சென்னை ஐஸ் ஹவுஸ் பகுதியைச் சேர்ந்தவர் அஜித் (28). இவர் நேற்று இரவு வீட்டு வாசலில் தாயுடன் பேசிக்கொண்டிருந்தார். அப்போது, அங்கு வந்த இருவர் அரிவாளால் அஜித்தைச் சாரமாரியாக வெட்டிக் கொலை செய்தனர்.
இதைத் தடுக்க முயன்ற அஜித்தின் தாயாருக்கும் வெட்டுக்காயம் ஏற்பட்டதாகக் கூறப்படுகிறது. தகவலறிந்து சம்பவ இடத்துக்குச் சென்ற காவல்துறை அஜித்தின் உடலை மீட்டு பிரேதப் பரிசோதனைக்கு அனுப்பி வைத்தனர்.
அதைத் தொடர்ந்து, இந்தக் கொலை தொடர்பாக வழக்குப் பதிவு செய்த காவல்துறை முதன்மைக் குற்றம்சாட்டப்பட்டவராக ஹரிஷ் என்பவரைக் கைது செய்திருக்கிறது. மற்றொரு கூட்டாளியான ராஜேஷ் தலைமறைவாக இருக்கிறார். அவரைத் தேடி வருகிறது.
இந்தக் கொலை தொடர்பாக முதற்கட்ட விசாரணையில், முன் விரோதம் காரணமாகக் கொலை நடந்திருக்கலாம் எனச் சந்தேகிக்கப்படுகிறது. மற்றொருபுறம் போதைப் பொருள் விற்பனை தொடர்பாக ஏற்பட்ட மோதலால் கொலை நடந்திருக்கலாம் எனவும் கூறப்படுகிறது.
ஏற்கெனவே மதுராந்தகம் இடைத்தேர்தல் பிரசாரத்தில் பேசிய பிரேமலதா விஜயகாந்த், “தமிழ்நாட்டில் இந்த 5 மாதங்களில் 500 கொலைகள் நடந்ததுதான் தவெகவின் சாதனை. அண்ணன், தம்பி, தாய்மாமன், பெண்களுக்கு பாதுகாவலன் எனப் பேசும் முதல்வர், பெண்களுக்கு என்ன பாதுகாப்பு கொடுத்தார்” எனச் சட்டம் ஒழுங்கு சீர்கெட்டிருக்கிறது எனக் குற்றம்சாட்டியிருந்தார். எதிர்க்கட்சிகளும் தொடர்ந்து இதேக் கேள்வியை எழுப்பி வருகின்றன.
இந்த நிலையில், திமுக எம்.பி கனிமொழி தன் எக்ஸ் பக்கத்தில், “சென்னை ஐஸ் ஹவுஸ் பகுதியில் அஜித் என்ற இளைஞர், வீட்டு வாசலில் பெற்றோரின் கண்முன்பே வெட்டிப் படுகொலை செய்யப்பட்டிருக்கிறார். தமிழ்நாட்டில் உணவுப் பொருட்களின் விலையும், கொலையும்தான் அன்றாடம் போட்டி போட்டுக்கொண்டு உயர்ந்து கொண்டிருக்கின்றன.
முதலமைச்சர் விஜய் திமுகவை விமர்சிக்க Script-ஐ மனப்பாடம் செய்வதில் காட்டும் அக்கறையைத் தன்வசமுள்ள காவல்துறையைச் செயல்படுத்துவதில் கொஞ்சம் காட்டியிருந்தால் கூட இதுபோன்ற சம்பவங்களைத் தடுத்திருக்கலாம். இனியாவது செய்வாரா?” எனக் கேள்வி எழுப்பியிருக்கிறார்.
