காவல் நிலையத்தில் `மிரட்டல்’ தொனியில் ரீல்ஸ்; கூட்டுறவுத்துறை அமைச்சர் காந்திராஜ் வீடியோ சர்ச்சை! | tvk minister gandhiraj in controversy over reels video featuring a threatening tone towards a female police

Spread the love

தமிழக கூட்டுறவுத்துறை அமைச்சரும் த.வெ.க-வின் ராணிப்பேட்டை கிழக்கு மாவட்டச் செயலாளருமான வ.காந்திராஜ் தனது அரக்கோணம் தொகுதிக்கு உட்பட்ட தக்கோலம் காவல் நிலையத்தில் ஆய்வு என்ற பெயரில் நள்ளிரவில் உள்ளே சென்று, பெண் காவலரிடம் மிரட்டும் தொனியில் பேசியதாகவும், அதை ரீல்ஸ் வீடியோவாக எடுத்து இன்ஸ்டாகிராம் பக்கத்தில் பதிவிட்டுள்ளதாகவும் சர்ச்சை எழுந்துள்ளது.

அந்த ரீல்ஸ் வீடியோவை, த.வெ.க-வின் வேலூர் மண்டல தகவல் தொழில்நுட்பப் பிரிவின் அதிகாரப்பூர்வ இன்ஸ்டாகிராம் பக்கத்தில் பதிவேற்றம் செய்து கொலாபரேட்டராக அமைச்சர் காந்திராஜின் இன்ஸ்டா பக்கத்தை ஒன்றிணைத்திருக்கின்றனர். வீடியோவில், கைகளை பின்னால் கட்டிக்கொண்டு அமைச்சர் காந்திராஜ் காவல் நிலையத்துக்குள் நுழைகிறார். அதிலிருந்தே `கருப்பு’ திரைப்படத்தில் இடம்பெறும் `தானடி தானாரடி ராவடி ராங்காவெடி’ பாடல் வரிகள் பின்னணி இசையுடன் ஓடத் தொடங்குகிறது.

அமைச்சர் காந்திராஜின் ரீல்ஸ் பதிவு

அமைச்சர் காந்திராஜின் ரீல்ஸ் பதிவு

பணியில் சீருடையுடன் இருக்கும் காவலர்களை அழைத்து பேசும் அமைச்சர் காந்திராஜ், பெண் காவலர் ஒருவரிடம் மிரட்டும் தொனியில் பேசுவதுபோன்ற காட்சிகளும் வீடியோவில் இடம்பெற்றுள்ளன. `இன்ஸ்பெக்டர் யாருமே இல்ல. இயர் எண்டு வருது’ என்று காந்திராஜ் பேசுவதும், தொடர்ந்து கைகளை பின்னால் கட்டிக்கொண்டு அங்கும் இங்குமாக நடப்பதும்போன்ற காட்சிகளுடன் ரீல்ஸ் முடிகிறது.

ஒருநாளுக்கு முன்னதாக பதிவேற்றம் செய்யப்பட்ட அந்த ரீல்ஸ் வீடியோவை இதுவரை 5 லட்சத்துக்கும் அதிகமான ஃபாலோயர்கள் பார்த்திருக்கின்றனர். அமைச்சரின் செயல்களை பார்த்த பார்வையாளர்கள் பலரும் கமெண்ட் செக்ஷனில் கடும் விமர்சனங்களை முன்வைத்திருக்கின்றனர். இதையடுத்து, கமெண்ட் செக்ஷனை ஆஃப் செய்துவிட்டார்கள் அமைச்சர் காந்திராஜின் ஆதரவாளர்களான த.வெ.க தகவல் தொழில்நுட்பப் பிரிவு நிர்வாகிகள்.

நன்றி

Leave a Reply

Your email address will not be published. Required fields are marked *