நீலாங்கரையில் உள்ள விஜய்யின் இல்லத்துக்கு ராகுல் காந்தி சென்றபோது, அவரை ஆரத்தழுவி வரவேற்றிருக்கிறார் முதலமைச்சர் விஜய். சந்திப்பின் தொடக்கத்தில் தாராபுரம், மதுராந்தகம் இடைத்தேர்தல் வெற்றிக்காக வாழ்த்துகள் பரிமாறப்பட்டதாகக் கூறப்படுகிறது. அடுத்ததாகப் பேச்சு தேசிய அரசியலுக்குத் திரும்பியிருக்கிறது.
அங்குதான் கதையில் திருப்பம் ஏற்பட்டுள்ளது. அதாவது ராகுல்காந்தி விஜய்க்கு சில கோரிக்கைகளை வைத்ததாகக் கூறப்படுகிறது,
ராகுலின் கோரிக்கைகள்… விஜய்யின் பதில் என்ன?
தேர்தல் ஆணையத்தின் சிறப்புத் தீவிரத் திருத்தப் பணியான எஸ்.ஐ.ஆர். (SIR), தலைமைத் தேர்தல் ஆணையர் ஞானேஷ் குமார் விவகாரம் ஆகியவை குறித்து ராகுல் காந்தி தனது கருத்துகளை விஜய்யிடம் எடுத்துரைத்ததாகத் தகவல்கள் தெரிவிக்கின்றன.
தேர்தல் ஆணையத்துக்கு எதிரான எதிர்ப்பில் தவெகவும் வெளிப்படையாகப் பங்கேற்க வேண்டும் என்பதே ராகுலின் எதிர்பார்ப்பாக இருந்ததாகக் கூறப்படுகிறது. இதற்காக அவர் மூன்று கோரிக்கைகளை முன்வைத்ததாக அரசியல் வட்டாரங்களில் பேசப்படுகிறது.
முதல் கோரிக்கை: எஸ்.ஐ.ஆர். விவகாரத்தில் தவெக தனது எதிர்ப்பை மேலும் அழுத்தமாக வெளிப்படுத்த வேண்டும்.
இரண்டாவது கோரிக்கை: தலைமைத் தேர்தல் ஆணையர் ஞானேஷ் குமாருக்கு எதிரான போராட்டத்தில் தவெக அமைச்சர்களும் பங்கேற்க வேண்டும்.
மூன்றாவது கோரிக்கை: டெல்லியில் நடைபெறும் இந்தியா கூட்டணியின் போராட்டங்கள் மற்றும் ஆலோசனைக் கூட்டங்களுக்கு விஜய் நேரடியாக ஆதரவு அளிக்க வேண்டும்.
ஆனால், இந்தக் கோரிக்கைகளுக்கு விஜய் உடனடியாகச் சம்மதம் தெரிவிக்கவில்லை என்றும், எஸ்.ஐ.ஆர். தொடர்பாக ஏற்கெனவே தவெக தனது நிலைப்பாட்டை அறிவித்துவிட்டதாகவும், மற்ற விவகாரங்கள் குறித்து ஆலோசித்துப் பதில் அளிப்பதாகவும் விஜய் மழுப்பலான பதில்களை கொடுத்ததாக தகவல்கள் வெளியாகியுள்ளன.
அதாவது, ராகுல் கேட்டதற்கு உடனடியாக ‘ஓகே’ சொல்லாமல், பந்தைத் தனது பக்கத்தில் வைத்துக்கொண்டாராம் விஜய் என்கின்றனர் உள்விவரம் அறிந்தவர்கள்.
ராகுல் எதிர்பார்த்தது ஒன்று… விஜய் காட்டியது வேறொரு பாதையா?
தேசிய அளவில் பாஜகவுக்கு எதிராக எதிர்க்கட்சிகள் ஒன்றிணைந்து போராடிவரும் நிலையில், தமிழ்நாட்டில் ஆட்சியில் இருக்கும் தவெகவும் தங்களுடன் கைகோர்க்க வேண்டும் என்பது காங்கிரஸின் எதிர்பார்ப்பாக இருக்கலாம். ஆனால், தமிழ்நாடு அரசியலில் தனக்கென ஓர் இடத்தை உருவாக்க முயலும் விஜய், தேசியக் கட்சிகளின் அரசியல் வியூகத்துக்குள் உடனடியாகச் செல்ல விரும்புகிறாரா என்பதுதான் இப்போது எழும் கேள்வி.
குறிப்பாக, தேர்தல் ஆணையத்துக்கு எதிரான போராட்டத்தில் அமைச்சர்களைப் பங்கேற்கச் செய்வது, டெல்லிக்குச் சென்று ஆதரவு தெரிவிப்பது போன்ற முடிவுகள் சாதாரணமானவை அல்ல. அவை தவெகவின் அரசியல் நிலைப்பாட்டையும் தேசிய அளவிலான எதிர்க்கட்சிகளுடனான உறவையும் வெளிப்படுத்தக்கூடியவை.
இதனால், ராகுல் முன்வைத்த கோரிக்கைகளுக்கு விஜய் உடனடியாக உறுதி அளிக்காதது, இரு கட்சிகளின் அரசியல் அணுகுமுறைகளுக்கு இடையே உள்ள வேறுபாட்டைக் காட்டுகிறதா என்ற விவாதம் எழுந்துள்ளது.
வீட்டில் அரசியல் பேச்சு… ஹோட்டலில் காபி!
இந்தச் சந்திப்பில் கவனிக்க வேண்டிய இன்னொரு விஷயமும் இருக்கிறது. விஜய்யின் இல்லத்தில் பேச்சுவார்த்தை முடிந்த பிறகு, ராகுல் காந்தியைத் தனது அதிகாரப்பூர்வ வாகனத்தில் அழைத்துக்கொண்டு பாலவாக்கத்தில் உள்ள ‘பெடல் கஃபே’ சென்றார். இந்தக் கஃபே கிரிக்கெட் வீரர் தோனியுடன் தொடர்புடையதாகச் சொல்லப்படுகிறது.
அங்கு இருவரும் உணவருந்தியதாகத் தகவல்கள் தெரிவிக்கின்றன. அரசியல் சந்திப்புக்குப் பிறகு இருவரும் ஒன்றாகக் காபி அருந்தச் சென்றது, இரு தரப்புக்கும் இடையே நல்லுறவு நீடிப்பதைக் காட்டும் முயற்சியாகப் பார்க்கப்படுகிறது.
ஆனால், ஒரு காபி சந்திப்பால் அரசியல் கருத்து வேறுபாடுகள் அனைத்தும் தீர்ந்துவிடுமா என்ன? வெளியில் நட்பான சந்திப்பு, உள்ளே முக்கியமான அரசியல் விவாதங்கள் என இந்தச் சந்திப்பு பல கேள்விகளை விட்டுச் சென்றிருக்கிறது.
காங்கிரஸுடன் கூட்டணி… ஆனால் தேசியப் போராட்டத்தில் தயக்கமா?
தமிழ்நாட்டில் காங்கிரஸுடன் தவெகவின் உறவு எப்படி இருக்கும் என்பது ஏற்கெனவே அரசியல் வட்டாரங்களில் விவாதிக்கப்பட்டு வருகிறது. இப்போது ராகுல் காந்தியின் சந்திப்புக்குப் பிறகு அந்தக் கேள்வி மேலும் முக்கியத்துவம் பெற்றுள்ளது.
ராகுலின் கோரிக்கைகளை விஜய் ஏற்றுக்கொண்டாரா, டெல்லி போராட்டத்தில் தவெக பங்கேற்குமா, அமைச்சர்கள் அனுப்பப்படுவார்களா என்பதற்கான தெளிவான பதில் இதுவரை வெளியாகவில்லை. அதே நேரத்தில், இந்தச் சந்திப்பை வைத்துக்கொண்டு இரு கட்சிகளுக்கும் இடையே விரிசல் ஏற்பட்டுவிட்டதாகவும் உறுதியாகச் சொல்ல முடியாது.
ஆனால் ஒன்று மட்டும் நிச்சயம்… தேசிய அரசியலில் காங்கிரஸ் எதிர்பார்க்கும் ஆதரவைத் தமிழ்நாடு முதலமைச்சர் விஜய் எந்த அளவுக்குக் கொடுக்கப்போகிறார் என்பதுதான் இனிவரும் நாட்களில் கவனிக்க வேண்டிய விஷயம்.
ராகுல் காந்தி கேட்டது அரசியல் ஆதரவு.. விஜய் கொடுத்ததோ ஆலோசித்துச் சொல்கிறேன் என்ற பதில்.. காபி சந்திப்பு இனித்தாலும், அரசியல் கணக்கில் இருவருக்கும் ஒரே சுவைதானா என்பதைப் பொறுத்திருந்துதான் பார்க்க வேண்டும்.
