ஜார்க்கண்ட் மாநிலம் ராஞ்சியில் உள்ள ஒரு மதுபானக் கடைக்குள் நுழைந்த ஒரு குரங்கு, அங்கிருந்த வோட்கா பாட்டிலை திறந்து அரை பாட்டில் மதுவைச் சாவகாசமாக குடித்துவிட்டு, அங்கேயே மயங்கி விழுந்து தூங்கிவிட்டது. இது போன்று ஒரு திருடன் செய்தால் அடி-உதை கொடுத்து போலீஸில் ஒப்படைத்து இருக்க முடியும். ஆனால், மது மயக்கத்தில் தூங்கிக்கொண்டிருந்த அந்த குரங்கை கடைக்காரர்களால் ஒன்றும் செய்ய முடியவில்லை. குரங்கு போதையில் உறங்குவதை அங்கிருந்தவர்கள் தங்கள் செல்போன்களில் படம் பிடித்தார்களே தவிர, வேறு எதுவும் செய்யவில்லை.
இச்சம்பவம் ராஞ்சியில் உள்ள ஓர்மாஞ்சி சௌக் பகுதியில் நடைபெற்றது. மதுபானக்கடையில் ஊழியர்கள் இருந்தபோது, திடீரென ஒரு குரங்கு உள்ளே நுழைந்தது. ஆரம்பத்தில் ஊழியர்கள் அதை விரட்ட முயன்றதுடன், அதன் கவனத்தைத் திசைதிருப்ப பிஸ்கட்டுகளை சாப்பிட கொடுத்தனர்.
ஆனால், அந்தக் குரங்கு ஒரு வோட்கா பாட்டிலை எடுத்து உடைத்து, அதிலிருந்த மதுவை அருந்தியது. குடித்துவிட்டு சிறிது நேரத்தில், அது மது போதையில் கடையின் உள்ளே இருந்த மதுப்பெட்டியின் மீது படுத்து அப்படியே உறங்கி விட்டது.
குரங்கின் இந்த செயலை கண்டு அங்கிருந்தவர்கள் திகைத்துப் போனார்கள். மது அருந்திவிட்டு கடைக்குள் மயங்கி கிடந்த குரங்கை அங்கே இருந்தவர்கள் தங்கள் செல்போனில் படம் பிடித்தனர். அங்கு எடுக்கப்பட்ட காணொலி சமூக வலைத்தள பக்கத்தில் வைரலானது. அவ்வாறு வைரலான காணொளிகளில் வாடிக்கையாளர்கள் கடையில் மது வாங்க வருவதையும், குரங்கு பின்னால் தூங்கிக்கொண்டிருப்பதையும் காணமுடிந்தது. கடைக்காரர்கள் மற்றும் உள்ளூர்வாசிகளின் கூற்றுப்படி, மது போதையில் உறங்கிய குரங்கு கடந்த சில நாட்களாக அப்பகுதியில் வீசியெறியப்பட்ட காலி பாட்டில்களில் எஞ்சியிருக்கும் மதுவை நக்கிக் குடித்து சுவை கண்டதாக தெரிவித்தனர்.
