திருச்சி மாவட்டம், மணப்பாறை அருகே பொய்கைப்பட்டியில் சண்முகம் (வயது: 57) என்பவருக்குச் சொந்தமான ஸ்ரீ குமரன் மாடர்ன் ரைஸ் மில் இயங்கி வருகிறது.
இந்த ஆலை கடந்த 27.10.2022 முதல் தமிழ்நாடு நுகர்பொருள் வாணிபக் கழகத்தின் அங்கீகரிக்கப்பட்ட அரிசி அரைக்கும் உரிமம் பெற்று முகவராகச் செயல்பட்டு வருகிறது.
இந்நிலையில், தமிழ்நாடு நுகர்பொருள் வாணிபக் கழகத்தின் சார்பில், 2026 ம் ஆண்டு முதல் அரிசி ஆலைக்குச் சுமார் 3,710 மெட்ரிக் டன் நெல், அரிசியாக மாற்றித் திரும்ப ஒப்படைக்கும் நோக்கில் வழங்கப்பட்டுள்ளது. ஒப்பந்தத்தின்படி, நெல் பெறப்பட்ட 15 நாட்களுக்குள் அதற்குரிய அரிசியை வாணிபகழகத்திடம் ஒப்படைக்க வேண்டும்.
அந்த அரிசி அரசு நியாயவிலைக் கடைகள் மூலம் பொதுமக்களுக்கு விநியோகம் செய்வதற்காக அனுப்பப்படும். இந்நிலையில், கடந்த செப்டம்பர் 9 -ம் தேதி மற்றும் அக்டோபர் 10- ம் தேதிகளில் மேற்கொள்ளப்பட்ட ஆய்வின்போது, வழங்கப்பட்ட நெல்லுக்கு இணையான அரிசி வாணிபக் கழகத்திடம் ஒப்படைக்கப்படாமலும், சம்பந்தப்பட்ட அரிசி ஆலையின் இருப்பில் இல்லாததும் கண்டறியப்பட்டது.