ஜெய்ப்பூரில் உள்ள மொஹானா பகுதியில் ஒரு வீட்டின் படுக்கையறைக்குள் புகுந்து நகைகளைத் திருடிய பெண் ஒருவர், அங்கிருந்த சிசிடிவி கேமராவில் சிக்கினார். வீட்டின் உரிமையாளர் கதவை வெளிப்பக்கமாகப் பூட்டியதால் மாட்டிக்கொண்ட அந்தப் பெண், தப்பிக்க வழி தெரியாமல் தனது ஆடைகளைக் கிழித்துக் கொண்டு போலீஸாரை அழைப்பதாக மிரட்டி தன் மீது கை வைத்தால் பொய் வழக்கு போடுவேன் என்றும் அவர் உரிமையாளரை அச்சுறுத்தினார்.
ஜெய்ப்பூர் முஹானா பகுதியில் உள்ள ஒரு வீட்டில் கடந்த சில நாட்களுக்கு முன்பு (சுமார் ஒரு வருடத்திற்கு முன்) ₹7 லட்சம் மதிப்புள்ள நகைகளும் பணமும் திருடு போயிருந்தன. இந்த முந்தைய திருட்டுச் சம்பவத்தைத் தொடர்ந்தே, வீட்டின் உரிமையாளர் தனது வீட்டின் பாதுகாப்பிற்காக படுக்கையறையில் ரகசிய சிசிடிவி கேமராக்களைப் பொருத்தினார்.
வீட்டின் உரிமையாளர் தனது குடும்பத்தினருடன் வெளியே சென்றிருந்தபோது, தனது மொபைல் போன் மூலம் சிசிடிவி காட்சிகளைச் சரிபார்த்தார். அப்போது ஒரு பெண் படுக்கையறைக்குள் நுழைந்து, பீரோவைத் திறப்பதைக் காட்டியது. அவர் அங்கிருந்த ஒரு சிறிய பெட்டியை வெளியில் எடுத்து, அதை படுக்கையின் மேல் வைத்து, அதில் இருந்த பொருட்களை ஒவ்வொன்றாகத் தேடிப் பார்த்தார். அதில் பெரும்பாலானவை தங்க நகைகளாக இருந்தன.
உடனே வீட்டின் உரிமையாளர் தனது பக்கத்து வீட்டுக்காரரைத் தொடர்புகொண்டு விபரத்தைக் கூறி, வீட்டின் முக்கிய நுழைவாயில் கதவைப் பூட்டுமாறு கேட்டுக்கொண்டார். அதே நேரத்தில், அவரும் அவசரமாக வீட்டிற்கு நோக்கி விரைந்தார். வீட்டிற்குள் மாட்டிக்கொண்ட அந்தப் பெண், வீட்டின் உரிமையாளரிடமும் , அவரது பக்கத்து வீட்டுக்காரரிடமும் வாக்குவாதத்தில் ஈடுபட்டார்.
அப்போது அந்தப் பெண், “நான் என் ஆடைகளைக் கிழித்துக் கொள்வேன். போலீஸ் உங்களைப் பிடிக்கும்” என்று மிரட்டினார். அதனை வீட்டு உரிமையாளர் தனது மொபைல் போனில் வீடியோ எடுத்தார். அதோடு இது குறித்து போலீஸாருக்கும் தகவல் கொடுத்தார்.
போலீஸாரின் உடனடி நடவடிக்கை
தகவல் கிடைத்தவுடன் முஹானா பகுதி போலீஸார் விரைந்து வந்து சூழ்நிலையைக் கட்டுக்குள் கொண்டு வந்தனர். அந்தப் பெண் பாதுகாப்பாக போலீஸ் நிலையத்திற்கு அழைத்துச் செல்லப்பட்டார். வீட்டின் உரிமையாளர் அளித்த புகாரின் அடிப்படையில் அந்தப் பெண் மீது வழக்குப் பதிவு செய்யப்பட்டுள்ளது.
“என் ஆடைகளைக் கிழித்துக் கொண்டு போலீஸாரை அழைப்பேன்” என்ற அந்தப் பெண்ணின் வார்த்தைகள், சட்டத்தைத் தவறாகப் பயன்படுத்தி தப்பிப்பதற்காகச் செய்யப்பட்ட திட்டமிட்ட மிரட்டலாகும். ஆனால், உரிமையாளரும் பக்கத்து வீட்டுக்காரரும் அவரிடமிருந்து தள்ளி நின்று வீடியோ பதிவு செய்ததால், வீட்டு உரிமையாளர் பொய் வழக்குகளில் இருந்து தங்களைத் தற்காத்துக் கொண்டார்.
