் விசுவாசிகளை அண்ணாமலையிடம் இருந்து மீட்டெடுக்கும் முயற்சியாகவும் பார்க்கப்படுகிறது .
தலித் வாக்குகளை கவரும் நோக்கமா?
மேலும், இதுவரை எந்த ஒரு கட்சியும் தலித் சமுதாயத்திலிருந்து தலைவரை முன்னிறுத்தாத காலத்தில் எல். முருகன் தமிழ்நாடு பாஜக வின் தலித் மாநிலத் தலைவராக பிரதிநிதித்துவப்படுத்தியது கவனம் பெற்றது .
அதன்பின் மாநிலத் தலைவர்களாக அண்ணாமலையின் செயல்பாடுகள் மத்தியிலும் , மாநிலத்திலும் பேசப்பட்டது . ஆனால் , அண்ணாமலை கட்சியை விட்டு சென்றதும் பாஜக சற்று சறுக்கலை சந்தித்தது என்று அரசியல் வட்டாரங்கள் பேசத்தொடங்கின .
சட்டமன்ற தேர்தலில் தலித் வாக்குகளை விஜய் வளைத்துப்போட்டு விட்டார் என்று தேர்தல் முடிவுகள் தெரிவித்தது . அந்த வகையில் , எல்.முருகன் போன்ற தலித் தலைவரை முன்னிறுத்தி பாஜகவை தமிழ்நாட்டில் மீண்டும் வலுப்படுத்த கட்சியின் தலைமை முடிவெடுத்திருக்கலாம் என்று கட்சி வட்டாரங்கள் தெரிவிக்கிறது.
மோடியின் தமிழ்நாட்டு வருகையில் , தமிழ்நாட்டு மக்களுக்கு விஜய் மீது உள்ள அன்பும், பிரபலமும் மோடியை சிந்திக்க செய்திருக்கலாம், அதன் பிரதிபலிப்புகளே எல்.முருகனின் ராஜினாமா போன்ற நகர்வுகளாக இருக்கலாம் என்று அரசியல் வட்டாரங்கள் தெரிவிக்கிறது .
அடுத்து என்ன செய்யப் போகிறார் எல்.முருகன்?
மத்திய அமைச்சரவையிலிருந்து விலகியுள்ள எல்.முருகனின் அடுத்தகட்ட அரசியல் நகர்வு என்னவாக இருக்கும் என்பது தற்போது முக்கியமான கேள்வியாக உள்ளது. தமிழ்நாட்டில் கட்சியின் அமைப்புப் பணிகளில் அவர் முழுமையாக ஈடுபடுவாரா, மாநில அளவில் புதிய பொறுப்பு வழங்கப்படுமா அல்லது வேறு அரசியல் திட்டங்களுடன் செயல்படுவாரா என்பதற்கான தெளிவு அதிகாரப்பூர்வ அறிவிப்புகளுக்குப் பின்னரே கிடைக்கும்.
2029 நாடாளுமன்றத் தேர்தலை முன்னிட்டு தமிழ்நாட்டில் பாஜக தனது அரசியல் வியூகங்களைத் தீவிரப்படுத்தும் சூழலில், எல்.முருகனின் ராஜினாமா மற்றும் அவரது அடுத்தகட்ட நடவடிக்கைகள் முக்கியத்துவம் பெற்றுள்ளன. மீண்டும் மாநிலத் தலைவர் பொறுப்புக்கு அவர் வருவாரா அல்லது வேறு பொறுப்பில் இருந்து கட்சியை வலுப்படுத்துவாரா என்பதைப் பொறுத்திருந்துதான் பார்க்க வேண்டும்.
