International
oi-Vigneshkumar
ஸ்டாக்ஹோம்: 2026ம் ஆண்டு பொருளாதாரத்துக்கான நோபல் பரிசு குறித்த அறிவிப்பு இப்போது வெளியாகியுள்ளது. ராபர்ட் இ. ஹால், மைக்கேல் வுட்ஃபோர்டு ஆகிய இருவருக்கு நோபல் வழங்கப்படும் என அறிவிக்கப்பட்டுள்ளது. பொருளாதாரத்தை நிலையாக வைத்திருக்க உதவுவது குறித்த ஆய்வுகளுக்காக இவர்களுக்கு நோபல் வழங்கப்படுகிறது.
ஒவ்வொரு ஆண்டும் பல்வேறு பிரிவுகளில் சிறந்து விளங்கும் ஆய்வாளர்களுக்கு நோபல் பரிசு வழங்கப்படுவது வழக்கம். நடப்பு ஆண்டுக்கான நோபல் பரிசு கடந்த வாரம் முதல் அறிவிக்கப்பட்டு வந்தது. மருத்துவம், இயற்பியல், வேதியியல், இலக்கியம் மற்றும் அமைதிக்கான நோபல் பரிசு குறித்த அறிவிப்புகள் வெளியான நிலையில், இப்போது பொருளாதாரத்திற்கான நோபல் பரிசு அறிவிக்கப்பட்டுள்ளது.
2026ஆம் ஆண்டுக்கான பொருளாதாரத்திற்கான நோபல் பரிசு ராபர்ட் இ. ஹால் மற்றும் மைக்கேல் வுட்ஃபோர்டு ஆகியோருக்கு அறிவிக்கப்பட்டுள்ளது. பொருளாதாரத்தில் ஏற்படும் ஏற்ற இறக்கங்களைக் கட்டுப்படுத்தி, பொருளாதாரத்தை நிலையாக வைத்திருக்க உதவும் ஆய்வு பணிகளை மேற்கொண்டதற்காக இருவருக்கும் இந்த விருது வழங்கப்படுகிறது. இதனை ஸ்டாக்ஹோமில் உள்ள ராயல் ஸ்வீடிஷ் அறிவியல் அகாடமி அறிவித்துள்ளது.
பொருளாதார நோபல் பரிசு எப்போது தொடங்கப்பட்டது?
மற்ற நோபல் பரிசுகளை போல அல்லாமல், பொருளாதாரத்துக்கான நோபல் பரிசு பின்னாட்களில் தான் உருவாக்கப்பட்டது. ஸ்வீடன் மத்திய வங்கி 1968ஆம் ஆண்டு முதல் இதை கொடுத்து வருகிறது..
டைனமைட்டை கண்டுபிடித்தவரும், நோபல் பரிசுகளை உருவாக்கியவருமான ஆல்ஃபிரட் நோபலின் நினைவாக இந்த விருது வழங்கப்படுகிறது. மற்ற நோபல் பரிசுகள் ஆல்ஃபிரட் நோபலின் உயிலை தொடர்ந்து வழங்கப்படுகிறது. ஆனால், இந்த விருது தனியாகவே அறிவிக்கப்படுகிறது. இருப்பினும், மற்ற விருதுகளுடன் சேர்த்து ஆண்டுதோறும் டிசம்பர் 10ஆம் தேதி தான் பொருளாதாரத்திற்கான நோபல் பரிசு வழங்கப்படுகிறது.
கடந்த ஆண்டு புதிய கண்டுபிடிப்புகளும் பொருட்களும் பொருளாதார வளர்ச்சியையும் மக்களின் நலனையும் எப்படி மேம்படுத்துகின்றன என்பதை விளக்கிய மூன்று ஆய்வாளர்களுக்கு பொருளாதாரத்துக்கான நோபல் பரிசு வழங்கப்பட்டது. புதிய கண்டுபிடிப்புகள் வளர்ச்சியை ஏற்படுத்தினாலும், பழைய நிறுவனங்கள் போட்டியில் பின்தங்கக்கூடும் என்பதையும் அவர்களின் ஆய்வு விளக்கி இருந்தது குறிப்பிடத்தக்கது..
2026ஆம் ஆண்டுக்கான பரிசுத் தொகை 1.2 கோடி ஸ்வீடிஷ் குரோனா ஆகும். இது அமெரிக்க டாலர் மதிப்பில் சுமார் 12 லட்சம் டாலராகும்.
