கரூர் மாவட்டம், குளித்தலை அருகே உள்ள லாலாப்பேட்டை பகுதியை சேர்ந்தவர் இளஞ்சியம் (வயது: 60). இவர், மேல விட்டு கட்டியில் உள்ள தனது அக்கா குடும்பத்தினர் உடன் வசித்து வந்தார். அங்கு தங்கி ஆடு, மாடுகளை வளர்த்து வரும் அவர் தினந்தோறும் ஆடு மாடுகளுக்கு தேவையான தீவன புற்களை பிடுங்குவதற்காக லாலாபேட்டை ரயில்வே நிலையம் அருகே உள்ள வாழை தோப்பு பகுதிக்கு வருவது வழக்கம். அவ்வாறு, கால்நடைகளுக்காக தீவனப் புற்களை அறுப்பதற்காக வந்த அவர் வெகு நேரமாகியும் வீடு திரும்பவில்லை. இரவு முழுவதும் அவரது உறவினர்கள் தேடி வந்த நிலையில் அதிகாலை மீண்டும் வாழைத்தோட்டத்திற்கு வந்து பார்த்தபோது அங்கு ரத்தக்கறை படிந்து இருந்தது. இதனையடுத்து, அருகில் தேடி பார்த்த போது புதர்கள்
நடுவே கழுத்து அறுக்கப்பட்டு இறந்த நிலையில் சடலமாக கிடந்துள்ளார். இது குறித்து, லாலாபேட்டை போலீஸாருக்கு தகவல் தெரிவிக்கப்பட்டது.
அங்கு வந்த போலீஸார் ஆய்வு செய்து விசாரணை மேற்கொண்டனர். இதில், அவர் மூக்கில் அணிந்திருந்த தங்க மூக்குத்தி பறிக்கப்பட்டது தெரியவந்தது. தீவனப்புற்களை அறுக்க வந்த மூதாட்டியை மர்மநபர் மூக்குத்தி பறிப்பதற்காக முயன்று அதில் அவர் கொலை செய்யப்பட்டு இருக்கலாம் என்ற கோணத்திலும் போலீஸார் விசாரணை மேற்கொண்டு வருகின்றனர். இந்த தகவல் அறிந்த திருச்சி மத்திய மண்டல டி.ஐ.ஜி சிபிசக்கரவர்த்தி, கரூர் மாவட்ட எஸ்.பி ஹரிஹரன் பிரசாத் ஆகியோர் சம்பவ இடத்தில் நேரில் வந்து ஆய்வு மேற்கொண்டு விசாரணை செய்தனர். மேலும், கைரேகை நிபுணர்கள் மற்றும் மோப்பநாய் வரவழைக்கப்பட்டது. மோப்பநாய் மோப்பம் பிடித்து சிறிது தூரம் ஓடியது. ஆனால், யாரையும் கவ்வி பிடிக்கவில்லை. 60 வயது மூதாட்டி கொலை செய்யப்பட்டுள்ள சம்பவம், குளித்தலை பகுதியில் பரபரப்பை ஏற்படுத்தியிருக்கிறது.
