இந்த நிலை குறித்து 2015-ம் ஆண்டிலேயே ஊடகங்களில் செய்திகள் வெளியாகின. அப்போதைய ராணிப்பேட்டை நகராட்சி நிர்வாகமும் நினைவிடத்தைப் புனரமைப்பதற்கான முயற்சிகளை மேற்கொண்டதாகச் செய்திகள் தெரிவிக்கின்றன. பின்னர் 2020-ம் ஆண்டில் இந்த இடத்தை வரலாற்றுச் சின்னமாகவோ சுற்றுலாத் தலமாகவோ மேம்படுத்துவதற்கான திட்டங்கள் குறித்தும் ஆலோசிக்கப்பட்டன.
இருப்பினும், முழுமையான புனரமைப்புப் பணிகள் தொடங்குவதற்குச் சில ஆண்டுகள் காத்திருக்க வேண்டியிருந்தது.
2024-ல் தொடங்கிய மறுசீரமைப்பு முயற்சி!
நீண்ட காலமாகப் பராமரிப்பின்றி இருந்த ராஜா – ராணி நினைவிடத்தைப் புனரமைத்து, பொதுமக்கள் பார்வையிடக்கூடிய வரலாற்றுச் சுற்றுலாத் தலமாக மாற்ற வேண்டும் என்ற கோரிக்கை தொடர்ந்து எழுந்து வந்தது.
இதையடுத்து, கைத்தறி மற்றும் துணிநூல் துறை அமைச்சர் ஆர்.காந்தியின் முயற்சியால், பொதுப்பணித் துறையின் பட்ஜெட் அறிவிப்பில் இந்த நினைவிடத்தைப் புனரமைக்க ரூ.2.50 கோடி ஒதுக்கீடு செய்யப்பட்டது.
தொடர்ந்து, 2024 அக்டோபர் 23-ம் தேதி அமைச்சர் ஆர்.காந்தி புனரமைப்புப் பணிகளுக்கு அடிக்கல் நாட்டினார். மறுநாள் அக்டோபர் 24-ம் தேதி நடைபெற்ற நிகழ்வில் பணிகள் தொடங்கப்பட்டன. அப்போது மாவட்ட ஆட்சியர், உள்ளாட்சிப் பிரதிநிதிகள் மற்றும் பொதுப்பணித் துறை அதிகாரிகளும் கலந்துகொண்டனர்.
இந்தப் பணிகளைப் பொதுப்பணித் துறையின் மரபுக் கட்டடங்கள் பாதுகாப்புப் பிரிவு மேற்கொண்டு வருகிறது. நினைவிடத்தின் பழைமையான கட்டட அமைப்பைப் பாதுகாத்து, அதன் வரலாற்றுத் தன்மை மாறாமல் புனரமைப்பதே இந்த முயற்சியின் முக்கிய நோக்கமாகும்.
பழைமை மாறாமல் புதுப்பிக்கும் முயற்சி!
புனரமைப்புப் பணிகளில் நினைவிடத்தின் சேதமடைந்த பகுதிகளைச் சீரமைப்பதுடன், அதன் பாரம்பர்யக் கட்டடக் கலை அம்சங்களையும் பாதுகாப்பதில் கவனம் செலுத்தப்படுகிறது.
புதர்கள் அகற்றப்பட்டு, சேதமடைந்த கட்டடப் பகுதிகளைச் சீரமைக்கும் பணிகள் மேற்கொள்ளப்பட்டுள்ளன. பழைமையான கட்டுமான முறைகளுக்கு ஏற்ற வகையில் செங்கல், சுண்ணாம்பு கலவை உள்ளிட்ட பொருள்களைப் பயன்படுத்திப் புனரமைக்கும் பணிகளும் இடம்பெற்றுள்ளன.
