India
oi-Vignesh Selvaraj
விஜயவாடா: ஆந்திர மாநிலம் விஜயவாடா மேற்கு புறவழிச்சாலையில் மின்சார கார் ஒன்று தீப்பிடித்ததில் நான்கு பேர் உயிருடன் எரிந்து பலியாகினர். இந்தக் கோரச் சம்பவத்தில் மேலும் ஒருவர் படுகாயமடைந்தார்.
இந்த விபத்து குறித்த தகவல் கிடைத்ததும், காவல்துறையினரும் தீயணைப்புப் படையினரும் சம்பவ இடத்திற்கு விரைந்து மீட்புப் பணிகளைத் தொடங்கினர். உயிரிழந்தவர்கள், என்.டி.ஆர் மாவட்டம் நுன்னாவைச் சேர்ந்த 39 வயதான கொம்மரெட்டி ராம்தேவ், அவரது தாயார் கொம்மரெட்டி அருணா, ஒரு சிறு குழந்தை மற்றும் நம்பூரைச் சேர்ந்த திகுரு விஜயா என அடையாளம் காணப்பட்டுள்ளனர்.
காயமடைந்த நபர் சிகிச்சைக்காக மருத்துவமனைக்குக் கொண்டு செல்லப்பட்டார், அவரது நிலைமை கவலைக்கிடமாக இருப்பதாகத் தெரிவிக்கப்பட்டுள்ளது. நம்பூருவில் நடைபெற்ற ஒரு நிகழ்ச்சியில் கலந்துகொண்டு காரில் திரும்பிக் கொண்டிருந்தபோது இந்த விபத்து நிகழ்ந்துள்ளது.
கார் சாலை தடுப்பில் மோதியதும் தீப்பிடித்துள்ளது. கார் தீப்பிடித்ததற்கான காரணம் இன்னும் கண்டறியப்படவில்லை. ஆந்திரப் பிரதேச அமைச்சர் நாரா லோகேஷ், எக்ஸ் சமூக வலைதளத்தில் பதிவிட்ட ஒரு பதிவில் இந்தச் சம்பவம் குறித்து அதிர்ச்சி தெரிவித்துள்ளார்.
விபத்தில் நான்கு பேர் உயிரிழந்தது தனக்கு மிகுந்த வேதனையை அளித்ததாகவும், உயிரிழந்தவர்களுக்கு அஞ்சலி செலுத்துவதாகவும் அவர் கூறியுள்ளார். மேலும், காயமடைந்த நபருக்குச் சிறந்த மருத்துவ சிகிச்சை கிடைப்பதை உறுதி செய்யுமாறு அதிகாரிகளுக்கு அறிவுறுத்தியுள்ளதாகவும் அவர் தெரிவித்தார்.
கடந்த மார்ச் மாதம், மத்திய பிரதேசத்தின் இந்தூரில், வளாகத்திற்கு வெளியே சார்ஜ் செய்யப்பட்டுக் கொண்டிருந்த மின்சாரக் கார் ஒன்று வெடித்ததைத் தொடர்ந்து ஏற்பட்ட பெரும் தீ விபத்தில், மூன்று மாடி வீடு முழுவதும் எரிந்து நாசமானது. இதில் இரண்டு சிறார்கள் உட்பட எட்டு பேர் உயிரிழந்தது குறிப்பிடத்தக்கது.
