International
oi-Shyamsundar I
குவைத்: குவைத்தில் வாழும் புலம்பெயர் மக்களுக்காக, மனிதநேய கலாச்சார பேரவை (மஜகவின் சர்வதேச பிரிவு) சார்பில் 5-வது மாபெரும் இலவச மருத்துவ முகாம் மிகச் சிறப்பாக நடைபெற்றது.
கடந்த அக்டோபர் 2, வெள்ளிக்கிழமை அன்று சால்மியா பகுதியில் அமைந்துள்ள சால்மியா மெடிக்கல் சென்டரில் இந்த முகாம் ஏற்பாடு செய்யப்பட்டிருந்தது. மனிதநேய கலாச்சார பேரவையின் குவைத் மண்டலச் செயலாளர் பொதக்குடி சதக்கத்துல்லா இந்த நிகழ்விற்கு தலைமை தாங்கினார். மண்டல துணைச் செயலாளர் மாயவரம் சபீர் இறைவணக்கம் ஓதி முகாமைத் தொடங்கி வைக்க, இளைஞரணி செயலாளர் சீர்காழி யூனுஸ் அனைவரையும் வரவேற்றுப் பேசினார். மண்டல அவைத் தலைவர் கோணுழாம்பள்ளம் அன்சாரி உள்ளிட்ட முக்கிய நிர்வாகிகள் முன்னிலை வகித்தனர்.
இந்த முகாமில் சுமார் 300-க்கும் மேற்பட்ட பொதுமக்கள் கலந்துகொண்டு மருத்துவப் பரிசோதனைகளையும் உரிய ஆலோசனைகளையும் இலவசமாகப் பெற்றனர். முன்பதிவு செய்திருந்தவர்கள் குறிப்பிட்ட நேரத்தில் வரிசையில் காத்திருந்து பரிசோதனை செய்து கொண்டனர்.
பொதுமக்கள் பலரும் பயன்பெறும் வகையில் இரத்த அழுத்தம் (BP), சர்க்கரை நோய் அளவு (Sugar), கொழுப்பு அளவு (Cholesterol), கண் பரிசோதனை, காது-மூக்கு-தொண்டை (ENT), தோல் நோய் மற்றும் எலும்பு தொடர்பான தீவிர பரிசோதனைகள் இங்கு விரிவாகச் செய்யப்பட்டன.
முகாமிற்கு வருகை தந்த அனைவருக்கும் மனிதநேய ஜனநாயக கட்சியின் நிர்வாகிகள் சார்பில் காலை உணவு, சமோசா, டீ, காபி மற்றும் குளிர்பானங்கள் அன்புடன் வழங்கப்பட்டன. தமிழக மக்கள் மட்டுமின்றி, குவைத்தில் வசிக்கும் பல்வேறு நாடுகளைச் சேர்ந்த பிற மொழி மக்களும் இந்த முகாமில் கலந்து கொண்டு பயனடைந்தனர் என்பது குறிப்பிடத்தக்கது.
இந்நிகழ்வில் உள்ளூர் தொழிலதிபர்கள், பல்வேறு இயக்கங்கள் மற்றும் அரசியல் அமைப்புகளின் பிரதிநிதிகள், சமூக ஆர்வலர்கள் மற்றும் ஊடகவியலாளர்கள் திரளாகக் கலந்துகொண்டனர். இறுதியாக, மண்டல துணைச் செயலாளர் நாகை இப்றாஹிம் நன்றியுரை ஆற்றினார். குவைத்தில் இந்த முகாம் வெற்றிகரமாக நடைபெற உழைத்த நிர்வாகிகளுக்கும் தொண்டர்களுக்கும் மனிதநேய ஜனநாயக கட்சியின் பொதுச்செயலாளர் மு. தமிமுன் அன்சாரி தனது வாழ்த்துகளைத் தெரிவித்தார்.
